រូប «អវលោកិតេស្វរៈ ព្រះហស្ត៣២» ជានិមិត្តសញ្ញា ខេត្តបន្ទាយមានជ័យ
ភ្នំពេញ៖ និមិត្តសញ្ញា ដែលតំណាងឱ្យខេត្តបន្ទាយមានជ័យគឺជា «អវលោកិតេស្វរៈ មានព្រះហស្ត៣២» ដែលជាអ្នកធំក្នុងការប្រមើលមើល ពិនិត្យមើលសេចក្តីសុខទុក្ខ និងចរិយារបស់សត្វលោក។ និមិត្តសញ្ញានេះត្រូវបានប្រើសម្រាប់ដាក់ជាកន្លែងធ្វើការងារ ដាក់លើក្បាលលិខិត ឯកសារ និងស្រោមសំបុត្រផ្លូវការ និងប្រើប្រាស់ក្នុងពិធីនានារបស់រដ្ឋបាលខេត្តបន្ទាយមានជ័យ។ ក្រៅពីនេះអាចប្រើប្រាស់ជាផ្លូវការក្នុងករណីដែលចំបាច់ផ្សេងៗ។
យោងតាមសេចក្តីប្រកាសរបស់ក្រសួងមហាផ្ទៃស្តីពីការបង្កើត និងដាក់ឱ្យប្រើប្រាស់នូវនិមិត្តសញ្ញាខេត្តនេះ កាលពីឆ្នាំ២០១៨ និមិត្តសញ្ញានេះ មានរាងពងក្រពើ មានទទឹង២ភាគ៣នៃបណ្តាយ។ អវលោកិតេស្វរៈ ឈរលើកងចក្រ៧កាំ មានចារឹកជាអក្សរ «អវលោកិតេស្វរៈ» ពណ៌លឿង ជាមួយផ្នែកខាងក្រោមដែលមានបូពណ៌ខៀវលើ-ក្រោម និងចំកណ្តាលផ្ទៃពណ៌ក្រហមមានអក្សរ «ខេត្តបន្ទាយមានជ័យ» ពណ៌ស ដោយមានកួរស្រូវពណ៌លឿងទុំព័ទ្ធជុំវិញជាស្នែងក្របី រុំដោយបូដែលមានពណ៌ក្រហម និងផ្ទៃពណ៌ខៀវ។
ដោយឡែក ព្រះហស្តទាំង៣២របស់ «អវលោកិតេស្វរៈ» គឺតំណាងឱ្យការកសាងព្រះបារមីរបស់ព្រះពោធិសត្វ ដើម្បីសម្រេចបាននូវសម្មាសម្ពោធិញ្ញាណ ត្រាស់ដឹងជាព្រះសម្មាសម្ពុទ្ធ។ កួរស្រូវពណ៌លឿងទុំព័ទ្ធជុំវិញ «អវលោកិតេស្វរៈ» ជាស្នែងក្របី តំណាងឱ្យផលិតផលកសិកម្ម ទទួលបានពីការប្រកបមុខរបរផ្នែកកសិកម្ម ដោយប្រជាពលរដ្ឋខេត្តបន្ទាយមានជ័យប្រមាណ៨៥ភាគរយ ជាកសិករ។
កងចក្រ មានកាំប្រាំពីរ ដែល «អវលោកិតេស្វរៈ» ឈរពីលើ គឺតំណាងឱ្យ រោងចក្រ សហគ្រាស ដែលជាសក្កានុពលនាពេលបច្ចុប្បន្ន និងអនាគត កើតមានឡើងក្នុងទឹកដីខេត្តបន្ទាយមានជ័យ ដែលផលិតផលកសិកម្មភាគច្រើនកើតឡើងពីដំណាំឧស្សាហកម្ម មានដូចជា ដំឡូង ពោត សណ្តែក ល្ហុងប្រេង ដើមប្រេងខ្យល់ និងកៅស៊ូ ជាដើម៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com