រថយន្តរបស់នាយឧត្តមសេនីយ៍ (ផ្កាយ៤) ខេង សុមេធ អគ្គស្នងការរងនគរបាលជាតិ ត្រូវបាននគរបាលចរាចរណ៍ ឃាត់និងផាកពិន័យអស់៤ម៉ឺនរៀល នៅលើផ្លូវជាតិលេខ៧៨ ក្នុងឃុំកំភុន ស្រុកសេសាន ខេត្តស្ទឹងត្រែង កាលពីថ្ងៃទី១៥ ខែកញ្ញា ឆ្នាំ២០១៩ ដោយសារតែអ្នកបើកបររបស់លោកឈ្មោះ នៅ ពិសី បើកលើសល្បឿនកំណត់។
អនុសេនីយ៍ឯក ប្រាក់ ភិរម្យ ដែលជាអ្នកចាប់ផាករថយន្តរបស់នាយឧត្តមសេនីយ៍ ខេង សុមេធ ប្រាប់សារព័ត៌មានថ្មីៗតាមទូរស័ព្ទថា ក្នុងច្បាប់ចរាចរណ៍ អ្នកបើកបរ អាចបើកក្នុងល្បឿនត្រឹម៦០គីឡូម៉ែត្រប៉ុណ្ណោះក្នុង១ម៉ោង ប៉ុន្តែអ្នកបើកបររបស់នាយឧត្តមសេនីយ៍ ខេង សុមេធ បើកដល់ទៅ៨៧គីឡូម៉ែត្រក្នុង១ម៉ោង។
យ៉ាងណា លោកអនុសេនីយ៍ឯក បានសរសើរនាយឧត្តមសេនីយ៍ ខេង សុមេធ ដែលស្ម័គ្រចិត្តទទួលយកការផាកពិន័យ ដោយមិនប្រកែកឬជំទាស់អ្វីទាំងអស់។ នគរបាលចរាចរណ៍រូបនេះ និយាយដូច្នេះថា៖«គាត់ល្អណាស់ ខ្ញុំ សូមសរសើរគាត់ គាត់អត់មានអាងអំណាចអីដូចគេទេ គាត់ចូលរួមគោរពច្បាប់»។
ក្រោយរងការផាកពិន័យ នាយឧត្តមសេនីយ៍ ខេង សុមេធ បានបង្ហោះបង្កាន់ដៃ ដែលនគរបាលចរាចរណ៍ផាកពិន័យ លើគណនីហ្វេសប៊ុករបស់លោក (Someth Kheng) ដោយអមជាមួយនឹងសំណេរបែបនេះថា៖«កុំចេះតែហ៊ាន នៅ ពិសី មានទោសដូចគ្នា ឲ្យតែខុសច្បាប់...»៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com