ផលិតផលកសិកម្ម១០មុខប្រមាណ ៤លានតោន ត្រូវបាននាំចេញនៅឆមាសទី១ ឆ្នាំ២០២០
ក្រសួងកសិកម្ម្ រុក្ខាប្រមាញ់ និងនេសាទបានចេញរបាយការណ៍ស្ដីពីបរិមាណនៃការនាំចេញកសិផលកសិកម្មរយៈ ៦ខែ ឆ្នាំ២០២០ មានសរុបប្រមាណ៤លានតោនរួមមានផលិតផលចំនួន ១០មុខ។ នេះបើតាមក្រសួងកសិកម្ម រុក្ខាប្រមាញ់ និងនេសាទ។
តាមរបាយការណ៍ដែលផ្សាយនៅថ្ងៃទី១ ខែកក្កដា ឆ្នាំ២០២០ ផលិតផលកសិកម្មទាំងនោះរួមមាន អង្ករសម្រេចបាន ៣៩៧ ៦៦០ តោន មានកំណើន ៤១,២៥ភាគរយ ដែលធៀបទៅនឹងរយៈ ៦ខែដើមឆ្នាំ២០១៩។ ដំណាំស្រូវសម្រេចបាន ៩៨៣ ៥០៨ តោន ថយចុះ ៥១,៩០ភាគរយ។ គ្រប់ស្វាយចន្ទី ១៩៣ ២១៣ តោន មានកំណើន ១៨,០៣ភាគរយ។
ចេកស្រស់ ១៤០ ៥៦៦ តោន មានកំណើន ១៥០,៤២ភាគរយ។ ដំណាប់ស្វាយ ៤ ២៧៦ តោន មានកំណើន ២២១,៩៦ភាគរយ។ ម្សៅដំឡូងមី ១២ ០០២ តោន បានថយចុះ ៥៣,៩៦ភាគរយ។ ស្វាយស្រស់ ៤៦ ២០០ តោន មានកំណើន ៥៨,១៤ភាគរយ។
ដោយឡែកម្រេច មានចំនួន ២ ៧៩៦ តោន មានកំណើន ១៨,៧៥ភាគរយ។ និង ម្ទេសស្រស់ ៣៥ ៣៧៧ តោន មានកំណើន ១៧៣,០៨ភាគរយ និងម្ទេសក្រៀម ១ ២០០ តោនស្មើនឹងឆ្នាំ ២០១៩។
ផលិតផលកសិកម្មទាំង ១០ខាងលើត្រូវបាននាំចេញទៅកាន់ទីផ្សារបរទេសប្រមាណ ២០ប្រទេសដូចជា វៀតណាម, ជប៉ុន, រុស្សី, ចិន, ហុងកុង, បារាំង, ថៃ,ឥណ្ឌា, ចិន, បែលហ្ស៊ិក,អ៊ីតាលី,កូរ៉េខាងត្បូង សហរដ្ឋអាមេរិក,បេឡារុស,សាធារណរដ្ឋឆេក, នូវែលសេឡង់ ,អូស្ត្រាលី,ហូឡង់,ស្វីស,អង់គ្លេស,និងអាល្លឺម៉ង់។
កាលពីឆ្នាំ២០១៩ កន្លងទៅ កម្ពុជាបាននាំចេញកសិផលទៅកាន់បរទេសប្រមាណ ៣០ប្រទេស បាននាំចេញកសិផលសំខាន់ៗ ប្រមាណជាង ៦លានតោន៕
