បាត់ដំបង៖ សារព័ត៌មានថ្មីៗ (ThmeyThmey.com) តាមរយៈក្រុមហ៊ុន Star Auto Cambodia បានប្រើប្រាស់រថយន្តម៉ូឌែល Mercedes-Benz GLC 250 4MATIC SUV សម្រាប់ធ្វើដំណើរមកទស្សនកិច្ចឈ្វេងយល់ពីស្ថានីបុរេប្រវត្តិល្អាងស្ពាន ដែលស្ថិតនៅក្នុងស្រុករតនមណ្ឌល ខេត្តបាត់ដំបង។ ស្ថានីយល្អាងស្ពានកំណាយស្រាវជ្រាវបុរេប្រវត្តិនេះ មានអាយុកាលប្រហែល ៧១០០០ឆ្នាំមុនគ្រិស្តសករាជ ពោលគឺនៅសម័យថ្មបំបែក។ លោក ឃុន ចាន់ថា នាយកគ្រប់គ្រងផ្នែកលក់និងទីផ្សារនៃក្រុមហ៊ុន Star Auto Cambodia បានពន្យល់ពីមូលហេតុដែល Star Auto មកទស្សនកិច្ចនៅស្ថានីបុរេប្រវត្តិនេះ ក្នុងគោលបំណងផ្សព្វផ្សាយព័ត៌មាននេះឲ្យសាធារណជនបានដឹងកាន់តែទូលាយនិងជាពិសេស សិស្សនិស្សិតដែលសិក្សាផ្នែកប្រវត្តិសាស្ត្រអាចស្រាវជ្រាវឲ្យបានកាន់តែស៊ីជម្រៅពីប្រវត្តិសាស្ត្រ ដែលមនុស្សខ្មែរកាលពី៧ម៉ឺនឆ្នាំមុនគ.ស អាចយកថ្មមកកែច្នៃសម្ភារប្រើប្រាស់និងគ្រឿងលម្អកាយបានយ៉ាងអស្ចារ្យ។
រថយន្តម៉ូឌែល Mercedes-Benz GLC 250 4MATIC SUV ឆ្នាំ២០១៩ មានបំពាក់ដោយឧបករណ៍និងបច្ចេកវិទ្យាទំនើបៗជាច្រើន ស៊ីប្រេងសាំងអស់ត្រឹមជាង៦លីត្រក្នុងរយៈចម្ងាយ១០០គីឡូម៉ែត្រ ដែលអាចបើកបរបានគ្រប់ស្ថានភាពផ្លូវប្រកបដោយសុវត្ថភាពខ្ពស់និងផាសុខភាពល្អ បានជូនក្រុមការងារអ្នកសារព័ត៌មានថ្មីៗមកដល់ជើងភ្នំល្អាងស្អាន ដើម្បីសិក្សានិងផ្សព្វផ្សាយពីកំណាយបុរេប្រវត្តិ ដែលត្រូវបានរកឃើញនិងត្រូវបានធ្វើកំណាយលើកដំបូងដោយលោកស្រី សេស៊ី ម៉ូរ៉េ និងលោក រ៉ូឡង់ ម៉ូរ៉េ នៅទសវត្ស ១៩៦០។
បន្ទាប់ពីការស្រាវជ្រាវបានអាក់ខានជាង ៤០ឆ្នាំ ស្ថានីយបុរេប្រវត្តិសាស្ត្រល្អាងស្ពាន ជាឈ្មោះរូងភ្នំថ្មកំបោរមួយ ដែលមានទីតាំងស្ថិតនៅ ក្នុងភ្នំទាក់ទ្រាំង ភូមិគីឡូម៉ែត្រ៣៨ ឃុំត្រែង ស្រុករតនមណ្ឌល ខេត្តបាត់ដំបង មានចម្ងាយប្រមាណ ៤០គីឡូម៉ែត្រពីទីរួមខេត្តបាត់ដំបង តាមបណ្តោយផ្លូវលេខ៥៧ ឆ្ពោះទៅខេត្តប៉ៃលិន នេះ ចាប់ផ្តើមស្រាវជ្រាវបន្តទៀត ដោយក្រសួងវប្បធម៌ និងវិចិត្រសិល្បៈ សហការជាមួយសារមន្ទីរជាតិប្រវត្តិសាស្ត្រធម្មជាតិនៃប្រទេសបារាំង ដែលដឹកនាំដោយលោក ហេង សុផាឌី និងលោក អ៊ូប៊ែរ ហ្វ័ររេទីយ៉េ។ នេះបើតាមព័ត៌មានពីមន្ទីរទេសចរណ៍នៃខេត្តបាត់ដំបង។
