ដើមឆ្នាំ២០២០ កម្ពុជា រកចំណូលបានជាង១០លានដុល្លារ ថយចុះ១៤ភាគរយ ពីភ្ញៀវចូលទស្សនាអង្គរ
ភ្នំពេញ៖ នៅខែមករា ឆ្នាំ២០២០នេះ គ្រឹះស្ថានអង្គរ រកចំណូលបានជាង១០លានដុល្លារ ពីភ្ញៀវទេសចរ ដែលទិញសំបុត្រចូលទស្សនារមណីយដ្ឋានអង្គរ។ ចំណូលនេះ មានការធ្លាក់ចុះ១៤ភាគរយ បើធៀបនឹងរយៈពេលដូចគ្នា កាលពីឆ្នាំមុន។ នេះបើតាមសេចក្តីប្រកាសព័ត៌មានរបស់គ្រឹះស្ថានអង្គរ ចេញផ្សាយនៅថ្ងៃទី១ កុម្ភៈ។
គ្រឹះស្ថានអង្គរ បានបញ្ជាក់ថា ភ្ញៀវទេសចរបរទេសដែលមកទស្សនាអង្គរនៅខែមករា មានចំនួន២២២,៥៦១នាក់ ដោយថយចុះ ១៧.៨៩ភាគរយ បើប្រៀបធៀបទៅនឹងរយៈពេលដូចគ្នាឆ្នាំ២០១៩។ ដោយឡែកចំណូលពីការលក់សំបុត្រទស្សនារមណីយដ្ឋានអង្គរ ចំនួន ១០,៥៤៧,៣៣២ដុល្លារអាមេរិកនេះ ក៏មានការថយចុះ ១៤.៨១ភាគរយដែរ បើធៀបនឹងខែមករា ឆ្នាំមុន។
បើតាមគ្រឹះស្ថានអង្គរ ទឹកប្រាក់ជាង៤៤៥, ១២២ដុល្លារ ត្រូវបានឧបត្ថម្ភឱ្យមន្ទីរពេទ្យគន្ធបុប្ផា នៅខែមករានេះ។
កម្ពុជា ទទួលបានភ្ញៀវទេសចរបរទេស ចំនួនប្រមាណ ៦.៧លាននាក់ នៅក្នុងឆ្នាំ២០១៩។ តួលេខនេះ កើន៨ភាគរយ បើធៀបនឹងឆ្នាំ២០១៨ ដែលមានចំនួន៦.២ លាននាក់។ក្នុងនោះទេសចរចិន ឈរនៅលេខរៀងទី១ គឺប្រមាណ ២.៥លាននាក់។នេះបើតាមលោក តុប សុភ័គ អ្នកនាំពាក្យក្រសួងទេសចរណ៍។
គួរបញ្ជាក់ថា រមណីយដ្ឋានអង្គររកចំណូលបាន ៩៩,០៨៨,៨៩៤ដុល្លារ ពីភ្ញៀវទេសចរបរទេសជាង២,២លាននាក់ ដែលបានមកទស្សនាតំបន់អង្គរវត្ត នៅឆ្នាំ២០១៩ កន្លងមកនេះ ។ ប្រាក់ចំណូលនេះ ថយចុះ ១៤,៨៥ភាគរយ ធៀបនឹងឆ្នាំ២០១៨។ នេះបើតាមសេចក្ដីប្រកាសព័ត៌មានរបស់គ្រឹះស្ថានអង្គរ ចេញផ្សាយថ្ងៃទី ១មករា ឆ្នាំ២០២០កន្លងមក៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com