រដ្ឋមន្ត្រីសាធារណការ ៖ បើក្រុមហ៊ុនសាងសង់ផ្លូវ លួចកេងប្រវ័ញ្ចថវិកាគម្រោង នឹងត្រូវដាក់ចូលបញ្ជីខ្មៅ
ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល រំឭកក្រុមហ៊ុនសាងសង់ផ្លូវ ឲ្យអនុវត្តតាមបច្ចេកទេសត្រឹមត្រូវ ដើម្បីបញ្ចៀសការរិះគន់ និងកុំឲ្យជាប់ឈ្មោះក្នុងបញ្ជីខ្មៅរបស់កម្ពុជា។ ប្រមុខក្រសួងសាធារណការ បានដឹកនាំក្រុមការងារជិះកង់ត្រួតពិនិត្យគុណភាពផ្លូវជាតិលេខ៧ ចាប់ពីចំណុចបង្គោល គីឡូម៉ែត្រលេខ១៧៦-១៦៦ នៅខេត្តត្បូងឃ្មុំ នាព្រឹកថ្ងៃទី២៤ កក្កដា។
តាមរយៈការជិះកង់ជាក្បួន ដែលមានចម្ងាយ១០គីឡូម៉ែត្រនេះ លោក ស៊ុន ចាន់ថុល បានពិនិត្យឃើញថា ផ្លូវថ្នល់កៅស៊ូប្រភេទ AC ដែលក្រុមហ៊ុនចិនមួយ ទទួលបានគម្រោងសាងសង់កន្លងមកនោះ មានស្នាមប្រេះ និងបែកក្រហូង មុនកាលបរិច្ឆេទកំណត់ ។ មូលហេតុដែលនាំឲ្យថ្នល់កៅស៊ូប្រភេទAC មានបញ្ហាបែបនេះ ត្រូវបានលោក ស៊ុន ចាន់ថុល កត់សម្គាល់ឃើញថា វាកើតចេញពីការសាងសង់មិនបានត្រឹមត្រូវតាមបច្ចេកទេស នៃគម្រោងអភិវឌ្ឍន៍ហេដ្ឋារចនាសម្ព័ន្ធ។
ថ្លែងចំពោះមុខតំណាងក្រុមហ៊ុនចិន ទទួលការសាងសង់ និងក្រុមហ៊ុនកូរ៉េ ដែលត្រួតពិនិត្យលើការដ្ឋានសាងសង់ផ្លូវជាតិលេខ៧នេះ រដ្ឋមន្ត្រីក្រសួងសាធារណការ បាននិយាយចំៗថា ការសាងសង់ផ្លូវគ្មានគុណភាពនេះ បណ្ដាលមកពីការលាយប៉េតុង និងកៅស៊ូ AC មិនត្រឹមត្រូវតាមស្ដង់ដារ ហើយការអ៊ុតកៅស៊ូ ប្រើកំដៅក្រោម១៦០អង្សារ ដែលធ្វើឲ្យកំដៅមិនគ្រប់គ្រាន់ នាំឲ្យកៅស៊ូមិនអាចជាប់ប្រើប្រាស់បានរយៈពេល៥ឆ្នាំយ៉ាងតិច។ ជាពិសេសកន្លែងខ្លះ ដែលត្រូវប្រើប្រាស់ទឹកសម្រាប់អ៊ុតកៅស៊ូ ប៉ុន្តែបែជាក្រុមហ៊ុនប្រើប្រាស់ប្រេងជំនួសទៅវិញ។ ភាគីក្រុមហ៊ុនចិន និងក្រុមហ៊ុនកូរ៉េ ដែលទទួលការខុសត្រូវលើការសាងសង់ផ្លូវជាតិលេខ៧នេះ យល់ស្របតាមការលើកឡើងរបស់លោក ស៊ុន ចាន់ថុល ។
