សាឡាត់ ស្រីឡាង៖ ផ្លូវជីវិតខ្ញុំមិនខុសពីផ្លូវឡើងកំពូលភ្នំឱរ៉ាល់នោះឡើយ
កញ្ញា សាឡាត់ ស្រីឡាង មើលឃើញថា ដំណើរជីវិតត្រូវឆ្លងកាត់ឧបសគ្គជាច្រើន។ ឆ្លៀតពេលទំនេរពីការសម្តែង តារាវ័យក្មេងដ៏ស្រស់ស្អាតរូបនេះ បានឆ្លងផុតការប្រឈមមួយដែលពលរដ្ឋខ្មែររាល់គ្នាគួរតែធ្វើ។ នោះគឺការឡើងដល់កំពូលភ្នំឱរ៉ាល់ដ៏ខ្ពស់ជាងគេនៅកម្ពុជា។
«ខ្ញុំបានមកដល់កំពូលភ្នំដែលខ្ពស់ជាងគេនៅកម្ពុជាហើយ។ ញើសហូរជោគខ្លួនតែមានកម្លាំងចិត្តឈានទៅមុខ ទោះបីខ្លួនខ្ញុំជាស្រីប៉ុន្តែខ្ញុំអាចធ្វើបាន អ្នកទាំងអស់គ្នាក៏អាចធ្វើបានដែរ»។ នេះជាការលើកឡើងជាមួយនឹងក្តីរំភើបរបស់កញ្ញា សាឡាត់ ស្រីឡាង ដែលទំនងជាតារាស្រីទីមួយ ដែលបានឡើងដល់ភ្នំកម្ពស់១៨១៣ម៉ែត្រ។
ស្រីឡាង ជាតួឯកស្រីក្នុងរឿងភាពយន្ត និងភាគទូរទស្សន៍មួយចំនួនដូចជា «ខ្មោចអាសង្ហា», «វិញ្ញាណទីងមោង», «គូស្នេហ៍បម្រុង» «ទីបញ្ចប់នៃស្នេហ៍»។ តារាវ័យក្មេងដែលមានកំណើតនៅខេត្តកណ្តាលរូបនេះ បានបញ្ជាក់ប្រាប់សារព័ត៌មានថ្មីៗថា ការឡើងទៅដល់កំពូលភ្នំឱរ៉ាល់ គឺជាការទទួលបាននូវបទពិសោធន៍ដ៏អស្ចារ្យក្នុងជីវិត។
«ផ្លូវជីវិតខ្ញុំដូចផ្លូវឡើងទៅកំពូលភ្នំឱរ៉ាល់។ ឡើងចុះឡើងចុះ កាត់ព្រៃ ក្ដៅត្រជាក់ មានគ្រប់រសជាតិ អ្វីគ្រប់យ៉ាងគឺត្រូវពឹងលើខ្លួនឯងជាជំហរ ដើរបណ្តើរ ស្ទើរតែយំបណ្ដើរ ដល់កន្លែងលំបាកខ្លះអាចមានអ្នកជួយ កន្លែងខ្លះគឺត្រូវជួយខ្លួនឯង ត្រឡប់មកវិញកាន់តែស្គាល់រសជាតិជីវិតបន្ថែមទៀត»។ នេះជាការរៀបរាប់របស់ស្រីឡាង ក្នុងគណនីហ្វេសប៊ុករបស់ខ្លួន ដោយដាក់ hashtag ខ្លួនឯងថា ជា #កញ្ញាព្រៃឫស្សី។
កញ្ញាព្រៃឫស្សី រាងស្លីម ខ្ពស់ស្រឡះ រូបនេះ បានចំណាយពេល២យប់៣ថ្ងៃក្នុងដំណើរផ្សងព្រេងទៅកាន់កំពូលភ្នំឱរ៉ាល់ កាលពីអំឡុងថ្ងៃទី២០ ខែមករា។ តារារូបនេះ ស្ថិតក្នុងចំណោមនារី៤នៃសមាជិកសរុប១៩នាក់ ដែលរួមដំណើរជាមួយគ្នា។ ក្នុងនោះ មាន លោក តាន់ គឹមសួរ ដែលជាអ្នករៀបចំកម្មវិធីសង្គមដ៏ល្បីល្បាញម្នាក់ និងជាអ្នកដែលមានបទពិសោធន៍ឡើងភ្នំឱរ៉ាល់ច្រើនលើកផងដែរ។
សូមទស្សនារូបភាពដែលផ្តល់ដោយកញ្ញា សាឡាត់ ស្រីឡាង ដូចខាងក្រោម៖
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com