ការប្រណាំងកង់ភ្នំជុំចុងក្រោយនៅគិរីរម្យមានអ្នកចូលរួមប្រមាណ៣០០នាក់
អត្តពលិកជាតិ និងអន្តរជាតិជិត៣០០នាក់ចូលរួមប្រកួតប្រជែងក្នុងព្រឹត្តិការណ៍ប្រណាំងកង់ភ្នំ MTB Series 2018 ជុំចុងក្រោយនៅលើភ្នំគីរីរម្យ ដែលបានបញ្ចប់យ៉ាងជោគជ័យប្រកបដោយភាពសប្បាយរីករាយ កាលពីថ្ងៃអាទិត្យសប្តាហ៍មុខ។ ចំនួននេះមានការកើនឡើង បើធៀបនឹងការប្រកួតជុំទី៤នៅភ្នំប្រសិទ្ធិ៍ ដែលមានប្រមាណជា១៥០នាក់។ ការប្រណាំងលើស្ថានភាពផ្លូវបត់បែនជាមួយឧបសគ្គឡើងចុះ អបដោយព្រៃប្រឹក្សា ពិសេសដើមស្រល់នៅសងខាងផ្លូវ បានក្លាយជាកត្តាទាក់ទាញដ៏សំខាន់សម្រាប់ព្រឹត្តិការណ៍នេះ។
លោកឧកញ៉ា វង្ស ខាន់ពៅ អគ្គលេខាធិការសហព័ន្ធកីឡាទោចក្រយានកម្ពុជាបានវាយតម្លៃខ្ពស់ថា ការប្រកួតជុំចុងក្រោយនេះកីឡាករកីឡាការិនីមានសមត្ថភាព និងបច្ចេកកើនឡើងគួរឲ្យកត់សម្គាល់ បើធៀបនឹងការប្រកួត៤ជុំកន្លងមក។ ការកើនឡើង ក៏ដោយសារការប្រកួតបានប្រព្រឹត្តទៅយ៉ាងរលូន ពុំមានបញ្ហាណាមួយកើតឡើងនោះទេ ទោះបីផ្លូវប្រណាំងមានស្ថានភាពលំបាកយ៉ាងណាក៏ដោយ។
ក្នុងបទសម្ភាសជាមួយអ្នកសារព័ត៌មានក្រោយការប្រកួត លោកឧកញ៉ា វង្ស ខាន់ពៅ វាយតម្លៃដូច្នេះថា៖«ការប្រកួតជុំចុងក្រោយនៅគីរីរម្យ យើងសង្កេតឃើញថា ការរៀបចំមានលក្ខណៈល្អប្រសើរជាងមុខ ហើយការប្រកួតប្រព្រឹត្តទៅយ៉ាងរលូន ពិសេសសមត្ថភាព និងបច្ចេកទេសរបស់កីឡាករកីឡាការិនីមានការរីកចម្រើនគួរឲ្យកត់សម្គាល់។ ខ្ញុំគិតថា គីរីរម្យជាទីតាំងល្អជាងគេ គឺផ្លូវប្រណាំងមានស្ថានភាពល្អប្រសើរ និងខ្យល់អាកាសបរិសុទ្ធ ដែលអំណោយផលដល់កីឡាករកីឡាការិនី និងការរៀបចំ»។
ជាមួយភាពជោគជ័យនៅឆ្នាំនេះ អគ្គលេខាធិការខាងលើបានអះអាងថា លោកនឹងពង្រីកព្រឹត្តិការណ៍ប្រណាំងកង់ Cambodia MTB Series ឲ្យកាន់តែធំថែមទៀតនៅឆ្នាំក្រោយ ដោយលោកគ្រោងរៀបចំនៅបណ្តាខេត្តផ្សេងៗពីទីតាំងនៅឆ្នាំនេះ។ លោកបន្ថែមថា ការពង្រីកនេះអាចប្រព្រឹត្តទៅបាន គឺអាស្រ័យលើទំហំនៃការឧបត្ថម្ភរបស់ដៃគូសហការ និងម្ចាស់ឧបត្ថម្ភ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com