អ្នកស្រី ស្រ៊ាត មុំសុភា សង្ឃឹមថាទេសចរក្នុងស្រុក នឹងជួយជំរុញវិស័យទេសចរណ៍ឲ្យងើបឡើងវិញ
ភ្នំពេញ៖ អ្នកស្រី ស្រ៊ាត មុំសុភា បានផ្តល់ក្តីសង្ឃឹមយ៉ាងមុតមាំ ចំពោះភ្ញៀវទេសចរនៅក្នុងស្រុក ថាពួកគាត់នឹងជួយរុញច្រានឲ្យវិស័យទេសចរណ៍រស់រវើក និងងើបឡើងវិញ បន្ទាប់ពីវិបត្តិកូវីដ-១៩ បញ្ចប់ទៅ។ អគ្គនាយិកាក្រុមហ៊ុន សូហ្វីយ៉ា ត្រាវេលអេនធួរ រូបនេះជំរុញឲ្យប្រតិបត្តិទេសចរណ៍ទាំងអស់ ងាកមកសំឡឹងមើលឱកាស ក្នុងវិបត្តិនេះ ហើយចាប់ផ្តើមផ្លាស់ប្តូរកញ្ចប់សេវាកម្មទេសចរណ៍ឲ្យត្រូវនឹងរសជាតិទេសចរក្នុងស្រុកវិញ។
សូមអញ្ជើញទស្សនាបទសម្ភាសខាងក្រោមដូចតទៅ៖
វិស័យទេសចរណ៍កម្ពុជា បានទទួលរងគ្រោះធ្ងន់ធ្ងរ ដោយសារវិបត្តិកូវីដ-១៩ ដែលបន្តអូសបន្លាយ និងញ៉ាំញីប្រទេសនានានៅជុំវិញពិភពលោក រួមទាំងកម្ពុជាផង។ វិបត្តិនេះ បានធ្វើអាជីវកម្មទេសចរណ៍មួយចំនួននៅកម្ពុជាបានប្រកាសបិទទ្វារ មួយចំនួនផ្អាកសកម្មភាពអាជីវកម្ម និងខ្លះនៅបន្តដំណើរការទាំងត្រដាបត្រដួស។
នៅក្នុងបទសម្ភាសជាមួយសារព័ត៌មានThmeythmey25 កាលពីថ្ងៃទី១៨ ខែមិថុនា អ្នកស្រី ស្រ៊ាត មុំសុភា អគ្គនាយិកាក្រុមហ៊ុន សូហ្វីយ៉ា ត្រាវេលអេនធួរ បង្ហាញកង្វល់ថា ក្នុងរយៈពលេ២ទៅ៣ខែទៀត នឹងមានក្រុមហ៊ុនទេសចរណ៍កាន់តែច្រើន ប្រកាសក្ស័យធន បើស្ថានភាពកូវីដ-១៩ នៅតែមិនស្រាកស្រាន្ត។ អ្នកស្រី បញ្ជាក់ដូច្នេះ៖«នៅរយៈពេល២-៣ ខែទៀត ប្រសិនបើស្ថានភាពហ្នឹង(កូវីដ-១៩) មិនមានភាពប្រសើរទេ គឺមានក្រុមហ៊ុនទេសចរណ៍ជាច្រើន នឹងប្រឈមមុខនឹងការបិទទ្វារតែម្តង។ មានន័យថាប្រកាសក្ស័យធនតែម្តង។ ឥឡូវហ្នឹងក្រុមហ៊ុនមួយចំនួនធំហ្នឹង នៅមានលទ្ធភាពនៅឡើយ ក្នុងការបង់ប្រាក់ខែបុគ្គលិកបានខ្លះ អ្នកខ្លះក៏យើងឲ្យគាត់សម្រាកដោយមិនទទួលប្រាក់ខែ ហើយបន្តមានឈ្មោះក្នុងអាជីវកម្ម មានការប្រកាសពន្ធ។ តែបើនៅតែបន្តទៀត ខ្ញុំមើលឃើញថានឹងមានការប្រកាសក្ស័យធន»។
សម្រាប់អ្នកស្រី ស្រ៊ាត មុំសុភា បើទោះជាស្ថានភាពស្ងប់ស្ងាត់វិញនៅក្នុងរយៈពេលឆាប់ៗវិញក៏ដោយ ប៉ុន្តែវិស័យទេសចរណ៍ដែលបានរងគ្រោះផ្ទាល់មុនវិស័យផ្សេងៗនោះ នឹងងើបឡើងវិញក្រោយគេ ឬត្រូវការពេលយូរជាងគេវិញ។ អ្នកស្រីពន្យល់បន្តថា៖« បើអូសបន្លាយយូរ ពេលចប់ទៅវាមានក្រុមហ៊ុនតិចតួចដែលនៅសេសសល់ ក្រុមហ៊ុនភាគច្រើនបោះបង់។ បោះបង់អាចថាក្នុងរយៈពេលហ្នឹង ឬអ្នកខ្លះក៏បោះបង់រហូតទៅ។....។ ការចាប់ផ្តើមដំណើរការវាអាចយឺត ព្រោះយើងត្រូវយល់ថា វិស័យដែលប៉ះពាល់មុនគេ គឺវិស័យទេសចរណ៍ ប៉ុន្តែនៅពេលអ្វីៗត្រឡប់មកធម្មតាវិញ វិស័យទេសចរណ៍ប្រាកដជាងើបក្រោយគេ ព្រោះគេត្រូវការគិតគូរទៅលើរឿងអ្វីផ្សេងៗច្រើន មុននឹងមានកញ្ចប់ថវិកាចំណាយលើការដើរហើរ ឬក៏ការចាយវាយលើការកម្សាន្ត»។
ទោះជាយ៉ាងនេះក្តី អ្នកស្រី ស្រ៊ាត មុំសុភា នៅតែមានសុដ្ឋិនិយមថា ភ្ញៀវទេសចរក្នុងស្រុក នឹងជួយច្រានវិស័យទេសចរណ៍ឲ្យងើបឡើងវិញ។ ទន្ទឹមនឹងនោះ ក្រុមហ៊ុនទេសចរណ៍ ក៏ដូចជាអ្នកពាក់ព័ន្ធក្នុងវិស័យនេះ ខិតខំកែប្រែកញ្ចប់ទេសចរណ៍ ក៏ដូចជាសេវាកម្មឲ្យត្រូវចិត្តទេសចរណ៍ក្នុងស្រុកដែរ។
កន្លងមកក្រសួងទេសចរណ៍ ក៏បានរៀបចំស្ដង់ដាថ្មីក្នុងពេលកម្ពុជាកំពុងជួបវិបត្តិកូវីដ-១៩សម្រាប់អាជីវកម្មទេសចរណ៍ចំនួន៣ រួមមាន៖ សេវាកម្មស្នាក់នៅ ម្ហូបអាហារ និងសេវាកម្មទេសចរណ៍សហគមន៍-រមណីដ្ឋានទេសចរណ៍ផងដែរ ដើម្បីឲ្យវិស័យទេសចរណ៍មានសកម្មភាពឡើងវិញ និងធានានូវសុវត្ថិភាពជូនប្រជាពលរដ្ឋ និងភ្ញៀវទេសចរ។ បើតាមរបាយការណ៍ក្រសួងទេសចរណ៍កម្ពុជា បាត់បង់ទេសចរបរទេសប្រមាណ ៣៨% ពោលគឺធ្លាក់ចុះជាង ៧ សែននាក់ នៅក្នុងត្រីមាសទី១ ឆ្នាំ២០២០៕
