«ភ្នំត្បែង» តំបន់បេតិកភណ្ឌធម្មជាតិដ៏ស្រស់ត្រកាល នាខេត្តព្រះវិហារ
«ភ្នំត្បែង» ជាតំបន់បេតិកភណ្ឌធម្មជាតិមួយ ស្ថិតក្នុងទឹកដីនៃខេត្តព្រះវិហារ។ តំបន់បេតិកភណ្ឌធម្មជាតិ «ភ្នំត្បែង» ពោរពេញទៅដោយធម្មជាតិស្រស់បំព្រង និងមានទឹកជ្រោះដ៌ត្រជាក់ រួមទាំងទេសភាពចម្ការចេករាប់រយហិកតារបស់ប្រជាពលរដ្ឋនៅតាមដងផ្លូវឆ្ពោះទៅកាន់ភ្នំត្បែង។
«ភ្នំត្បែង» មានកាំជណ្ដើរចំនួន ១៣៤៥កាំ។ ក្រៅជាតំបន់បេតិកភណ្ឌធម្មជាតិ «ភ្នំត្បែង» ក៏ជាតំបន់ទីសក្ការបូជារបស់ប្រជាពលរដ្ឋខ្មែរផងដែរ។ ភ្នំត្បែង ត្រូវបានរដ្ឋាភិបាលកម្ពុជាបង្កើតជាតំបន់បេតិកភណ្ឌធម្មជាតិកាលពីថ្ងៃទី១៣ ខែកញ្ញា ឆ្នាំ២០១៦ តាមរយៈសំណើរបស់រដ្ឋមន្ត្រីក្រសួងបរិស្ថាន។ តំបន់បេតិកភណ្ឌភ្នំត្បែង មានផ្ទៃដីប្រមាណ២ម៉ឺន៥ពាន់ហិកតា ដែលមានភូមិសាស្ត្រជាប់ស្រុកចំនួនបួន គឺស្រុកសង្គមថ្មី ស្រុកគូលែន ស្រុករវៀង និងក្រុងព្រះវិហារ។
ជាមួយគ្នានេះ នៅថ្ងៃទី១០-១២ កក្កដាខាងមុខ ក្រុមយុវជន Cambodia Amazing Trip Planner នឹងរៀបចំជំរំតង់ «ភ្នំត្បែងមានជ័យដែនដីពិសិដ្ឋ» លើកទី៤ ឆ្ពោះទៅភ្នំត្បែង ក្នុងគោលបំណងផ្សព្វផ្សាយ និងឈ្វេងយល់ពីតំបន់ទេសចរណ៍ភ្នំត្បែង នាទឹកដីខេត្តព្រះវិហារ។ តាមរយៈដំណើរកម្សាន្តរយៈពេល ២យប់ ៣ថ្ងៃនេះ Cambodia Amazing Trip Planner នឹងធ្វើដំណើរទៅកាន់ពើងតាំងយូ (អាស្រមលោកតាសួង), ថ្មហួត, ទឹកធ្លាក់ចាក់អង្រែតូច (តាំងយូ), ទឹកធ្លាក់កណ្តុរស, ទឹកធ្លាក់តាម៉ា, ទីសក្ការថ្មបីដុំ, វត្តដំបូកខ្មៅ, ពើងទុកស្រូវ, ពើងនាគខៀវ, អាងត្រាំថ្នាំ, ថ្មបន្តុប, អណ្តូងបុរាណ និងទំនប់ទឹក៩៥ (ជើងភ្នំត្បែង)៕
សូមអញ្ជើញទស្សនារូបភាពផ្ដល់ដោយ Cambodia Amazing Trip Planner ដូចតទៅ៖
