ផ្ទះជាង១០០ខ្នងក្នុងដីសម្បទានសង្គមកិច្ច ត្រូវបានផ្តល់ឲ្យអតីតយុទ្ធជននៅបន្ទាយមានជ័យ
ភ្នំពេញ៖ ផ្ទះចំនួន១០៣ខ្នង បានប្រគល់ជូនទៅអតីតយុទ្ធជន និងបានដាក់ឲ្យប្រើប្រាស់ផ្លូវលំ ១ខ្សែ ដែលមានប្រវែង ៤៥០០ម៉ែត្រ រួមទាំងបានបញ្ចុះបឋមសិលាសាងសង់អគារសិក្សា ចំនួន១ខ្នង មាន៦បន្ទប់ នៅដីសម្បទានសង្គមកិច្ចការ៉េ២នៅខេត្តបន្ទាយមានជ័យ។ នេះបើតាមរដ្ឋបាលខេត្តបន្ទាយមានជ័យ។
នៅថ្ងៃទី១១ ខែមករា ឆ្នាំ២០២០ លោកឧបនាយករដ្ឋមន្ត្រី កែ គឹមយ៉ាន បានប្រគល់ផ្ទះចំនួន១០៣ខ្នង ជូនទៅអតីតយុទ្ធជន និងបានដាក់ឲ្យប្រើប្រាស់ផ្លូវលំ១ខ្សែ ដែលមានប្រវែងជាង៤ពាន់ម៉ែត្រ។
ជាមួយគ្នានោះ ក៏មានការបញ្ចុះបឋមសិលាសាងសង់អគារសិក្សាចំនួន ១ខ្នង ដែលមានចំនួន៦បន្ទប់ នៅលើទីតាំងដីសម្បទានសង្គមកិច្ច ការ៉េ២ក្នុងភូមិកូនខ្លែង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។
នេះជាលើកទី២ហើយដែលអតីតយុទ្ធជន ទទួលបានលំនៅដ្ឋាន ដោយកាលពីលើកទី១ អតីតយុទ្ធជនចំនួន១០១គ្រួសារ ទទួលបានលំនៅដ្ឋានក្នុងខេត្តឧត្តរមានជ័យ៕
