ស្នងការនគរបាលរាជធានី-ខេត្ត ត្រៀមកម្លាំងរក្សាសន្តិសុខពេលឆ្នាំចិន
ភ្នំពេញ៖ ស្នងការនគរបាលរាជធានីភ្នំពេញ និងបណ្តាខេត្តឯទៀតបានត្រៀមកម្លាំងប៉ូលិស ដើម្បីរក្សាសន្តិសុខសណ្តាប់ធ្នាប់ ជូនប្រជាពលរដ្ឋ និងភ្ញៀវទេសចរ ក្នុងឱកាសពិធីបុណ្យចូលឆ្នាំចិនខាងមុននេះ។ ក្រៅពីនេះ ស្នងការទាំងនោះ ក៏មានចាត់វិធានការ ការពារ និងទប់ស្កាត់បទល្មើសផ្សេងៗ ផងដែរ។
ក្នុងរយៈពេលនៃពិធីបុណ្យចូលឆ្នាំចិននេះ ស្នងការរាជធានីភ្នំពេញ នឹងជួយសម្រួលចរាចរណ៍ធ្វើយ៉ាងណាកុំឱ្យមានការកកស្ទះនៅតាមគោលដៅសំខាន់ៗ ដូចជាច្រកចេញ-ចូលក្រុង កន្លែងកំសាន្ត និងទីផ្សារនានា។ ជាមួយគ្នានេះ ក៏មានប៉ូលិសត្រៀមបង្ការ និងទប់ស្កាត់អគ្គិភ័យដែលអាចកើតឡើងជាយថាហេតុ ព្រមទាំងបង្កើនការល្បាតត្រួតពិនិត្យតាមបណ្តាភូមិសាស្ត្រនៅតាមប៉ុស្តិ៍នីមួយៗ។ នេះបើតាមស្នងការនគរបាលរាជធានីភ្នំពេញ។
ក្រៅពីមានកងកម្លាំងរក្សាសន្តិសុខ និងសណ្តាប់ធ្នាប់សាធារណៈហើយនោះ ស្នងការនគរបាលខេត្តបាត់ដំបង បានណែនាំអាជីវករលក់ដូរក្នុងផ្សារនានារបស់ខ្លួនកុំឱ្យលក់ផាវ ក្នុងឱកាសបុណ្យចូលឆ្នាំចិនខាងមុខនេះ ផងដែរ។ ទន្ទឹមនឹងគ្នានេះ ស្នងការនគរបាលខេត្តកំពង់ស្ពឺ ក៏បានបង្កើនការយកចិត្តដាក់របស់ខ្លួនក្នុងការធានានូវសន្តិសុខសណ្តាប់ធ្នាប់ និងសុវត្ថិភាពសង្គម ឱ្យកាន់តែល្អប្រសើរផងដែរ។ បុណ្យចូលចិន កងកម្លាំងខេត្តកំពង់ស្ពឺ ក្រៅពីជួយសម្រួលការកកស្ទះ និងបន្តឹងការអនុវត្តច្បាប់ចរាចរណ៍ ដើម្បីជៀសវាងគ្រោះថ្នាក់ចរាចរណ៍ និងមានប៉ូលិសប្រចាំការនៅតាមទីអារ៉ាម ព្រះវិហារចិន វៀតណាម កូរ៉េ ក៏ដូចជាទីសក្ការៈ និងរមណីយដ្ឋានមួយចំនួនដែលប្រារព្ធពិធីបុណ្យប្រពៃណីចិននេះ ផងដែរ។
រីឯ ស្នងការនគរបាលខេត្តព្រះសីហនុវិញ ក៏បានត្រៀមសមត្ថកិច្ច ដើម្បីទប់ស្កាត់បទល្មើស និងរក្សាសន្តិសុខជូនពលរដ្ឋគ្រប់កន្លែងក្នុងរយៈពេល៣ថ្ងៃនៃពិធីប្រារព្ធបុណ្យចូលឆ្នាំចិននេះ ផងដែរ។ ពិសេស នៅទីរួមខេត្ត នៅតាមឆ្នេរសមុទ្រនានា ផ្ទះសំណាក់ សណ្ឋាគារ និងភោជ្ជនីយដ្ឋាន ជាដើម។
លើសពីនេះ ស្នងការដ្ឋានគរបាលខេត្តព្រះសីហនុ បានត្រៀមទាំងមធ្យោបាយ និងសម្ភារចំនួន ដើម្បីបម្រើដល់ពលរដ្ឋ គ្រប់ពេលវេលា។ បើមានបញ្ហាអ្វីពលរដ្ឋអាចទំនាក់ទំនងទៅលេខស្នងការដ្ឋាន 097 7 780 008/ 031 3 749 848 /011 506 677/011 516 677 និង 011 526 677។ ក្រុងព្រះសីហនុ 097 7780 093
ស្រុកព្រៃនប់ 097 7780 094
ស្រុកស្ទឹងហាវ 097 7 780 095 និង
ស្រុកកំពង់សីលា 097 7 780 096។
សម្រាបជម្រាបថា ពិធីបុណ្យចូលឆ្នាំចិន នឹងប្រារព្ធឡើងចាប់ពីថ្ងៃទី២៤ ដល់ ២៧ មករា ឆ្នាំ២០២០៕
