កសិករវ័យក្មេង គង់ គឹមឆាវ កំពុងកាក់កបជាមួយរបរចិញ្ចឹមកង្កែបលក់នៅខេត្តសៀមរាប
លោក គង់ គឹមឆាវ វ័យ២៦ឆ្នាំ ដែលបានបញ្ចប់មហាវិទ្យាល័យផ្នែកជលផល រស់នៅភូមិអង្គ្រង ឃុំកន្ទ្រាំង ស្រុកប្រាសាទបាគង ខេត្តសៀមរាប អាចទទួលបានប្រាក់ចំណូលជាង ២ម៉ឺនដុល្លារពីរបរចិញ្ចឹមកង្កែបលក់។ នេះបើតាមមន្ទីរព័ត៌មានខេត្តសៀមរាប ដែលបានរាយការណ៍ទៅលោករដ្ឋមន្ត្រី ខៀវ កាញារីទ្ធ។
អត្ថបទរបស់មន្ទីរព័ត៌មានខេត្តសៀមរាប បានរៀបរាប់ថា មុននឹងចាប់ផ្តើមរបរចិញ្ចឹមកង្កែប យុវជន គង់ គឹមឆាវ បានបម្រើការជាបុគ្គលិកលក់ចំណីសត្វក្នុងស្ថាប័នមួយរយៈពេលមួយឆ្នាំ។ ក្រោយពីទទួលបានបទពិសោធន៍ លោកយល់ថាការចិញ្ចឹមកង្កែបឆាប់ទទួលបានផល ដោយប្រើពេលតែ៤៥ថ្ងៃប៉ុណ្ណោះនឹងទទួលបានផល។
បីឆ្នាំហើយដែលលោក គឹមឆាវ បានចាប់យកមុខរបរចិញ្ចឹមកង្កែបយកសាច់ និងកូនលក់។ តម្លៃកង្កែបសាច់ ១គីឡូលក់បាន ៧ ០០០រៀល ចំណែកកូនកង្កែបលក់ ២០០រៀល ៣០០រៀលក្នុងមួយក្បាលទៅតាមទំហំ។ នេះបើតាមលោក គង់ គឹមឆាវ។
បច្ចុប្បន្ន លោក គឹមឆាវ មានអាងចិញ្ចឹមកង្កែបសរុបចំនួន ៣០។ ជាមធ្យមអំឡុងវិបត្តិកូវីដ១៩នេះ លោកអាចរកចំណូលបានជាង ២ពាន់ដុល្លាក្នុងមួយខែ។ លោកបន្តថា ភាពខុសគ្នាមុនវិបត្តិកូវីដ-១៩ លោកលក់កង្កែបសាច់បានច្រើនជាងការលក់កូន ប៉ុន្តែក្នុងអំឡុងវិបត្តិជំងឺនេះ លោកលក់កូនកង្កែប បានច្រើនជាងសាច់ទៅវិញ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com