BeTreed តំបន់អេកូទេសចរណ៍ដ៏ប្លែក ដែលមានផ្ទះលើដើមឈើ ជិះខ្សែរ៉តកាត់ព្រៃ និង សត្វព្រៃជាង១៨០ប្រភេទ
ភ្នំពេញ៖ ដែនជម្រកសត្វព្រៃភ្នំត្នោត-ភ្នំពក មានផ្ទៃដីចំនួន ៤២.០៩៧ហិកតា ស្ថិតក្នុងភូមិសាស្ត្រស្រុកសង្គមថ្មី និងស្រុកគូលែន ខេត្តព្រះវិហារ និងស្រុកជីក្រែង ខេត្តសៀមរាប។ ក្រៅពីជីវចម្រុះ និងធនធានធម្មជាតិដែលមានស្រាប់ ដូចជាភ្នំ,ព្រៃឈើ,ស្ទឹងបឹងបួ និងសត្វព្រៃនោះ BeTreed តំបន់អេកូទេសចរណ៍ដែលស្ថិតក្នុងដែនជម្រកសត្វព្រៃភ្នំត្នោត-ភ្នំពកនេះ ក៏បានក្លាយជាទីទាំងទេសចរណ៍ដ៏ទាក់ទាញដែរ។
លោក បេន ដេវីស ជាអ្នកអភិរក្សធនធានព្រៃឈើ និងសត្វព្រៃ នៅទីនោះ បានកែច្នៃតំបន់មួយផ្នែកនៅក្នុងដែនជម្រកសត្វព្រៃភ្នំត្នោត-ភ្នំពកនេះ ទៅជាតំបន់អេកូទេសចរណ៍ បែបផ្សងព្រេង ឈ្មោះថា BeTreed។ អ្វីដែលប្លែក និងគួរឲ្យទាក់ទាញនេះ មានផ្ទះស្នាក់នៅលើដើមឈើខ្សែរ៉តសម្រាប់ជិះឆ្លងកាត់ព្រៃ, កន្លែងហែលទឹក និងសត្វព្រៃជាង១៨០ប្រភេទ និងផ្លូវដើរគយគន់សម្រស់ព្រៃភ្នំ។
លោក បេន ដេវីស បានប្រាប់មកសារព័ត៌មាន thmeythmey25 តាមទូរសព្ទបន្ថែមថា៖«នៅទីនេះ មានសត្វស្លាបចំនួន ១៦៣ ប្រភេទ និងសត្វជើងបួនចំនួន២៤ប្រភេទ ដូចជាក្ងោក ទោច ស្វា ទន្សោង និងឈ្លូស ជាដើម។ សត្វទាំងអស់នោះ បានមកពីអ្នកភូមិគេយកមកឲ្យ និងខ្លះទៀត មករស់នៅទីនេះ ដោយខ្លួនឯង និងរកចំណីស៊ីដោយខ្លួនឯងផងដែរ»។
លោក បេន បន្តថាលោកបានច្នៃតំបន់អភិរក្សនេះ ជាកន្លែងទេសចរណ៍រយៈពេល៨ឆ្នាំហើយ ពោលគឺចាប់ពីឆ្នាំ ២០១២មកម្ល៉េះ។ រហូតដល់ឆ្នាំ២០១៥ ទើបមានភ្ញៀវទេសចរទៅកម្សាន្តនៅទីនោះ។ នៅឆ្នាំ២០១៩ BeTreed បានទាក់ទាញភ្ញៀវទេសចរជាតិ និងអន្តរជាតិទៅកម្សាន្ត ជាង៦០០នាក់។ នេះបើតាម លោក បេន ដាវីស។
លោក ឈឺន ឈីម ជាអ្នកទេសចរម្នាក់ ដែលបានទៅកម្សាន្តនៅ BeTreed កាលពីពេលថ្មីៗនេះ បានប្រាប់Thmeythmey25 តាមទូរសព្ទថា អ្វីដែលលោក ចាប់អារម្មណ៍ខ្លាំងនៅ BeTreed គឺផ្ទះស្នាក់នៅលើដើមឈើ ខ្ពស់ផុតពីដីដ៏ប្លែកនោះឯង។ លោក ឈឺន ឈីម ដែលជាអ្នកនាំភ្ញៀវឡើងភ្នណឱរ៉ាល់ផងនោះ បញ្ជាក់ដូច្នេះថា៖ «នៅទីនោះ គឺសម្បូរធនធានធម្មជាតិណាស់ សត្វអ្វីក៏មាន គឺច្រើនប្រភេទតែម្ដង។ ហើយអ្វីដែលគួរ ឲ្យចាប់អារម្មណ៍នោះគឺ ផ្ទះស្នាក់ធ្វើពីដើមឈើ វានៅខ្ពស់ផុតពីដីដែលវាពិតជា ប្លែកមែនទែន»៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com