នៅពេលអ្នកកាសែតសួរថា បើសិនជាក្រុមហ៊ុនដែលតែងតែទទួលបានការសាងសង់ផ្លូវនៅកម្ពុជាហើយ ចេះតែមានបញ្ហាខូចផ្លូវបែបនេះ តើក្រសួងអាចនឹងចាត់វិធានការណាមួយ ដែលលែងឲ្យក្រុមហ៊ុនមានសិទ្ធិដេញថ្លៃគម្រោងសាងសង់ផ្លូវនៅកម្ពុជាដែរទេ? លោក ស៊ុន ចាន់ថុល ឆ្លើយតបវិញថា ក្រសួងនឹងពិនិត្យមើលលើករណីសាងសង់ផ្លូវសិន ដើម្បីចង់ដឹងថា វាជាកំហុសបច្ចេកទេស ឬកំហុសកេងប្រវ័ញ្ច មុននឹងសម្រេចដាក់ចូលក្នុងបញ្ជីខ្មៅ។
«ទី១ យើងពិនិត្យសិនថា តើគាត់(ក្រុមហ៊ុនសង់ផ្លូវ) ខុសលក្ខណៈបច្ចេកទេស ឬគាត់កេងប្រវ័ញ្ច ដោយយើងត្រូវបែងចែកកំហុសនោះឲ្យច្បាស់ ឧទាហរណ៍ បើបេតុងត្រូវចាក់៥ហ៊ុន ប៉ុន្តែគាត់ចាក់៤ហ៊ុន អាហ្នឹង(វាស្ថិតនៅ) ជាការលួចហើយ ដែលអាចឈានទៅដល់ការដាក់ក្នុងបញ្ជីខ្មៅ មិនឲ្យដេញថ្លៃ បើសិនជាមានចេតនាលួចគុណភាព(ផ្លូវថ្នល់)។ ប៉ុន្តែបើខូចក្នុងលក្ខណៈបច្ចេកទេសអ៊ីចឹង យើងអាចពិភាក្សាគ្នាបាន ហើយយើងនឹងពិនិត្យទៀត បើសិនជាគាត់(សាងសង់ផ្លូវ) ចេះតែខូច ហើយខុស(បច្ចេកទេស)ម្ដងហើយ ខុសទៀត អាហ្នឹងយើងគួរពិចារណា គឺនៅពេលដេញថ្លៃយើងប្រាប់ធនាគារពិភពលោក ព្រោះគម្រោងនេះជាលុយធនាគារពិភពលោក ថាកុំឲ្យក្រុមហ៊ុនហ្នឹងដេញថ្លៃតទៅទៀត កុំឲ្យចូលមកសាងសង់ផ្លូវរបស់យើង»។ នេះជាការបញ្ជាក់របស់លោក ស៊ុន ចាន់ថុល ដែលផ្ដាំទៅក្រុមហ៊ុនទទួលការសាងសង់ផ្លូវទាំងអស់ ត្រូវកសាងផ្លូវឲ្យមានគុណភាព ដើម្បីកុំឲ្យខូចឈ្មោះក្រុមហ៊ុន។
Relate
បន្ថែមពីនេះរដ្ឋមន្ត្រីក្រសួងសាធារណការ ប្រកាសថា លោកលែងចង់ឮពាក្យរិះគន់របស់ពលរដ្ឋលើបញ្ហាផ្លូវខូចនេះទៀតហើយ ដោយលោកនឹងធ្វើយុទ្ធនាការជិះកង់ត្រួតពិនិត្យផ្លូវទាំងអស់ ដើម្បីរៀបចំ និងស្ថាបនាផ្លូវឡើងវិញ។ ជាមួយគ្នានេះលោក ស៊ុន ចាន់ថុល បានប្រាប់ឲ្យមន្ត្រីខ្លួន ចុះតាមដានរាល់ការសាងសង់ផ្លូវរបស់ក្រុមហ៊ុន ដែលទទួលបានគម្រោងអភិវឌ្ឍន៍ពីរដ្ឋាភិបាល ដើម្បីបញ្ឈប់ការរិះគន់ពីពលរដ្ឋថា«ចាក់ស្ដើងស៊ីក្រាស់ ចាក់ក្រាស់ស៊ីស្ដើង» ដែលមានន័យបង្អាប់លើការស្ថាបនាហេដ្ឋារចនាសម្ព័ន្ធរបស់រដ្ឋកន្លងមក។
គួរបញ្ជាក់ថា រដ្ឋាភិបាលចំណាយថវិកាប្រមាណ២០០លានដុល្លារ សម្រាប់ជួសជុលផ្លូវខូចក្នុងមួយឆ្នាំៗ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com