«ទៀបបារាំង» ងាយស្រួលដាំដុះ និងមានអត្ថប្រយោជន៍ច្រើនសម្រាប់សុខភាព
ភ្នំពេញ៖ ទៀបបារាំង ជាដំណាំហូបផ្លែមួយប្រភេទ ដែលប្រើប្រាស់រយៈពេលដាំដុះខ្លី ឆាប់បានផល និងមានអត្ថប្រយោជន៍ច្រើនសម្រាប់សុខភាព។ ដំណាំទៀបបារាំង អាចដាំដុះបានយ៉ាងងាយស្រួល ព្រោះវាអាចលូតលាស់ ឆ្លាស់ជាមួយនឹងដំណាំផ្សេងទៀតបាន។ ទៀបបារាំង ត្រូវការពន្លឺថ្ងៃតិច និងមានលក្ខណៈសមស្របបំផុតសម្រាប់ដីទួល និងដីឥដ្ឋល្បាយ។
ដំណាំប្រភេទនេះឆាប់ឲ្យផល សំណុំដើមតូច តែមិនធុននឹងទឹកទេ។ វាសមស្របនឹងលក្ខណៈអាកាសធាតុ របស់ប្រទេសកម្ពុជា ព្រោះវាមានលក្ខណៈក្ដៅ ហើយសើម ពិសេសអាចដាំដុះនៅក្នុងតំបន់អាស៊ី និងអាមេរិកខាងត្បូង។ ក្រៅពីភាពងាយស្រួលក្នុងការដាំដុះឆាប់បានផលច្រើន ផ្លែទៀបបារាំងក៏មានគុណសម្បត្តិច្រើនចំពោះសុខភាពផងដែរ។
តាមការស្រាវជ្រាវជាច្រើននៅសហរដ្ឋអាមេរិក ក៏ដូចជាប្រទេសផ្សេងៗទៀត ទៀបបារាំងត្រូវបានកែច្នៃដោយប្រើប្រាស់ស្លឹករបស់វា មកធ្វើជាឱសថសម្រាប់ប្រើប្រាស់ជាថ្នាំសម្រាប់ព្យាបាលជំងឺមហារីកបានយ៉ាងច្រើនមុខ។ នៅក្នុងផ្លែទៀបបារាំង មានសារធាតុជាច្រើនដែលមានប្រយោជន៍សម្រាប់សុខភាពដូចជា៖ Carbohydrate Fruitose ជាតិសរសៃ Fiber Protein Vitamin B1 B2 B3 B6 B9 និងVitamin C ក្នុងកម្រិតខ្ពស់។
មិនត្រឹមតែអាចមានលទ្ធភាពក្នុងការកាត់បន្ថយហានិភ័យ និងជួយព្យាបាលជំងឺមហារីកប៉ុណ្ណោះទេ ប៉ុន្តែថែមទាំងអាចប្រើប្រាស់សម្រាប់ព្យាបាលជំងឺជាច្រើនប្រភេទទៀតផង ដោយសារធាតុនៅក្នុងទៀបបារាំង អាចបង្អាក់នៅការលូតលាស់របស់មហារីក មិនឲ្យការវិវត្តន៍លឿន សារធាតុនៅក្នុងទៀបបារាំង ក៏អាចជួយបង្កើនទឹកដោះស្ត្រីដែលមានបុត្របានល្អ ធ្វើឲ្យស្ងប់អារម្មណ៍ គេងលក់ស្រួល និងអាចបន្សាបអាការៈស្រវឹង។
(សារព័ត៌មានថ្មីៗ២៥រាជធានី-ខេត្ត ដកស្រង់ចេញពីសៀវភៅបច្ចេកទេសដាំដំណាំទៀប របស់ក្រសួងកសិកម្ម រុក្ខាប្រមាញ់ និងនេសាទ)
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com