បញ្ហាខ្វះទឹកប្រើប្រាស់ក្នុងពន្ធនាគារឧត្តរមានជ័យ ត្រូវបានដោះស្រាយហើយ
ភ្នំពេញ៖ ពន្ធនាគារឧត្តរមានជ័យ ដែលកំពុងខ្វះខាតទឹកប្រើប្រាស់នោះ ត្រូវបានក្រសួងធនធានទឹក និងឧតុនិយម និងអាជ្ញាធរ ចុះជួយដោះស្រាយហើយ។ នេះបើតាមហ្វេសប៊ុកក្រសួងធនធានទឹក និងឧតុនិយម។
ដើម្បីដោះស្រាយបញ្ហាខ្វះខាតទឹកនេះ រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានសម្រេចឲ្យអាជ្ញាធរជីកស្រះទឹកមួយកន្លែង ទំហំជាង១ហិកតា នៅស្រុកសំរោង ខេត្តឧត្តរមានជ័យ។ បើតាមលោក លឹម គានហោ ទំហំស្រះទឹកនេះ មិនត្រឹមតែអាចផ្គត់ផ្គង់ទឹកដល់ការប្រើប្រាស់នៅក្នុងពន្ធនាគារប៉ុណ្តោះទេ ប៉ុន្តែវាក៏អាចផ្គត់ផ្គង់ទៅដល់កងទ័ព និងប្រជាពលរដ្ឋនៅតំបន់នោះដែរ។
ទាក់ទងនឹងបញ្ហាខ្វះទឹកនេះ អភិបាលខេត្តបន្ទាយមានជ័យលោក ប៉ែន កុសល បានសម្រេចផ្ដល់ទឹកចំនួន១០ម៉ែត្រគូបក្នុងមួយថ្ងៃ សម្រាប់ការផ្គត់ផ្គង់ដល់ការប្រើប្រាស់ប្រចាំថ្ងៃ នៅក្នុងពន្ធនាគារ។ បន្ថែមពីនេះមន្ទីរធនធានទឹក និងឧតុនិយមខេត្ត ក៏ត្រូវទិញស៊ីទែនទឹកចំណុះ ៥ម៉ែត្រគូបចំនួន២ ជាស៊ីទែនបំពាក់លើរថយន្តបែន សម្រាប់ដឹកជញ្ជូនទឹកទៅកាន់ពន្ធនាគារ៕
