នាយករដ្ឋមន្ត្រី៖ គ្មានការជម្លៀសខ្មែរចេញពីចិនទេ, យើងទុកនៅទីនោះ រួមសុខទុក្ខជាមួយគ្នា
សម្តេចនាយករដ្ឋមន្ត្រី ហ៊ុន សែន ប្រកាសថា កម្ពុជា មិនជម្លៀសនិស្សិតឬមន្ត្រីទូតខ្មែរចេញពីចិនឡើយ។ សម្តេច ហាក់ចង់បង្ហាញសមានចិត្តថា កម្ពុជា មិនត្រូវបោះបង់ចិន ក្នុងគ្រាដែលចិន ជាមិត្តដែកថែមរបស់កម្ពុជា ជួបទុក្ខលំបាកនោះទេ។
ក្នុងសន្និសីទសារព័ត៌មានស្តីពីស្ថានភាពមេរោគកូរ៉ូណាប្រភេទថ្មី នៅវិមានសន្តិភាពនាព្រឹកថ្ងៃទី៣០ ខែមករា ឆ្នាំ២០២០ សម្តេចនាយករដ្ឋមន្ត្រី ថ្លែងថា៖«អត់មានតម្រូវការនៃការជម្លៀសនិស្សិតខ្មែរ អ្នកការទូតខ្មែរ កុងស៊ុលខ្មែរ នៅតាមបណ្តាទីកន្លែងនានា មកកាន់កម្ពុជាទេ ដោយយើងទុកនៅទីនោះ ដែលជាការរួមសុខរួមទុក្ខជាមួយគ្នា ក្នុងការដោះស្រាយបញ្ហានេះបញ្ហានោះ»។
ជាមួយគ្នានេះ សម្តេចនាយករដ្ឋមន្ត្រី បានអំពាវនាវ ឲ្យប្រជាពលរដ្ឋខ្មែរ រួមសាមគ្គីជាមួយខ្មែរគ្នាឯង និងចូលរួមសាមគ្គីជាមួយប្រជាជនចិន ក៏ដូចជាប្រជាជននៃបណ្តាប្រទេសនានា រួមទាំងអង្គការសុខភាពពិភពលោក ដើម្បីដោះស្រាយបញ្ហាទាក់ទងនឹងមេរោគកូរ៉ូណាប្រភេទថ្មី។
ចំពោះនិស្សិតខ្មែរ សម្តេចនាយករដ្ឋមន្ត្រី យល់ថា បើជម្លៀសពួកគេ ចេញពីចិននាពេលនេះ ដោយខ្លាចឆ្លងមេរោគកូរ៉ូណាប្រភេទថ្មី ដូច្នេះលើកក្រោយ កម្ពុជា មិនចាំបាច់សុំអាហារូបករណ៍ពីចិនទៀតនោះទេ ដោយសម្តេច សន្និដ្ឋានថា ចិនច្បាស់ជាមិនផ្តល់ឲ្យឡើយ។ សម្តេច បញ្ជាក់ថា៖«ខ្ញុំ មិនដឹងថា ចិនគាត់គិតយ៉ាងម៉េចទេ ក៏ប៉ុន្តែសម្រាប់ខ្ញុំ បើខ្ញុំជាចិន ខ្ញុំអត់ឲ្យអ្នកឯងទៀតទេ។ ពេលស្រួលអ្នកឯងមករកខ្ញុំ ពេលលំបាកអ្នកឯករត់ចោលខ្ញុំ...»។
ប្រមុខរដ្ឋាភិបាលកម្ពុជា ចាត់ទុក ការស្នើសុំឲ្យជម្លៀសនិស្សិតខ្មែរ ចេញពីចិន មកកម្ពុជាវិញ ថាជាវិធានការ ដែលឈានទៅដល់ការបញ្ចប់ការសិក្សារបស់ពួកគេ នៅប្រទេសចិនតែម្តង។ ប្រមុខរដ្ឋាភិបាលកម្ពុជា អះអាងថា រដ្ឋាភិបាលចិន មានការទទួលខុសត្រូវ ក្នុងការមើលថែនិស្សិតខ្មែរ។
