សម្ដេច ស ខេង បញ្ជាឲ្យសមត្ថកិច្ចបង្ក្រាបគ្រឿងញៀន តាមកន្លែងកម្សាន្តឱ្យអស់ នៅត្រឹមឆ្នាំ២០១៩
ភ្នំពេញ៖ ពីពិធីប្រកាសផ្ទេរ និងតែងតាំងអភិបាលខេត្តបន្ទាយមានជ័យ នៅព្រឹកថ្ងៃទី១០ ឧសភានេះ សម្ដេច ស ខេង រដ្ឋមន្ត្រីក្រសួងមហាផ្ទៃ ដាក់ចេញបញ្ជាឲ្យមន្ត្រី និងកងកម្លាំងទាំងអស់ ចុះបង្ក្រាបករណីគ្រឿងញៀននៅតាមបណ្ដាក្លិប និងទីតាំងកម្សាន្តនានាឲ្យអស់ នៅត្រឹមឆ្នាំ២០១៩នេះ។
ថ្លែងចំពោះមុខថ្នាក់ដឹកនាំខេត្ត និងមន្ត្រីក្រសួងមហាផ្ទៃនោះ សម្ដេច ស ខេង បានសង្កត់ធ្ងន់ថា ករណីគ្រឿងញៀននៅតាមរង្គសាលនានា ត្រូវលុបបំបាត់ឲ្យអស់ ដើម្បីទប់ស្កាត់ការរីករាលបញ្ហាគ្រឿងញៀន ដែលនាំឲ្យបំផ្លាញសង្គមនេះ។ បើតាមសម្ដេច ស ខេង ទីតាំងកន្លែងកម្សាន្តដែលលួចលាក់ជួញដូរ និងប្រើប្រាស់គ្រឿងញៀននេះ គឺជាកន្លែងដែលបំពុល និងពង្វក់ស្មារតីយុវជនឲ្យដើរផ្លូវខុស ហើយបំផ្លាញអនាគតពួកគេ ។
ត្រង់ចំណុចនេះប្រមុខក្រសួងមហាផ្ទៃរូបនេះ បានព្រមានថា បិទ ឬរឹបអូស ទីតាំងក្លិប និងទីកន្លែងកម្សាន្តណា ដែលនៅបន្តលួចលាក់ប្រើប្រាស់គ្រឿងញៀនផងដែរ ក្នុងករណីសមត្ថកិច្ចបង្ក្រាបម្ដងជាពីរដងហើយនៅតែមិនរាងចាល។ ការបង្ក្រាបនេះ គឺអនុវត្តទៅលើទីកន្លែងកម្សាន្តទូទាំងប្រទេស។
កាលពីពេលថ្មីៗនេះ សមត្ថកិច្ច បានបង្ក្រាបក្លិបកម្សាន្តរ៉ក និងក្លិប ម៉ៃ អាមី ជាដើម ដោយបានឃាត់ខ្លួនមនុស្សរាប់រយនាក់ ពាក់ព័ន្ធនឹងករណីប្រើប្រាស់គ្រឿងញៀននេះ។
មកដល់ពេលសមត្ថកិច្ច បានបង្ក្រាប និងរឹបអូស បានគ្រឿងញៀនជាង៦០០គីឡូក្រាមហើយ ក្នុងយុទ្ធនាការបោសសម្អាតគ្រឿងញៀនរបស់រដ្ឋាភិបាល រយៈពេលជាង២ឆ្នាំនេះ។ នេះជាការបញ្ជាក់របសរដ្ឋមន្ត្រីក្រសួងមហាផ្ទៃ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com