លោក យន្ត មីន ផ្តាំមន្ត្រីខេត្តព្រះសីហនុឲ្យខិតខំបម្រើពលរដ្ឋ និងយកច្បាប់ជាគោល
ក្នុងឱកាសនៃកិច្ចប្រជុំបូកសរុបលទ្ធផលការងារប្រចាំខែមិថុនាឆ្នាំ២០១៩ និងលើកទិសដៅការងារសម្រាប់ខែកក្កដា លោក យន្ត មីន បានជួបមន្ត្រីសាលាខេត្តព្រះសីហនុ នៅថ្ងៃចុងក្រោយក្នុងតួនាទីលោកជាអភិបាលខេត្ត ដោយនៅថ្ងៃទី២៨ ខែមិថុនា តំណែងនេះនឹងត្រូវផ្ទេរជាផ្លូវការទៅលោក គួច ចំរើន។
លោក យន្ត មីន ដែលទើបទទួលបានការតែងតាំងជារដ្ឋលេខាធិការក្រសួងការពារជាតិ និងជានាយឧត្តមសេនីយ៍ក្នុងកងយោធពលខេមរភូមិន្ទ បានរំលឹកពីការសម្រេចចិត្តសុំលាលែងពីតំណែង និងការសោកស្តាយចំពោះឧប្បទ្ទវហេតុនៃការបាក់អគារកម្ពស់៧ជាន់ដែលបណ្តាលឲ្យមនុស្ស២៨នាក់ស្លាប់ និង២៦នាក់រងរបួស។
តាមការផ្សាយរបស់រដ្ឋបាលខេត្តព្រះសីហនុ លោក យន្ត មីន ដែលបានគ្រប់គ្រងខេត្តព្រះសីហនុ អស់រយៈពេលប្រមាណ៤ឆ្នាំកន្លងមកនោះ បានលើកឡើងពីការសោកស្តាយរបស់លោក ដែលមានអាចគ្រប់គ្រងដឹកនាំមន្ត្រីឲ្យបំពេញការងារបានល្អដែលនាំឲ្យមានរឿងអកុសលកើតឡើង។
«លោក យន្ត មីន បានថ្លែងអំណរគុណចំពោះមន្ត្រីតាមមន្ទីរអង្គភាពទាំងឡាយដែលបានខិតខំធ្វើអោយខេត្តព្រះសីហនុ មានការអភិវឌ្ឍ ជីវភាពប្រជាជនបានធូធារ និងបានផ្តាំផ្ញើមន្ត្រីទាំងឡាយត្រូវខិតខំបំរើប្រជាជនដោយស្មោះត្រង់និងយកច្បាប់ជាគោល»។ នេះបើតាមការបញ្ជាក់របស់រដ្ឋបាលខេត្ត។
ការតែងតាំង លោក យន្ត មីន ជារដ្ឋលេខាធិការក្រសួងការពារជាតិ និងជានាយឧត្តមសេនីយ៍យោធា ក៏ទទួលរងនូវរិះគន់ពីបណ្តាអ្នកប្រើប្រាស់បណ្តាញសង្គមមួយចំនួនផងដែរ ដោយអ្នកខ្លះ បានលើកឡើងថា អភិបាលខេត្តរូបនេះ គួរតែទទួលរងការពិន័យពីបទធ្វេសប្រហែសដែលបណ្តាលឲ្យមានករណីអគាររលំ។
អ្នកខ្លះបានលើកឡើងពីបញ្ហាពុករលួយ ទាក់ទងនឹងការសាងសង់សំណង់ខុសច្បាប់នៅក្នុងខេត្តតំបន់សមុទ្រមួយនេះ។
ទោះបីជាយ៉ាងណាក៏ដោយ សម្តេចនាយករដ្ឋមន្ត្រី ហ៊ុន សែន បានមើលឃើញពីការខិតខំប្រឹងប្រែងរបស់លោក យន្ត មីន ទាក់ទងនឹងប្រតិបត្តិការសង្គ្រោះ និងរុករកជនរងគ្រោះ ហើយសម្តេចថែមទាំងបញ្ជាក់នៅលើហ្វេសប៊ុករបស់ខ្លួនផងដែរថា៖ «សម្រាប់កម្លាំងចូលរួមប្រតិបត្តិការរុករកនិងសង្គ្រោះក្រោមការបញ្ជាផ្ទាល់នៅហ្នឹងកន្លែងពីសំណាក់ឯកឧត្តមយន្ត មីនត្រូវបានវាយតម្លៃខ្ពស់និងកោតសរសើរពីគ្រប់ទិសទីដែលខ្ញុំសូមថ្លែងអំណរគុណនិងផ្តល់នូវមេដាយមាសមួយគ្រឿងម្នាក់»៕
