ផលិតផលនាំចេញពីតំបន់សេដ្ឋកិច្ចកម្ពុជា ទៅអន្តរជាតិ មានជាង១,៤ពាន់លានដុល្លារ ក្នុងឆ្នាំ២០១៨
ភ្នំពេញ៖ កម្ពុជា បាននាំចេញផលិតផលពីតំបន់សេដ្ឋកិច្ចកម្ពុជា ទៅទីផ្សារអន្តរជាតិ មានទឹកប្រាក់សរុប ១.៤១០.០៨២.២៧៨ដុល្លារ ក្នុងឆ្នាំ២០១៨។ ផលិតផលទាំងនោះមាន កង់ សំលៀកបំពាក់ ស្បែកជើង និងផលិតផលផ្សេងៗទៀត។ នេះបើយោងតាមរបាយការណ៍បូកសរុបការងារឆ្នាំ២០១៨ និងលើកទិសដៅថ្មីឆ្នាំ២០១៩ របស់ក្រសួងពាណិជ្ជកម្ម។
ផលិតផលពីតំបន់សេដ្ឋកិច្ចពិសេសកម្ពុជា ទៅទីផ្សារអន្តរជាតិ រួមមាន សហរដ្ឋអាមេរិក ក្នុងទឹកប្រាក់ជាង ៣៤៤លានដុល្លារ ប្រទេសកាណាដា ជាង៣៤លានដុល្លារ ប្រទេសអង់គ្លេស មានជាង៨៣លានដុល្លារ ទីផ្សារសហគមអឺរ៉ុប ជាង៣៦២លានដុល្លារ និងក្រៅសហគមអឺរ៉ុបជិត៦លានដុល្លារ។ ដោយឡែក ទីផ្សារអាហ្វ្រិក មានជាង២,៥លានដុលា្លរ ទីផ្សារអាស៊ាន និងក្រៅអាស៊ាន មាន៥៥៦លានដុល្លារ និងប្រទេសផ្សេងៗ មានជាង២១លានដុល្លារ។
សូមបញ្ជាក់ថា ទំហំពាណិជ្ជកម្មកម្ពុជា ក្នុងឆ្នាំ២០១៨ ទៅកាន់១៤៧ប្រទេស មានចំនួន២៤ ៩៨៥លានដុល្លារ។ ក្នុងនោះ ការនាំចេញ មាន១១ ២១៤លានដុល្លារ និងការនាំចូលមាន ១៣ ៧៧១លានដុល្លារ៕
