ខេត្តកោះកុង ពឹងផ្អែក​ទាំងស្រុង លើ​វិស័យ​កសិកម្ម និង​សេវាកម្ម​ទេសចរណ៍​

13/06/2020 1:59 pm កោះកុង

​ភ្នំពេញ​៖ វិស័យ​កសិកម្ម សេវាកម្ម បាន​ដើរតួ​យ៉ាងសំខាន់ ក្នុង​ការជំរុញ​សេដ្ឋកិច្ច​ខេត្តកោះកុង​។ ប្រជាជន​ខេត្តកោះកុង ៥៧,៥ ភាគរយ ពឹង​ផ្អែកលើ​វិស័យ​កម្ម ៤២​ភាគរយ ពឹង​លើ​វិស័យ​សេវាកម្ម​និង ០,២​ភាគរយ ពឹង​លើ​វិស័យ​ឧស្សាហកម្ម​។ លោកស្រី មិថុនា ភូ​ថង អភិបាល​នៃ​គណៈ​អភិបាល​ខេត្តកោះកុង​ថ្លែង​ដូច្នេះ នៅក្នុង​សន្និសីទ​សា​ព័ត៌មាន​ស្ដីពី «​វឌ្ឍនភាព និង​ទិសដៅ​ការងារ​បន្ត​របស់​រដ្ឋ​បាល​ខេត្តកោះកុង​»​នៅ​ថ្ងៃទី​១០ ខែមិថុនា ឆ្នាំ​២០២០​។ 

​បើតាម​របាយការណ៍រ​បស់​រដ្ឋបាល​ខេត្តកោះកុង ក្នុងចំណោម​ប្រជាជន ៥៧,៥%​ដែល​ពឹង​លើ​របរ​កសិកម្ម​នោះ​មាន ធ្វើស្រែ​ចម្ការ​,​ដាំ​បន្លែ​, ចិញ្ចឹមសត្វ​, នេសាទ និង​រក​អនុផល​ព្រៃឈើ​។ ក្រៅពី​វិស័យ​កសិកម្ម ខេត្តកោះកុង មាន​សក្ដានុពល​ធម្មជាតិ​ដ៏​សម្បូរបែប ក្នុងការ​ទាក់ទាញ​ភ្ញៀវទេសចរ និង​អ្នកវិនិយោគ ក្នុងនោះ​មាន​តំបន់​វិស្សមកាល តំបន់​អេកូ​ទេសចរណ៍ធម្មជាតិ ព្រៃកោងកាង ទឹកធ្លាក់ តំបន់ឆ្នេរ តំបន់​ផ្កាថ្ម និង​តំបន់​កោះ​មួយចំនួនទៀត​។ ទាំងនេះ សុទ្ធតែ​ចូលរួមចំណែក​ក្នុងការ​លើកស្ទួយ​វិស័យសេដ្ឋកិច្ច​ប្រជាពលរដ្ឋ កាត់បន្ថយ​ភាពក្រីក្រ និង​កាត់បន្ថយ​ការធ្វើ​ចំណាកស្រុក​។ នេះ​ជាការ​បញ្ជាក់​របស់​របា​យ​ការណ៍​ដដែល​។​

​សូមបញ្ជាក់ថា ខេត្តកោះកុង​មាន​ផ្ទៃដី​សរុប ១០.០៤៥,៥៨ គីឡូម៉ែត្រ​ការ៉េ និង​មាន​ចម្ងាយ ២៩០ គីឡូម៉ែត្រ ពី​រាជធានី​ភ្នំពេញ​។ ខេត្ត​នេះ មាន​ព្រំប្រទល់​ខាងកើត​ជាប់​ខេត្តកំពង់ស្ពឺ និង​ខេត្ត​ព្រះសីហនុ ខាងលិច​ជាប់​ឈូង​សមុទ្រ​ថៃ និង​ប្រទេស​ថៃ ខាងជើង​ជាប់​ខេត្តពោធិ៍សាត់ និង​ខាងត្បូង​ជាប់​ឈូង​សមុទ្រ​ថៃ និង​ខេត្ត​ព្រះសីហនុ ៕

ព័ត៌មានទាក់ទង