និស្សិតសកលវិទ្យាល័យ Paragon រៃអង្គាសថវិកាទិញម៉ូតូឲ្យមិត្តភក្តិក្រីក្ររបស់ពួកគេម្នាក់
ភ្នំពេញ៖ និស្សិតសកលវិទ្យាល័យ Paragon មួយក្រុមតូចបានរៃអង្គាសថវិកាបានមួយចំនួនដើម្បីទិញម៉ូតូមួយគ្រឿងឲ្យមិត្តភក្តិក្រីក្ររបស់គេម្នាក់ដែលសិក្សានៅឆ្នាំទី១ជាមួយគ្នានៅសកលវិទ្យាល័យ Paragon (អតីតសកលវិទ្យាល័យ Zaman)។ និស្សិត យ៉ន សុខន កើតក្នុងគ្រួសារក្រីក្របំផុតនៅក្នុងខេត្តបាត់ដំបង។ ដោយការខិតខំប្រឹងប្រែង សុខន រៀនពូកែ ហើយក៏ទទួលបានអាហារូបករណ៍សិក្សានៅសកលវិទ្យាល័យ Paragon នៅរាជធានីភ្នំពេញ។
«ស្នាក់នៅក្នុងវត្តឧណ្ណាលោមនៅក្បែរមាត់ទន្លេ, ធាក់កង់កញ្ចាស់មួយគ្រឿងទៅកាន់សាលារៀន Paragonនៅតំបន់ទួលគោក, ពេលខ្លះ ខ្វះថវិកាហូបអាហារពេលថ្ងៃ…»។ ទាំងអស់នេះ គឺជាស្ថានភាពពិតរបស់យុវនិស្សិត យ៉ន សុខន អាយុ១៩ឆ្នាំ កំពុងបន្តការសិក្សាដោយទទួលបានអាហាររូបករណ៍នៅសកលវិទ្យាល័យ Pararon។ កាលពីឆ្នាំមុន សុខន បានប្រឡងជាប់បាក់ឌុបដោយទទួលបាននិទ្ទេស B ហើយកាលពីឆ្នាំមុន(២០១៨) ដូចគ្នាដែរ, សុខន ក៏ជាសិស្សពូកែផ្នែកគណិតវិទ្យាស្ថិតក្នុងចំណាត់ថ្នាក់លេខ៥ទូទាំងប្រទេស។
រៀនពូកែ តែគ្រួសារក្រីក្រ ឬគ្រួសារក្រីក្រ តែ សុខន រៀនពូកែ។ ជាកូនបងនៅក្នុងគ្រួសារដែលមានបងប្អូន៣នាក់ សុខន មិនអាចពឹងពាក់លើគ្រួសារបានឡើយ ព្រោះ ឪពុកម្តាយធ្វើស្រែចម្ការបន្តិចបន្តួច។ ដូច្នេះ សុខន រស់នៅ ដោយពឹងពាក់តែទីវត្តអារាមតាំងពីតូច និងតាំងពីរស់នៅក្នុងខេត្តបាត់ដំបងមកម្ល៉េះ។
ដោយមើលឃើញការតស៊ូ អំណត់ ព្យាយាមរបស់ យ៉ន សុខន នោះ, មិត្តភក្តិរួមថ្នាក់ឆ្នាំទី១ផ្នែកទំនាក់ទំនងអន្តរជាតិរបស់ សុខន នៅសកលវិទ្យាល័យ Paragon ក៏បានសម្រេចចិត្តរៃអង្គាសថវិកាក្នុងចំណោមពួកគេផ្ទាល់បានជាង២០០ដុល្លារដើម្បីទិញម៉ូតូមួយគ្រឿងក្នុងតម្លៃសមរម្យល្មមជូននិស្សិត សុខន។ និស្សិត គី ចំណា ដែលចេញមុខជួយសម្របសម្រួលការរៃអង្គាថវិកាទិញម៉ូតូជូន សុខន បានប្រាប់សារព័ត៌មានថ្មីៗថា មិត្តភក្តិគេទាំងអស់គ្នាសប្បាយចិត្តក្នុងការផ្តល់ថវិកាដើម្បីទិញម៉ូតូឲ្យ សុខន។ «អ្នកខ្លះមានតិច ចូលរួមតិច អ្នកមានច្រើនចូលរួមច្រើន»។
នៅចំពោះមុខទឹកចិត្តរបស់មិត្តភក្តិ យុវជន សុខន គ្មានពាក្យពេចន៍អ្វីថ្លែងឲ្យលើសពីពាក្យថា«អរគុណ និងរំភើបចិត្តឡើយចំពោះមិត្តភក្តិឡើយ»។ បើបានម៉ូតូហើយ សុខន ត្រូវរៀនជិះម៉ូតូសិន ព្រោះ សុខន មិនទាន់ចេះជិះម៉ូតូពិតប្រាកដនៅឡើយទេ៕