ប្រមុខរដ្ឋាភិបាលកម្ពុជា ចាត់ទុក ការស្នើសុំឲ្យជម្លៀសនិស្សិតខ្មែរ ចេញពីចិន មកកម្ពុជាវិញ ថាជាវិធានការ ដែលឈានទៅដល់ការបញ្ចប់ការសិក្សារបស់ពួកគេ នៅប្រទេសចិនតែម្តង។ ប្រមុខរដ្ឋាភិបាលកម្ពុជា អះអាងថា រដ្ឋាភិបាលចិន មានការទទួលខុសត្រូវ ក្នុងការមើលថែនិស្សិតខ្មែរ។
លើសពីនេះ មេដឹកនាំកម្ពុជា ប្រកាសថា កម្ពុជា ក៏មិនបិទជើងហោះហើរពីចិនដែរ។ មេដឹកនាំរូបនេះ សង្កត់ធ្ងន់ថា ការបិទជើងហោះហើរទាំងមូលពីចិន គឺជាការជាសម្លាប់សេដ្ឋកិច្ចកម្ពុជាខ្លួនឯង។
រដ្ឋាភិបាលបរទេសមួយចំនួន ដូចជា អាមេរិក ជប៉ុន និង សិង្ហបុរី បានជម្លៀសប្រជាជនខ្លួន ចេញទីក្រុងវូហាន ខណៈមានរដ្ឋាភិបាលបរទេសផ្សេងទៀត ក៏មានគម្រោងជម្លៀសផងដែរ។ ប្រទេសខ្លះ ដូចជា អង់គ្លេស ឥណ្ឌូណេស៊ី និង រុស្ស៊ី បានផ្អាកការហោះហើរពីចិន ហើយប្រទេសខ្លះទៀត កាត់បន្ថយការហោះហើរពីចិន។
មានការលើកឡើងលើបណ្តាញសង្គមថា រដ្ឋាភិបាលកម្ពុជា គួរតែជម្លៀសនិស្សិតនិងពលរដ្ឋខ្មែរចេញពីចិន ជាពិសេពីទីក្រុងវូហាន ដោយខ្លាចពួកគេ ឆ្លងមេរោគកូរ៉ូណាប្រភេទថ្មី។ ម្យ៉ាងទៀត ប្រជាពលរដ្ឋខ្លះ ក៏ចង់ឲ្យរដ្ឋាភិបាលកម្ពុជា បិទជើងហោះហើរពីចិនផងដែរ។
មានការលើកឡើងលើបណ្តាញសង្គមថា រដ្ឋាភិបាលកម្ពុជា គួរតែជម្លៀសនិស្សិតនិងពលរដ្ឋខ្មែរចេញពីចិន ជាពិសេពីទីក្រុងវូហាន ដោយខ្លាចពួកគេ ឆ្លងមេរោគកូរ៉ូណាប្រភេទថ្មី។ ម្យ៉ាងទៀត ប្រជាពលរដ្ឋខ្លះ ក៏ចង់ឲ្យរដ្ឋាភិបាលកម្ពុជា បិទជើងហោះហើរពីចិនផងដែរ។
មាននិស្សិតខ្មែរជាង២០នាក់ ដែលកំពុងសិក្សានៅទីក្រុងវូហាន ខេត្តហ៊ូប៉ី ដែលជាកន្លែងផ្ទុះមេរោគកូរ៉ូណាប្រភេទថ្មីនេះ។ សារព័ត៌មានក្នុងស្រុក បានសម្ភាសនិស្សិតខ្មែរចំនួន ដែលកំពុងរៀននៅវូហាន ដោយពួកគេ អះអាងថា មិនបានឆ្លងមេរោគកូរ៉ូណានោះទេ។
