ក្រុមហ៊ុនបរទេសធំៗនឹងចាប់ផ្ដើមទាញយកប្រេង រ៉ែមាស...ចាប់ពីចុងឆ្នាំ២០១៩
ភ្នំពេញ៖ គម្រោងអាជីវកម្មរ៉ែមាសទ្រង់ទ្រាយធំនៅខេត្តរតនគិរី និងមណ្ឌលគិរី និងគម្រោងទាញយកដំណក់ប្រេងលើកដំបូង នឹងចាប់ផ្ដើមទាញយកនៅអំឡុងឆ្នាំ២០២០ ខាងមុខនេះ។ នេះបើតាមការអះអាងរបស់មន្ត្រីជាន់ខ្ពស់ក្រសួងរ៉ែ និងថាមពល ក្នុងវេទិកាអភិបាលកិច្ចវិស័យឧស្សាហកម្មនិស្សារណកម្មនៅកម្ពុជាលើកទី៧ នៅថ្ងៃទី២ខែមេសានេះ។
ដំណក់ប្រេងលើកដំបូងរបស់កម្ពុជា ដែលវិនិយោគដោយក្រុមហ៊ុនសិង្ហបុរី KrisEnergy នឹងត្រូវចាប់ផ្ដើមខួងយកនៅចុងឆ្នាំ២០១៩នេះ ឬអាចដើមឆ្នាំ២០២០ បន្ទាប់ពីទទួលបានសិទ្ធិវិនិយោគកាលខែសីហាឆ្នាំ២០១៧។ នេះបើតាមលោក ម៉េង សក្ដិធារ៉ា រដ្ឋលេខាធិការក្រសួងរ៉ែ និងថាមពល ដែលបញ្ជាក់ថាពេលបូមប្រេងបាន ក្រុមហ៊ុននឹងនាំយកទៅលក់នៅទីផ្សារអន្តរជាតិ។ ក្រុមហ៊ុននឹងអនុវត្តខួងប្រេងក្នុងប្លុកA ដំណាក់ 1A ដែលមាន២០អណ្ដូង ហើយសរុបបរិមាណ ៨លានប៉ារ៉ែល។ លោក សក្ដិធារ៉ា ថានេះជាបរិមាណតិចប៉ុណ្ណោះ។ ហើយចាប់ផ្ដើមដំបូងក្រុមហ៊ុននឹងខួងអណ្ដូងទី១ ក្នុងចំណោម២០អណ្ដូង។
ក្រៅពីប្រេង កម្ពុជាដែលមិនទាន់មានលទ្ធភាពរុករក និងធ្វើអាជីវកម្មរ៉ែដោយខ្លួនឯង បានផ្ដល់អាជ្ញាបណ្ណឲ្យក្រុមហ៊ុនបរទេសធ្វើប្រតិបត្តិការទាញយករ៉ែមាស។ ក្រោយពីរុករកអស់រយៈពេលប៉ុន្មានឆ្នាំ ក្រុមហ៊ុនពីរបានប្រកាសនឹងចាប់ផ្ដើមការទាញយករ៉ែមាសនេះ ក្នុងពេលឆាប់ខាងមុខនេះ។ ក្រុមហ៊ុន Mesco Gold របស់ឥណ្ឌា នឹងចាប់ផ្ដើមទាញយករ៉ែមាសនៅខេត្តរតនគិរី នៅចុងឆ្នាំនេះ។ មួយទៀតគឺគម្រោងនៅអូរខ្វាវខេត្តមណ្ឌលគិរីរបស់ក្រុមហ៊ុន Renaissance minerals របស់អូស្ត្រាលី ដែលនឹងទាញយករ៉ែមាសនៅឆ្នាំ២០២០។
នេះជាការទាញយករ៉ែមាសទ្រង់ទាញធំ ជាលក្ខណៈឧស្សាហកម្មលើកដំបូង។ បើតាមលោក ម៉េង សក្ដិធារ៉ា សព្វថ្ងៃក្រុមហ៊ុនជាង១០ បានទទួលអាជ្ញាបណ្ណ ហើយខ្លះកំពុងចាប់ផ្ដើមអាជីវកម្ម តែជាលក្ខណៈកែច្នៃទ្រង់ទ្រាយតូចជាសិប្បកម្ម ហើយខ្លះទៀតត្រៀមសាកល្បងការរុករក។
ក្រុមហ៊ុនចុះបញ្ជីក្នុងផ្សារហ៊ុន Emerald Resources ដែលជាក្រុមហ៊ុនមេរបស់ Renaissance minerals ខាងលើ ក្នុងពេលកន្លងមកបានចេញរបាយការណ៍ថា គម្រោងរ៉ែមាសអូរខ្វាវអាចផលិតមាសបានជាមធ្យម ១០៦០០០ អោនស៍ (ប្រមាណ៣តោន) ក្នុងមួយឆ្នាំ។ លោក ប៉េង ណាវុធ អនុរដ្ឋលេខាធិការក្រសួងរ៉ែ និងថាមពល បានឲ្យដឹងក្នុងវេទិកាខាងលើថា អត្ថប្រយោជន៍ពី៤០ទៅ៤៥ភាគរយនឹងចូលថវិកាជាតិ ពីអាជីវកម្មរ៉ែមាសរបស់ក្រុមហ៊ុនអូស្ត្រាលីនេះ។
ក្នុងវិស័យរ៉ែនេះដែរ រោងចក្រផលិតស៊ីងម៉ង់ អាចនឹងត្រូវបង្កើតថែម២ទៀតក្នុងឆ្នាំ២០១៩ និងឆ្នាំ២០២០ ដែលរោងចក្រនីមួយៗអាចផលិតមិនតិចជាង១លានតោនទេក្នុងមួយឆ្នាំ។ នេះបើតាមលោក ប៉េង ណាវុធ ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com