ទូតអាមេរិក ប្រាប់កសិករនៅកំពង់ធំពីការរួមចំណែករបស់អាមេរិកលើវិស័យកសិកម្មកម្ពុជា
កំពង់ធំ៖ លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា រីករាយនិងលើកទឹកចិត្តដល់កសិករខ្មែរគ្រប់រូបឱ្យធ្វើជាគំរូល្អដល់អ្នកដទៃក្នុងការអនុវត្តការងារកសិកម្ម ដើម្បីចូលរួមចំណែកអភិវឌ្ឍសេដ្ឋកិច្ច។ ក្នុងដំណើរទស្សនកិច្ចសួនបន្លែសុវត្ថិភាព ផលិតកម្មកែច្នៃគ្រាប់ស្វាយចន្ទី និងឡជីវឧស្ម័ន នៅខេត្តកំពង់ធំ កាលពីថ្ងៃទី៣០មករា ឆ្នាំ២០២០ ឯកអគ្គរដ្ឋទូតរូបនេះ បានលើកឡើងថា អាមេរិកនឹងបន្តជួយជំរុញ និងបំពេញចន្លោះខ្វះខាតកសិករឱ្យឈានដល់ភាពជោគជ័យក្នុងវិស័យកសិកម្ម តាមរយៈគម្រោងអភិវឌ្ឍនានា។
លោក W. Patrick Murphy បានបន្តថាផ្នែកកសិកម្មគឺមានសារសំខាន់សម្រាប់សេដ្ឋកិច្ចកម្ពុជា ហើយអាមេរិក មានមោទកភាពយ៉ាងខ្លាំងក្នុងការជួយទៅដល់ការងារផ្នែកកសិកម្មនេះ ដើម្បីជំរុញសេដ្ឋកិច្ច ជំរុញឱ្យមានការងារធ្វើច្រើន និងជំរុញឱ្យប្រជាពលរដ្ឋមានស្បៀងអាហារគ្រប់គ្រាន់ជានិច្ច។
លោកបានបញ្ជាក់ដូច្នេះ អាមេរិកគឺជាដៃគូគួរឱ្យទុកចិត្តរបស់កម្ពុជា ហើយកន្លងមកអាមេរិកបានជួយដល់កសិករច្រើនតាមរយៈគម្រោងនានា ដូចជាគម្រោងកម្ពុជាហាវែស II (Cambodia Harvest II) ដែលទទួលបានជំនួយពីពលរដ្ឋអាមេរិក (USAID) ដើម្បីឱ្យកសិករទាំងអស់ក្លាយជាគំរូដល់អ្នកទៃ និងក្លាយជាសហគ្រិនផ្នែកកសិកម្ម ក្នុងការបង្កើតការងារជាច្រើនដល់ពលរដ្ឋក្នុងតំបន់ ពិសេសផ្តល់ការងារដល់ស្ត្រី ដើម្បីលើកកម្ពស់ជីវភាពស់នៅ ផងដែរ។
ខេត្តកំពង់ធំ ជាខេត្តមួយដែលស្ថិតក្នុងតំបន់ប្រតិបត្តិការនៃគម្រោងហាវែស II រួមជាមួយពោធិ៍សាត់ បាត់ដំបង និងសៀមរាប។
បើតាមអគ្គរដ្ឋទូតរូបនេះ ក្នុងរយៈពេល៧០ឆ្នាំនៃទំនាក់ទំនងអាមេរិកជាមួយកម្ពុជាមកនេះ អាមេរិកបានផ្តល់ជំនួយដល់កម្ពុជាក្នុងកសិកម្ម ជិត២,០០០លានដុល្លារ តាមរយៈ USAID ក្រសួងកសិកម្ម និងក្រសួងពាណិជ្ជកម្ម ជាដើម៕
លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា ។