ថ្មីៗនេះ និស្សិតខ្មែរប្រមាណ៣០នាក់ ដែលរៀននៅចិន បានមកដល់កម្ពុជា។ ប៉ុន្តែ ពួកគេ ជានិស្សិត រៀននៅសាកលវិទ្យាល័យហឺហ្វី ខេត្តអានហួយ មិនមែនជានិស្សិត រៀននៅទីក្រុងវូហានឡើយ។ មន្ត្រី អះអាងថា ពួកគេ មានការនឹករលឹកគ្រូសារ ទើបមកលេងស្រុកកំណើតមួយរយៈ ក្នុងពេលវិស្សមកាល។
ដោយខ្លាចសិស្ស-និស្សិតឆ្លងមេរោគកូរ៉ូណាប្រភេទថ្មី រដ្ឋាភិបាលចិន បានបិទគ្រឹះស្ថានអប់រំទាំងអស់មួយរយៈសិន។ តែចាប់ពីថ្ងៃទី១០ ខែកុម្ភៈ ឆ្នាំ២០២០ទៅ រដ្ឋាភិបាលចិន នឹងបើកបង្រៀនតាមអនឡាញសម្រាប់សិស្សថ្នាក់បឋមសិក្សា និងមធ្យមសិក្សា នៅទីក្រុងវូហាន។
រដ្ឋាភិបាលចិន បានបិទគ្រប់ច្រក មិនឲ្យប្រជាជនចិន ចេញពីទីក្រុងវូហាននោះទេ ដោយខ្លាចឆ្លងមេរោគកូរ៉ូណាប្រភេទថ្មី ទៅប្រជាជននៅតំបន់ដទៃ និងប្រជាជននៃប្រទេសផ្សេងៗ។
តំបន់ដែលមេរោគកូរ៉ូណាប្រភេទថ្មី បានរាលដាល់ទៅដល់ មាន ហុងកុង ម៉ាកាវ និង តៃវ៉ាន់ រួមទាំងបណ្តាប្រទេសនានា ដូចជា ថៃ វៀតណាម ម៉ាឡេស៊ី សិង្ហបុរី កម្ពុជា ជប៉ុន អាមេរិក អូស្ត្រាលី កូរ៉េខាងត្បូង កាណាដា បារាំង និង ណេប៉ាល់ ជាដើម។ មេរោគកូរ៉ូណាប្រភេទថ្មីនេះ បង្កទៅជាជំងឺរលាកសួត ហើយមកដល់ពេលនេះ គេ មិនទាន់រកឃើញវ៉ាក់សាំងការពារនោះទេ។
គិតមកដល់ព្រឹកថ្ងៃទី៣០ ខែមករា ឆ្នាំ២០២០ អ្នកស្លាប់ដោយសារមេរោគកូរ៉ូណាប្រភេទថ្មី បានកើនឡើងដល់១៧០នាក់ហើយ ខណៈអ្នកផ្ទុកមេរោគនេះ បានកើនឡើងដល់ជាង៧ពាន់នាក់ នៅក្នុងប្រទេសចិន។ ក្រៅពីប្រទេសចិន មិនមានអ្នកស្លាប់ដោយសារមេរោគនេះឡើយ៕
គិតមកដល់ព្រឹកថ្ងៃទី៣០ ខែមករា ឆ្នាំ២០២០ អ្នកស្លាប់ដោយសារមេរោគកូរ៉ូណាប្រភេទថ្មី បានកើនឡើងដល់១៧០នាក់ហើយ ខណៈអ្នកផ្ទុកមេរោគនេះ បានកើនឡើងដល់ជាង៧ពាន់នាក់ នៅក្នុងប្រទេសចិន។ ក្រៅពីប្រទេសចិន មិនមានអ្នកស្លាប់ដោយសារមេរោគនេះឡើយ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com