កំពង់ឆ្នាំង-កំពង់ធំ នឹងតភ្ជាប់គ្នាដោយស្ពានវែងជាងគេនៅកម្ពុជាប្រវែងជិត៤គីឡូម៉ែត្រ
ភ្នំពេញ៖ កម្ពុជា គ្រោងនឹងសាងសង់ស្ពានប្រវែងជាង៣គីឡូម៉ែត្រដែលជាស្ពានវែងជាងគេនៅកម្ពុជា ដើម្បីភ្ជាប់រវាងខេត្តកំពង់ឆ្នាំង និងខេត្តកំពង់ធំ។ នេះបើតាមការថ្លែងរបស់សម្តេច ហ៊ុន សែន នាការបើកព្រឹត្តិការណ៍បុណ្យទន្លេលើកទី៥នៅខេត្តកំពង់ឆ្នាំង កាលពីល្ងាចថ្ងៃទី១៦ ខែមីនា។
ស្ពានដែលមានប្រវែងរហូតដល់ទៅ៣៩០០ម៉ែត្រ ដែលនឹងក្លាយជាស្ពានដែលវែងជាងគេនៅកម្ពុជានោះ ត្រូវឆ្លងកាត់ដៃទន្លេចំនួនបី គឺទន្លេផ្សារក្រោម ទន្លេជល់មុខ និងទន្លេកំពង់ហាវ ពីខេត្តកំពង់ឆ្នាំ ឆ្ពោះទៅខេត្តកំពង់ធំ។ សម្តេច ហ៊ុន សែន បានគូសបញ្ជាក់ថា ការគឺដើម្បីកុំឲ្យមានការប៉ះពាល់ដល់ការធ្វើចរាចរណ៍តាមផ្លូវទឹក ការបំលាស់ទីរបស់ត្រី និងអាចជួយកាត់បន្ថយការចំណាយពេលក្នុងការធ្វើដំណើរ និងដឹកជញ្ជូនរបស់ប្រជាពលរដ្ឋ រួមទាំងចំណេញពេលវេលាផងដែរ។
ជាមួយគ្នានេះ កម្ពុជា ក៏មានគម្រោងសាងសង់ស្ពាន ២ បន្ថែមទៀត នៅក្នុងខេត្តកំពង់ធំ ដោយគម្រោងនេះគឺ បានសិក្សារួចហើយ ហើយមិនមានផលប៉ះពាល់ណាមួយដល់ធនធានធម្មជាតិ បញ្ហាបង្វែរចរន្តទឹក និង ការបំលាស់ទីរបស់ត្រីនោះទេ ។
ខេត្តទាំងពីរ កំពង់ឆ្នាំង និងកំពង់ធំ ក៏ត្រូវតភ្ជាប់គ្នាតាមរយៈគម្រោងសាងសង់ផ្លូវប្រវែងជាង ៥៧ គីឡូ ម៉ែត្រ ពី ស្រុកកំពង់លែង ខេត្តកំពង់ឆ្នាំង ឆ្ពោះទៅកាន់ ក្រុង ស្ទឹងសែន នៃខេត្តកំពង់ធំ។
«បន្ទាប់ពីផ្លូវ និងស្ពានមួយខ្សែនេះត្រូវបានសាងសង់រួចហើយនោះ ប្រជាពលរដ្ឋនឹងទទួលបានផលប្រយោជន៍យ៉ាងច្រើនពីគម្រោងមួយនេះ គឺបានចំណេញទាំងពេលវេលា ចំណេញថ្លៃដឹកជញ្ជូន និងទទួលបានចំណូលកាន់តែច្រើនជាមិនខាន»។ នេះជាការរំពឹងរបស់ប្រមុខរដ្ឋាភិបាល។
បច្ចុប្បន្ន ស្ពានដែលវែងជាងគេនៅកម្ពុជា គឺស្ពាន «ត្សឹបាសា» ឬស្ពាន «អ្នកលឿង» ដែលមានប្រវែង២២១៥ម៉ែត្រ ស្ថិតក្នុងខេត្តព្រៃវែង និងឆ្លងកាត់ទម្លេមេគង្គ។ ស្ពាននេះ ត្រូវបានដាក់ឲ្យប្រើប្រាស់ជាផ្លូវការកាលពីដើមខែមេសា ឆ្នាំ២០១៥៕
