ជាអ្នករស់នៅភ្នំពេញ តែ យ៉ិន រាសី ចូលចិត្តដើរផ្សងព្រេងតាមព្រៃភ្នំ បំបាត់ភាពស្មុគស្មាញ
ភ្នំពេញ៖«ពេលខ្លះមនុស្សយើងគិតថា មនុស្សស្រីខ្សោយ ប៉ុន្តែ ការដើរព្រៃផ្តល់ភាពក្លាហានដល់យើង។ ហើយធ្វើឲ្យខ្ញុំស្រស់ស្រាយ, ផ្តល់ភាពរីករាយដល់ខ្ញុំ, វាជាចំណូលចិត្តរបស់ខ្ញុំ ហើយវាក៏ជួយដល់សុខភាពរបស់ខ្ញុំដែរ ពីព្រោះដូចជាការហាត់ប្រាណមួយអីចឹង»។ នេះជាសម្តីរបស់យុវតីវ័យ២៥ឆ្នាំ យ៉ិន រាសី ដែលចូលចិត្តធ្វើដំណើរកម្សាន្តបែបផ្សងព្រេងតាមព្រៃភ្នំនៅក្នុងប្រទេសកម្ពុជា ដូចជាព្រៃគិរីរម្យ, ភ្នំចំបក់, ភ្នំថ្មក្រាល, ភ្នំស្រង់ និងភ្នំឱរ៉ាល់ជាដើម។
ជីវិតដែលពោរពេញទៅដោយសេចក្តីសុខផ្លូវចិត្តរបស់ រាសី ដែលកើតនិងធំដឹងក្តីនៅរាជធានីភ្នំពេញ គឺជាជីវិតរស់នៅបែបធម្មជាតិស្ងប់ស្ងាត់តាមព្រៃភ្នំ ជាជាងការរស់នៅក្នុងទីក្រុងដោយ រាសី យល់ឃើញយ៉ាងដូច្នេះ៖«ឲ្យតែពេលបានដើរទៅដល់ព្រៃ គឺជាក្តីសុខមួយដែលពិបាករៀបរាប់ពីសេចក្តីសុខហ្នឹងណាស់ ចង់ទៅរស់នៅក្នុងព្រៃជាង។ ខ្ញុំគិតថា រស់នៅភ្នំពេញ គឺធុញថប់ ផ្លូវស្ទះរាល់ថ្ងៃត្រូវជួបនឹងផ្សែងយានយន្ត ជួបនឹងសំឡេងមនុស្សអ៊ូអរ ថ្លង់ និយាយទៅវាតប់ប្រមល់ខ្លាំងពេលនៅក្នុងទីក្រុង។ បើយើងនៅក្នុងព្រៃវិញ ស្ងប់ស្ងាត់ ឮតែសំឡេងសត្វយំ ឮសំឡេងទឹកជ្រោះ មានអារម្មណ៍ថា មានក្តីសុខមែនទែន»។
សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មាន ThmeyThmey ជាមួយកញ្ញា យ៉ិន រាសី ដែលចូលចិត្តធ្វើដំណើរកំសាន្តដើរព្រៃដូចតទៅ៖
សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មាន ThmeyThmey ជាមួយកញ្ញា យ៉ិន រាសី ដែលចូលចិត្តធ្វើដំណើរកំសាន្តដើរព្រៃដូចតទៅ៖
ដំណើរផ្សងព្រេងក្នុងព្រៃភ្នំបានបង្រៀនជីវិតកូនស្រីអ្នកភ្នំពេញ យ៉ិន រាសី កាន់តែរឹងប៉ឹង ក្លាហាន និងចេះរៀនរស់ជាក្រុម។ រឹងប៉ឹង គឺបើទោះខ្លួនជាមនុស្សស្រីមានកម្លាំងខ្សោយ ជំហានជើងខ្លី ដើរមិនទាន់បុរសក៏ពិតមែន តែ រាសី នៅតែប្រឹងប្រែងដើរហូតដល់គោលដៅ។ អារម្មណ៍ខ្លាចសត្វមានពិស ខ្លាចខ្មោច និងពេលខ្លះគេងមិនលក់ ដោយសារមេឃត្រជាក់ខ្លាំងពេក ឬពេលមេឃភ្លៀងអីចឹង ពិបាកគេងបន្តិច តែជំរុញឲ្យកញ្ញា រាសី មានភាពក្លាហានជម្នះនឹងផលលំបាកទាំងអស់នេះ។
លើសពីនេះទៅទៀត យុវត្តីវ័យ២៥ឆ្នាំ យ៉ិន រាសី បានរៀបរាប់ពីការដើរព្រៃជាក្រុម ដែលអាចរៀនរស់ជាមួយគ្នានិងចេះសហការគ្នាដូច្នេះថា ការដើរព្រៃលក្ខណៈជាក្រុមអីចឹងមានការចែករំលែកគ្នា យើងអត់ខ្វល់ថាមានអីញាំទេ គឺយើងញាំទាំងអស់។ ហើយអ្វីដែលពិសេសមួយទៀត យើងមិនបាច់ទិញគេទេ គឺយើងអាចស្វែងរក(ក្នុងព្រៃ)ខ្លួនឯង ដូចជា ប្រភេទផ្សិតព្រៃ ឫផ្លែឈើព្រៃ ឫវល្លិព្រៃ ដែលអាចយកមកស្លបាន អីចឹងហើយយើងញាំបែបធម្មជាតិៗ។
ក្រៅពីចំណង់ចំណូលចិត្តដើរកម្សាន្តបែបផ្សងព្រេងតាមព្រៃភ្នំជាច្រើននៅកម្ពុជា យុវត្តីដែលបម្រើការងារនៅក្នុងក្រុមហ៊ុនឯកជនមួយនៅភ្នំពេញ យ៉ិន រាសី ក៏ប៉ងផ្សងព្រេងឡើងភ្នំ Everest ដែលខ្ពស់ជាងលើពិភពលោកជាមួយនឹងក្រុមដើរព្រៃរបស់កញ្ញាផងដែរ៕
