«ត្បូងឃ្មុំ» មិនសូវមានតំបន់ទេសចរណ៍ធម្មជាតិ តែសម្បូរតំបន់ទេសចរណ៍កែច្នៃ
ខេត្តត្បូងឃ្មុំ មានចម្ងាយប្រមាណ ១៧២គីឡូម៉ែត្រពី រាជធានីភ្នំពេញ លាតសន្ធឹងតាមបណ្ដោយទន្លេមេគង្គ ដែលមានព្រំប្រទល់ជាប់ខេត្តកំពង់ចាម, ខេត្តក្រចេះ និងជាប់ប្រទេសវៀតណាម។ ខេត្តត្បូងឃ្មុំ មានសក្ដានុពលទេសចរណ៍ប្រវត្តិសាស្ត្រ ២កន្លែង, កែច្នៃ៤ កន្លែង, តំបន់ទេសចរណ៍បែបធម្មជាតិ ២កន្លែង, សហគមន៍ទេសចរណ៍ ១កន្លែង និងសារមន្ទីរ ១កន្លែង។ នេះបើតាមលោក អឿន រិទ្ធ ប្រធានមន្ទីរទេសចរណ៍ខេត្តត្បូងឃ្មុំ ប្រាប់សារព័ត៌មាន ThmeyThmey 25 តាមទូរសព្ទ។
រមណីយដ្ឋានភូមិអភិវឌ្ឍអន្លង់ជ្រៃ, រមណីយដ្ឋានអូក្តុង, រមណីយដ្ឋានតាសែដូងក្រអូប និងរមណីយដ្ឋានចំការឈូករ័ត្ន ជារមណីយដ្ឋានកែច្នៃ ដែលស្ថិតនៅក្នុងទឹកដីខេត្តត្បូងឃ្មុំ។ លោក អឿន រិទ្ធ ប្រធានមន្ទីរទេសចរណ៍ខេត្តត្បូងឃ្មុំ លើកឡើងថា រមណីយដ្ឋានដែលទាក់ទាញភ្ញៀវទេសចរមកកម្សាន្តច្រើនជាងគេ គឺរមណីយដ្ឋានចំការឈូករ័ត្ន។
ក្រៅពីតំបន់ទេសចរណ៍កែច្នៃ ខេត្តត្បូងឃ្មុំ មានតំបន់ទេសចរណ៍ប្រវត្តិសាស្ត្រចំនួន ២កន្លែង គឺរមណីយដ្ឋានហ្លួងព្រះស្ដេចកន និងប្រាសាទព្រះធាតុបាស្រី។ ចំណែក រមណីយដ្ឋានធម្មជាតិ ដែលជាសក្កានុពលទេសចរណ៍ផងនោះ គឺរមណីយដ្ឋានទឹកធ្លាក់ហោង និងរមណីយដ្ឋានចំការកៅស៊ូ។
សូមបញ្ជាក់ថា ក្នុងឆ្នាំ២០១៩ ខេត្តត្បូងឃ្មុំ ទទួលបានភ្ញៀវទេសចរចំនួន ៣៦៧,៨៨៧នាក់ បើប្រៀបធៀបនឹងឆ្នាំ២០១៨ មានចំនួន ១៨៩,៥៥៦នាក់ មានការកើនឡើងចំនួន ទេសចរជាតិចំនួន ៣២២ ,១២២នាក់ និងភ្ញៀវទេសចរអន្តរជាតិ ៤៥,៧៦៥នាក់៕
រូបភាពផ្ដល់ដោយប្រធានមន្ទីរទេសចរណ៍ ខេត្តត្បូងឃ្មុំ
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com