បុរសចិនដែលឆ្លងកូរ៉ូណា និយាយតាមវីដេអូ ដោយទឹកមុខរីករាយ ហើយមើលទៅមានសភាពធម្មតា
បុរសជនជាតិ ដែលកម្ពុជារកឃើញថា បានឆ្លងមេរោគកូរ៉ូណាប្រភេទថ្មី បាននិយាយតាមវីដេអូ (Video Call) ជាមួយនឹងមនុស្សមួយក្រុមនៅក្នុងបន្ទប់ ដោយមានជនជាតិចិនជាស្ត្រីម្នាក់ផងដែរ។
តាមរយៈការសន្ទនាគ្នាតាមវីដេអូ បុរសជាជនជាតិនោះ និយាយដោយរីករាយ ហើយសុខភាពរបស់គាត់ មើលទៅហាក់មានសភាពធម្មតា។ បុរសជនជាតិខ្មែរម្នាក់ ដែលស្ថិតក្នុងការសន្ទនាជាមួយបុរសជនជាតិនោះដែរ បានបកប្រែថា៖« គាត់ ថា ធ្វើចិត្តឲ្យសប្បាយ»។
សារព័ត៌មានថ្មីៗ មិនអាចសុំការបញ្ជាក់បន្ថែមពីលោក លី សូវ៉ាន់ អ្នកនាំពាក្យក្រសួងសុខាភិបាលបានទេ អំពីស្ថានភាពជំងឺរបស់បុរសជនជាតិចិននោះ ដោយលោក ប្រាប់ថា កំពុងជាប់ប្រជុំ។ យ៉ាងណា លោក ធ្លាប់ផ្តល់ព័ត៌មានកាលពីពេលថ្មីៗនេះថា បុរសជនជាតិចិននោះ ស្ទើរតែជាសះស្បើយទៅហើយ។ លោក ថែមទាំងហ៊ានអះអាងទៀតថា កម្ពុជា អាចព្យាបាលបុរសជនជាតិចិននោះ ឲ្យជាសះស្បើយ១០០ភាគរយ។
គាត់ឈ្មោះ ចា ជិនហួ អាយុ៦០ឆ្នាំ បានធ្វើដំណើរជាមួយសមាជិកគ្រូសារ៣នាក់ទៀត ពីទីក្រុងវូហាន មកដល់ខេត្តព្រះសីហនុ កាលពីថ្ងៃទី២៣ ខែមករា ឆ្នាំ២០២០។ គ្រូសាររបស់គាត់ មិនបានឆ្លងមេរោគកូរ៉ូណាឡើយ។ គាត់ ត្រូវបានក្រុមគ្រូពេទ្យ ដាក់ឲ្យស្ថិតក្នុងបន្ទប់ព្យាបាលដាច់ដោយឡែកពីគេ នៅមន្ទីរពេទ្យបង្អែកខេត្តព្រះសីហនុ។
តំបន់ដែលមេរោគកូរ៉ូណាប្រភេទថ្មី បានរាលដាល់ទៅដល់ មាន ហុងកុង ម៉ាកាវ និង តៃវ៉ាន់ រួមទាំងបណ្តាប្រទេសនានា ដូចជា ថៃ វៀតណាម ម៉ាឡេស៊ី សិង្ហបុរី កម្ពុជា ជប៉ុន អាមេរិក អូស្ត្រាលី កូរ៉េខាងត្បូង កាណាដា បារាំង និង ណេប៉ាល់ ជាដើម។ មេរោគកូរ៉ូណាប្រភេទថ្មីនេះ បង្កទៅជាជំងឺរលាកសួត ហើយមកដល់ពេលនេះ គេ មិនទាន់រកឃើញវ៉ាក់សាំងការពារនោះទេ។
គិតមកដល់ព្រឹកថ្ងៃទី៣១ ខែមករា ឆ្នាំ២០២០ អ្នកស្លាប់ដោយសារមេរោគកូរ៉ូណាប្រភេទថ្មី បានកើនឡើងដល់ជាង២០០នាក់ហើយ ខណៈអ្នកផ្ទុកមេរោគនេះ បានកើនឡើងដល់ជិត១ម៉ឺនាក់ នៅក្នុងប្រទេសចិន។ ក្រៅពីប្រទេសចិន មិនមានអ្នកស្លាប់ដោយសារមេរោគនេះឡើយ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com