មន្ទីរទេសចរណ៍ដដែលបានឲ្យដឹងទៀតថា ការធ្វើកំណាយជាហូរហែរកន្លងមក បានរកឃើញវត្ថុបុរាណជាច្រើនដូចជា៖ ឧបករណ៍ថ្មបំបែក, ថ្មរំលីង, ភាជន៍, គ្រឿងលម្អកាយ (អង្កាំ និងកងដៃធ្វើពី ថ្ម និងបន្តោងខ្សែក ធ្វើពីចង្កូមសត្វ) បំណែកឆ្អឹងសត្វ ព្រមទាំងផ្នូរសព។ លទ្ធផលវិភាគលើវត្ថុបានពីកំណាយ បង្ហាញថា ស្ថានីយល្អាងស្ពាន មានមនុស្សមកតាំងទី បីដំណាក់កាលផ្សេងគ្នា៖ សម័យថ្មបំបែកមានអាយុកាលប្រហែល ៧១០០០ឆ្នាំ, វប្បធម៌ហាវប៊ីនញៀនមានអាយុចន្លោះពី ១១០០០ ដល់ ៥០០០ឆ្នាំ និងចុងក្រោយ គឺសម័យថ្មរំលីង មានអាយុប្រហែល ៣០០០ឆ្នាំ ដោយគេបានយកល្អាងស្ពានជាកន្លែងបញ្ចុះសព។
កាលប្រវត្តិទទួលបាននាពេលនេះ គឺធ្វើឡើងតាមវិធីសាស្ត្របីផ្សេងៗគ្នាដូចជា៖ (14C, OSL, U-Th) ទៅលើស្រទាប់ដីផ្សេងគ្នា ចាប់ពីផ្ទៃខាងលើរហូតដល់ជម្រៅ៥ម៉ែត្រ។ មកទល់ពេលនេះ ល្អាងស្ពានជាស្ថានីយបុរេប្រវត្តិសាស្ត្រតែមួយគត់នៅក្នុងប្រទេសកម្ពុជា ដែលប្រទះឃើញឧបករណ៍ថ្ម នៃវប្បធម៌ហាវប៊ីនញៀនច្រើនប្រភេទ ហើយស្ថិតក្នុងស្រទាប់ដីជាក់លាក់។
លោក ឃុន ចាន់ថា នាយកគ្រប់គ្រងផ្នែកលក់និងទីផ្សារនៃក្រុមហ៊ុន Star Auto Cambodia ដែលបានចុះទៅដល់ស្ថានីយបុរេប្រវត្តិសាស្ត្រល្អាងស្ពាន នៅស្រុករតនមណ្ឌល ខេត្តបាត់ដំបង និងបានឈ្វេងយល់ពីកំណាយនៅក្នុងល្អាងភ្នំនេះបន្ថែម កាលពីថ្ងៃទី៩ ខែឧសភា ឆ្នាំ២០១៩នេះ លោកជឿជាក់ថា នេះជាដំណឹងដ៏ល្អមួយដែលខ្មែរកាលពីប្រមាណ៧១០០០ឆ្នាំមុនគ្រិស្តសករាជ ដែលគិតមកដល់ត្រឹមឆ្នាំ២០១៩នេះ មានអាយុកាលរហូតដល់ទៅ ៧៣០១៩ឆ្នាំ អាចយកដំថ្មមកច្នៃធ្វើជាភាជន៍, គ្រឿងលម្អកាយដូចជាអង្កាំនិងកងដៃធ្វើពីថ្ម និងបន្តោងខ្សែក ធ្វើពីចង្កូមសត្វ បានយ៉ាងអស្ចារ្យ។
លោក ចាន់ថា សង្ឃឹមថា ការផ្សព្វផ្សាយព័ត៌មានទាំងនេះបន្ថែម នឹងអាចឲ្យសាធារណជនបានដឹងកាន់តែទូលំទូលាយ និងជាពិសេស សិស្សនិស្សិតដែលសិក្សាផ្នែកប្រវត្តិសាស្ត្រអាចស្រាវជ្រាវពីការរស់នៅរបស់ខ្មែរកាលពីសម័យថ្មបំបែកឲ្យបានកាន់តែស៊ីជម្រៅបន្ថែមទៀត។
សព្វថ្ងៃនៅតំបន់ព្រៃការពារនៃស្ថានីយបុរេប្រវតិ្តភ្នំល្អាងស្អានដែលមានអាយុកាលវ័យចំណាសមួយនេះ មានឆ្មាំពីរនាក់ប្រចាំការនៅទីនោះ៕
សូមអញ្ជើញទស្សនាទិដ្ឋភាពនៅក្នុងស្ថានីយបុរេប្រវត្តិល្អាងស្អាននៃខេត្តបាត់ដំបងនេះបន្ថែមទៀត៖
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com