ឆ្នាំ២០១៩ កម្ពុជាទទួលបានទេសចរបរទេសជាង ៦.៧លាននាក់ ក្នុងនោះជនជាតិចិន ២.៥លាននាក់
ភ្នំពេញ៖ កម្ពុជា ទទួលបានភ្ញៀវទេសចរបរទេស ចំនួនប្រមាណ ៦.៧លាននាក់ នៅក្នុងឆ្នាំ២០១៩។ តួលេខនេះ កើន៨ភាគរយ បើធៀបនឹងឆ្នាំ២០១៨ ដែលមានចំនួន៦.២ លាននាក់។ នេះបើតាមលោក តុប សុភ័ក អ្នកនាំពាក្យក្រសួងទេសចរណ៍ដែលបានប្រាប់សារព័ត៌មានថ្មីៗតាមបណ្តាញតេឡេក្រាម។
អ្នកនាំពាក្យក្រសួងទេសចរណ៍ដដែល បញ្ជាក់ទៀតថា ក្នុងចំណោមភ្ញៀវទេសចរអន្តរជាតិនោះ ទេសចរចិន ឈរនៅលេខរៀងទី១ គឺប្រមាណ ២.៥លាននាក់។ ដ្បិតតែស្ថិតនៅលំដាប់ទី១មែន តែចំនួនទេសចរចិនមកកម្ពុជាក្នុងឆ្នាំ២០១៩ ថយចុះប្រមាណ១០ម៉ឺននាក់ ធៀបនឹងឆ្នាំ២០១៨។
បើទោះបីភ្ញៀវទេសចរអន្តរជាតិទូទាំងប្រទេសកើនឡើង៨ភាគរយ ប៉ុន្តែខេត្តសៀមរាប ដែលជាគោលដៅទេសចរណ៍ទី១នៅកម្ពុជា ចំនួនទេសចរបរទេសបានថយចុះជាង១០ភាគរយ ក្នុងឆ្នាំ២០១៩។ ការថយចុះនេះ ត្រូវបានលោក តុប សុភ័ក ពន្យល់ថាដោយសារកត្តារៀបចំខាងក្នុងរបស់ខេត្ត និងកត្តាខាងក្រៅប្រទេស គឺជម្លោះពាណិជ្ជកម្មរវាងចិន អាមេរិក ធ្វើឲ្យប៉ះពាល់មួយផ្នែក ដល់ដំណើរទេសចរណ៍របស់ជនជាតិចិន។
លោក តុប សុភ័ក បន្ថែមថា ខេត្តសៀមរាបថយចុះភ្ញៀវទេសចរ ប៉ុន្តែតំបន់គោលដៅផ្សេងទៀត ដូចជាកែប កំពត កោះកុង ព្រះសីហនុ និងភូមិភាគឦសាន្ត គឺមានចំនួនភ្ញៀវទេសចរអន្តរជាតិកើនឡើង៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com