«ទាក» ឬ «ឈ្លើងគោក» ដែលអ្នកដើរព្រៃ និងឡើងភ្នំតែងជួបប្រទះ
តាមវចនានុក្រមសម្តេចព្រះសង្ឃរាជ ជួន ណាត «ទាក» អាចហៅម្យ៉ាងទៀតថា «ឈ្លើងគោក» ដែលមានក្នុងព្រៃស្រោង ឬជើងភ្នំដែលមានធាតុសើមជានិច្ច។ ជារួម ទាក មានរូបរាងស្រដៀងឈ្លើង ប៉ុន្តែមានភាពរហ័សជាង។ ទាកត្រូវបានអ្នកធ្វើដំណើរកម្សាន្តបែបផ្សងព្រេង ដូចជាការដើរព្រៃ ឡើងភ្នំ ជួបប្រទះជាញឹកញាប់ពិសេសនៅតំបន់ព្រៃស្មោង និងតំបន់ព្រៃដែលមិនធ្លាប់ទទួលរងការបំផ្លិចបំផ្លាញពីភ្លើងឆេះ។
យុវតី ទីវ ចាន់រ៉ាដេត ដែលចូលចិត្តដំណើរបែបផ្សេងព្រេង ដូចជាដើរព្រៃ និងឡើងភ្នំ តែងតែមានការប្រុងប្រយ័ត្នខ្ពស់ចំពោះសត្វទាក ពស់ និងឧបសគ្គផ្សេងៗ ដោយដាក់ជាប់ជាមួយនឹងស្ព្រេបាញ់ និងការស្លៀកពាក់ជិតៗ។
លោក ជួន ភិរម្យ មានបទពិសោធន៍ដើរព្រៃឡើងភ្នំជិត ២០ឆ្នាំមកហើយនោះ បានប្រាប់ ThmeyThmey25 ថា លោកបានជួបទាក ពស់ និងសត្វផ្សេងៗ ញឹកញាប់ ដែលទាំងនោះមិនមានជាឧបសគ្គធំនោះឡើយសម្រាប់លោក។ ប៉ុន្តែលោកតែងតែណែនាំដល់អ្នកមានបំណងឡើងភ្នំឲ្យប្រុងប្រយ័ត្នចំពោះសត្វទាក និងយល់ដឹងពីវិធីកំចាត់សត្វទាកផងដែរ ជាពិសេសត្រូវមានស្ព្រេជាប់ខ្លួន។
យុវជន ផាត សិទ្ធ ហៅ SethiSelo ជាអ្នកថតរូបម្នាក់ និងចូលចិត្តធ្វើដំណើរកម្សាន្តតាមតំបន់ធម្មជាតិនានាបានឲ្យដឹងថា រាល់ពេលធ្វើដំណើរទៅលេងនៅតាមតំបន់ព្រៃភ្នំដូចនៅឱរ៉ាល់ តែងតែជួបប្រទះសត្វទាក ជាពិសេស ពេលមានភ្លៀងធ្លាក់ ហើយនៅអាកាសធាតុក្តៅ ក៏មានខ្លះៗដែរ។
យុវជនរូបនេះរៀបរាប់ថា៖ «ខ្ញុំមិនមែនគ្រាន់តែបានជួបនោះទេ តែក៏ធ្លាប់ត្រូវទាកទាមផងដែរ ពេលវា ទាម និងខាំ យើងមានអាការៈចុកដូចចាក់ថ្នាំ និងឈឺតែមួយភ្លែតក៏បាត់ហើយ បើវាទាមក៏យកឈើឆ្កឹះវាចេញទៅបានហើយ»។
ដោយសង្កេតឃើញនូវសន្ទុះនៃការធ្វើដំណើរកម្សាន្តនៅតាមតំបន់ព្រៃភ្នំហាក់កំពុងមានការពេញនិយមចំពោះពលរដ្ឋខ្មែរ ពិសេសក្នុងស្រទាប់យុវវ័យ ក្នុងគោលបំណងបង្កើនការផ្សព្វផ្សាយទេសចរណ៍ក្នុងស្រុក បន្ធូបន្ថយអារម្មណ៍តានតឹង ក៏ដូចជាបង្ហាញនូវចេតនាស្រលាញ់បរិស្ថានធម្មជាតិដោយមិនគិតពីភាពនឿយហត់។ ភាពស្រស់ស្អាត បរិយាកាសស្រស់ថ្លា បរិស្ថានល្អ សុទ្ធតែជាអ្វីដែលទទួលបានពីភាពអំណត់ ការព្យាយាម តស៊ូពីអ្នកទេសចរ ប៉ុន្តែទេសចរចាំបាច់មានការប្រុងប្រយ័ត្នខ្ពស់ ដើម្បីការពារហានិភ័យទុកជាមុន ជៀសវាងមានបញ្ហាណាមួយ ព្រោះបើបណ្ដោយឲ្យសត្វទាកទាម ឬចូលត្រជៀកនោះវាអាចមានបង្កឲ្យមានហានិភ័យជាច្រើន ដែលអ្នកចូលចិត្តធ្វើដំណើរតាមព្រៃភ្នំគួរស្វែងយល់៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com