អតីតបុគ្គលិកសណ្ឋាគារ The Great Duke ជាង១០០នាក់ បន្តធ្វើកូដកម្មទាមទារប្រាក់ឈ្នួល
ភ្នំពេញ៖ អតីតបុគ្គលិកសណ្ឋាគារ The Great Duke ជាង១០០នាក់ បន្តធ្វើកូដកម្មជាថ្មីនៅព្រឹកថ្ងៃទី២០ មករានេះ ដើម្បីទាមទារឲ្យម្ចាស់សណ្ឋាគារ ទូទាត់ប្រាក់ឈ្នួល ឲ្យបានត្រឹមត្រូវ ខណៈដែលគ្រួសាររបស់ពួកគេកំពុងជួបបញ្ហាជីវភាព។ នេះជាលើកទី៤ហើយ ដែលអតីតបុគ្គលិកសណ្ឋាគារ The Great Duke នេះ បានតវ៉ាឲ្យដោះស្រាយបញ្ហាប្រាក់ឈ្នួលពួកគេ។
លោក ទូច កុសល ប្រធានសហជីពនៃអតីតបុគ្គលិកសណ្ឋាគារ The Great Duke បានប្រាក់សារព័ត៌មានថ្មីៗតាមទូរស័ព្ទថា បុគ្គលិកដែលធ្វើកូដកម្មនេះ គឺទាមទារទូទាត់ប្រាក់បំណាច់អតីតភាពឆ្នាំចាស់ ប្រាក់សងជំងឺចិត្ត ប្រាក់ឈ្នួលចុងក្រោយ ប្រាក់បំណាច់អតីតភាព៦ខែចុងក្រោយ រួមទាំងទូទាត់ការឈប់សម្រាក់ប្រចាំឆ្នាំ ដែលនៅសល់និងទូទាត់ជាប្រាក់ ។
លោក ទូច កុសល បាននិយាយថា ខាងការិយាល័យមេធាវី HBS និងភាគីបុគ្គលិក បានជួបគ្នាដោះស្រាយបញ្ហាចំនួន២លើកមកហើយ គឺនៅចុងឆ្នាំ២០១៩ និងនៅដើមខែមករា ឆ្នាំ២០២០ ប៉ុន្តែគ្មានដំណោះស្រាយឡើយ ដោយសារភាគីខាងសណ្ឋាគារ មិនយល់ព្រមតាមសំណើររបស់អតីតបុគ្គលិកខាងលើ ហើយក៏គ្មានការជូនដំណឹងថ្មីដែរ ទើបធ្វើឲ្យពួកគេ ចេញតវ៉ាជាថ្មីនេះ។
«ចំណុចដែលភាគីសណ្ឋាគារ និងអតីតបុគ្គលិកមិនយល់ស្របគ្នា គឺខាងសណ្ឋាគារមិនព្រមបើកប្រាក់អតីភាពការងារ ប្រាក់សំណងជំងឺចិត្ត និងប្រាក់បន្ទាប់បន្សំផ្សេងឡើយ គឺផ្ដល់តែប្រាក់ឈ្នួលគោលនៃឆ្នាំ២០១៨ដល់២០១៩»។ នេះបើតាមលោក ទូច កុសល ដោយបញ្ជាក់បន្ថែមថា ភាគីសណ្ឋាគារផ្ដល់ប្រាក់ឈ្នួលចុងក្រោយ ក្នុងលក្ខណៈបង់រំលស់ជា៣ដំណាក់កាល គឺលើកទី១ នៅថ្ងៃទី១ ខែកុម្ភៈ ហើយលើកទី២ នៅថ្ងៃ៦ ខែមីនា និងលើកទី៣ នៅថ្ងៃទី៦ ខែមេសា ឆ្នាំ២០២០។
ដោយឡែកប្រាក់សំណងជំងឺចិត្តវិញ ភាគីសណ្ឋាគារមិនព្រមបើកឲ្យនោះទេ ដោយសំអាងលើហេតុផលថា សណ្ឋាគារក្ស័យធន់ គ្មានលទ្ធភាពផ្ដល់ឲ្យបុគ្គលិក។
លោក កុសល និងក្រុមអតីតបុគ្គលិក នឹងទៅក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំអន្តរាគមន៍លើបញ្ហានេះ ។ បើតាមលោក កុសល អតីតបគ្គលិកទាំងនេះ នឹងបន្តតវ៉ាទៀត ប្រសិនបើគ្មានដំណោះស្រាយពីខាងភាគីសណ្ឋាគារ។
សូមបញ្ជាក់ថា សណ្ឋាគារ ដឺ ហ្គ្រេតឌ្យូក ស្ថិតតាមបណ្ដោយផ្លូវមុនីរ៉េត និងតាមបណ្ដោយផ្លូវម៉ៅសេទុង ក្បែរភ្លើងស្តុបផ្សារដើមគ ជាអតីតសណ្ឋាគារ Intercontinental ។ សណ្ឋាគារនេះ បានប្ដូរឈ្មោះ The Great Duke នៅថ្ងៃទី១ មករា ឆ្នាំ២០១៨ ក្រោយពេលបានផ្លាស់ប្ដូរថៅកែ។ ប៉ុន្តែបុគ្គលិកសណ្ឋាគារនេះភាគច្រើន មានអតីតភាពការងារយូរឆ្នាំ តាំងពីនៅជាសណ្ឋាគារ Intercontinental មកម្ល៉េះ៕
relate
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com