ចម្ការ​ឈូករ័ត្ន និង​ស្បៃរឿង​សម្រាប់​ចិញ្ចឹម​ឃ្មុំ​របស់លោក ប៉ត សុផល ក្លាយជា​កន្លែង​ថតរូប​ដ៏​ពេញនិយម​

30/11/-0001 12:00 am ត្បូងឃ្មុំ

​ត្បូងឃ្មុំ​៖ សួនផ្កា​ឈូករ័ត្ន និង​ផ្កាស្បៃរឿង​ដែល​លោក ប៉ត សុផល ដាំ​សម្រាប់​ចិញ្ចឹមសត្វ​ឃ្មុំ​នៅ​ខេត្ត​ត្បូងឃ្មុំ កំពុងតែ​រីក​ស្គុសស្គាយ​ពាសពេញ​ដីចម្ការ​ទំហំ​៥​ហិកតា ដែល​ធ្វើ​ឲ្យ​ភ្ញៀវទេសចរ​ចេញចូល​ឥតឈប់ឈរ​។ ភ្ញៀវទេសចរ​ភាគច្រើន​ជា​យុវជន បាន​ទៅ​លំហែកាយ និង​ខ្លះទៀត​ទៅ​ផ្តិត​រូបភាព​ដ៏​ស្រស់បំព្រង​នៃ​សួនផ្កា​មួយ​នេះ​។​


​ចម្ការ​ឈូករ័ត្ន និង​ស្បៃរឿង​មួយកន្លែង កំពុង​អន្ទង​ចិត្ត​ភ្ញៀវទេសចរ ទាំង​ជិត​ឆ្ងាយ​ឲ្យ​មក​គយគន់​ទេសភាព​ផ្កា​រីក​ដ៏​ស្រស់បំព្រង​នៃ​ចម្ការ​ផ្កា​មួយ​នេះ​។ ភ្ញៀវទេសចរ​ដែល​មក​ទីនេះ អាច​សម្រាក​លំហែកាយ និង​ទទួលយក​នៅ​អារម្មណ៍​ស្រស់ស្រាយ​ជាមួយនឹង​ខ្យល់អាកាស​បរិសុទ្ធ​តាមបែប​ធម្មជាតិ​។ ចម្ការ​ឈូករ័ត្ន និង​ស្បៃរឿង​ដ៏​ស្រស់ស្អាត​ខាងលើនេះ មាន​ទីតាំង​ស្ថិតនៅ​ភូមិ​ជី​រោទិ៍​ក្រោម​ទី​២ ឃុំ​ជី​រោទិ៍​ទី​១ ស្រុក​ត្បូងឃ្មុំ ខេត្ត​ត្បូងឃ្មុំ​។​

 
 
​លោក ប៉ត សុផល ម្ចាស់​ចម្ការ​ផ្កាឈូករ័ត្ន និង​ផ្កាស្បៃរឿង ចំណាយ​ផ្ទៃដី​ប្រមាណ ៥​ហិកតា ដើម្បី​ដាំ​ផ្កា​ទាំងនេះ​សម្រាប់​ចិញ្ចឹម​ឃ្មុំ និង​ទាក់ទាញ​ភ្ញៀវទេសចរ​មក​កម្សាន្ត​។ ម្ចាស់​ចម្ការ​រូបនេះ បាន​ចំណាយ​ថវិកា​ប្រមាណ​៣​ម៉ឺន​ដុល្លារ សាងសង់​ផ្ទះមួយ​ធ្វើ​ពី​ឫស្សី និង​មានភ្ជាប់ WiFi ទៀតផង សម្រាប់​ភ្ញៀវ​សម្រាក់​នៅក្នុង​ផ្ទះ​នោះ​។​

​លោក សុផល ប្រាប់ ThmeyThmey 25 ថា ផ្កាឈូករ័ត្ន និង​ផ្កាស្បៃរឿង​នេះ ត្រូវ​ចំណាយពេល​ដាំ​ចន្លោះ​ពី ២​ទៅ​៥​ខែ ព្រោះ​ពេលខ្លះ​ផ្កា​ទាំងនេះ ដាំ​ហើយ​ខូចខាត​អស់​ក៏មាន ដោយសារតែ​សត្វល្អិត​បំផ្លាញ និង​មាន​ភ្លៀង​ធ្លាក់​ខ្លាំង​។ បើទោះបី​ផ្កា​ទាំងនេះ ត្រូវបាន​សត្វល្អិត​បំផ្លាញ​ក៏ដោយ ក៏​លោក សុផល មិនអាច​ប្រើប្រាស់​ថ្នាំ​គីមី ដើម្បី​កម្ចាត់​សត្វល្អិត​បានទេ ព្រោះ​វា​មាន​ផលប៉ះពាល់​ទៅដល់​សត្វ​ឃ្មុំ​ដែល​លោក​ចិញ្ចឹម​៕
 

ព័ត៌មានទាក់ទង