មន្ត្រីគយកំពង់ផែព្រះសីហនុ៣នាក់ស្លាប់ ក្នុងគ្រោះថ្នាក់ចរាចរណ៍នៅកំពង់ស្ពឺ
ភ្នំពេញ៖ មន្ត្រីគយកំពង់ផែខេត្តព្រះសីហនុចំនួន ៣នាក់ បានស្លាប់ ក្នុងករណីគ្រោះថ្នាក់ចរាចរណ៍ផ្ទុះឆេះរថយន្ត ដែលកើតឡើងនៅល្ងាចថ្ងៃទី ៨ មិថុនា នៅខេត្តកំពង់ស្ពឺ។ នេះបើតាមការចុះផ្សាយរបស់អង្គភាព Fresh News ដែលស្រង់សម្ដីរបស់មន្ត្រីបម្រើការនៅអគ្គនាយកដ្ឋានគយ និងរដ្ឋាករ។
ករណីគ្រោះថ្នាក់ចរាចរណ៍រវាងរថយន្ត ៣គ្រឿងបុកគ្នានេះ បានបណ្ដាលឲ្យមនុស្ស ១១នាក់ស្លាប់ ដោយក្នុងនោះ មានជនគ្រោះ៣នាក់ ជាមន្ត្រីគយមាត់ច្រកកំពង់ផែស្វយត័ក្រុងព្រះសីហនុ។ ជនគ្រោះជាមន្ត្រីគយទាំងបីដែលបានស្លាប់នេះ ជាអ្នកដំណើរជិះរថយន្តហាយឡែនឌ័រ។
បើតាមលោក តាប់ លន ស្នងការរងខេត្តកំពង់ស្ពឺ ក្នុងហេតុការណ៍គ្រោះថ្នាក់នេះ បង្កឡើងដោយរថយន្តហាយឡែនឌ័រ បើកវ៉ារថយន្តមួយគ្រឿង ក៏ជ្រុលទៅបុករថយន្តក្រុង២៤កៅអីដែលកំពុងបើកបញ្ច្រាស់គ្នា។សូមបញ្ជាក់ថា គ្រោះថ្នាក់ចរាចរណ៍ដ៏រន្ធត់ខាងលើនេះ កើតឡើងនៅចំណុចគីឡូម៉ែត្រលេខ៨៥-៨៦ ស្ថិតក្នុងស្រុកភ្នំស្រួច ខេត្តកំពង់ស្ពឺ ដែលបណ្ដាលឲ្យមនុស្ស១១នាក់ស្លាប់ និង២នាក់រងរបួស៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com