រយៈពេល២ថ្ងៃ ពលរដ្ឋ ចាប់កណ្ដូបលក់ឲ្យឈ្មួញថៃជាង២តោន នៅខេត្តព្រះវិហារ
ពលរដ្ឋខេត្តព្រះវិហារ ក្នុងស្រុកជាំក្សាន្ត នាំគ្នាចាប់កណ្ដូបរយៈពេល២ថ្ងៃបានជាង២តោន លក់ឲ្យឈ្មួញថៃ ដែលមកទិញនៅច្រកព្រំដែនអានសេះ។ ទីផ្សារឈ្មួញថៃទទួលទិញកណ្ដូប គឺ តម្លៃ១៥០បាត (១៩៨០០រៀល) ក្នុង១គីឡូក្រាម។
ប្រធានច្រកព្រំដែនអានសេះ លោក វុធ ដារ៉ា បានប្រាប់សារព័ត៌មានថ្មីៗ (Thmey Thmey) តាមទូរសព្ទថា «ជារៀងរាល់ឆ្នាំ ប្រជាពលរដ្ឋ តែងតែចាប់កណ្ដូប ហើយកណ្ដូបនេះ ជាទូទៅ មាននៅចុងខែមិថុនានិងដើមខែកក្កដានេះ។ ភាគច្រើន គឺ ពលរដ្ឋដើរចាប់ពេលយប់ នៅតាមព្រៃ ហើយក្នុងមួយគ្រួរសារអាចចាប់បានពី១០ ទៅ៣០ ឬដល់ ៥០គីឡូក្រាមអីក៏មាន។ ហើយក្នុងរយៈពេញពីរថ្ងៃ គឺថ្ងៃទី១ និង ទី២ ខែកក្កដានេះ ពលរដ្ឋលក់ឲ្យឈ្មួនថៃជាង២តោន រីឯតម្លៃវិញ១គីឡូ១៩៨០០រៀល។»
រូបភាពពីមន្ទីរកសិកម្មខេត្តព្រះវិហារ
រូបភាពពីមន្ទីរកសិកម្មខេត្តព្រះវិហារ
លោក វុធ ដារ៉ា បានបញ្ជាក់ថា រដូវកាលកណ្ដូបនេះមានរយៈពេលខ្លីត្រឹមតែ២-៣ថ្ងៃតែប៉ុណ្ណោះ។ ប្រធានច្រកព្រំដែនអានសេះរូបនេះ បានឲ្យដឹងថា ខេត្តជាប់ព្រំដែននេះ មានរដូវកាល ផ្សិតភ្នំ ដែលទើបតែផុត ហើយឥឡូវកណ្ដូប និងខែក្រោយនឹងដល់រដូវសត្វកញ្ចែ។ ឈ្មួញថៃតែងតែទទួលទិញរបស់ធម្មជាតិ ដែលពលរដ្ឋចាប់ ដូចជាកង្កែប កណ្ដូប និងសត្វកញ្ចែជាដើម។
ប្រធានមន្ទីកសិកម្ម លោក ពឹង ទ្រីដា បានប្រាប់សារព័ត៌មានថ្មីៗ (Thmey Thmey) តាមទូរសព្ទថា ពលរដ្ឋសប្បាយរីករាយនឹងការចាប់កណ្ដូបលក់ ដែលជាចំណូលបន្ថែមរបស់ពួកគាត់។ ប្រធានមន្ទីររូបនេះ បញ្ជាក់ថា៖«កណ្ដូបនេះ មិនបានបំផ្លាញដំណាំទេ ដោយពលរដ្ឋដើរចាប់កណ្ដូបនេះតាមព្រៃ»៕
រូបភាពពីមន្ទីរកសិកម្មខេត្តព្រះវិហារ
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com