«កន្ទុយពស់ភ្នំ» ជារុក្ខជាតិដែលអាចយកធ្វើជាឱសថព្យាបាលជំងឺរលាកតម្រងនោម
កន្ទុយពស់ភ្នំ ជាប្រភេទរុក្ខជាតិដែលដុះតាមតំបន់ភ្នំ ត្រូវបានគេយកមកធ្វើជាឱសថសម្រាប់ព្យាបាល ជំងឺរលាកតម្រងនោម ក្រួសក្នុងតម្រងនោម ឈឺកន្លាក់ឆ្អឹង ឈឺភ្នែក និងរលាកបំពង់ក។ នេះបើយើងទៅតាមសៀវភៅរុក្ខជាតិឱសថកម្ពុជា។
គេអាចយកដើមរបស់វា មកកាត់ខ្លីៗ ហើយហាលថ្ងៃឱ្យស្ងួត ដើម្បីយកមកដាំទឹកផឹកសម្រាប់ព្យាបាលជំងឺ រលាកតម្រងនោម ឬ ក្រួសក្នុងតម្រងនោមនេះបានយ៉ាងមានប្រសិទ្ធភាព។
ចំណែកអ្នកដែលកើតបូស ពងខ្ទុះលើស្បែក របួសបោកទង្គិចដំបៅ គេយកស្លឹកស្រស់ចំនួន១៥-៣ ក្រាម បុកជាមួយនឹងមុខឈ្នោងបិតបំពោក ចំពោះបូស ត្រូវលាងស្ករត្នោតថែមទៀតទើបបិទ។
រុក្ខជាតិនេះច្រើនដុះនៅតាមតំបន់ភ្នំ ហើយគេក៏អាចយកវាមកដាំលម្អបាននៅតាមគ្រប់ទីកន្លែង។ ដើមរបស់វា មានលក្ខណៈទ្រេត ឬ ត្រង់ ចំណែកឯស្លឹករបស់វាជាស្លឹកទោលទល់ទោង រាងពងក្រពើស្រួចចុង គែមធ្មេញរណា ផ្ទៃគ្រើមគ្រាត ដោយទ្រនុងរបស់វាមានទំហំតូចខ្វាច់ខ្វែង ជាច្រើនលើផ្ទៃបៃតងចាស់ ផ្ទៃក្រោមត្នោតមានរោមខ្លីៗ៕
(សារព័ត៌មាន ថ្មីៗ២៥ រាជធានី-ខេត្ត ដកស្រង់ចេញពីសៀវភៅរុក្ខជាតិឱសថកម្ពុជា)
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com