កូនសត្វខ្ទីងមួយក្បាលទើបតែកើត ទទួលការថែទាំពីអ្នកសង្គ្រោះសត្វព្រៃ នៅភ្នំតាម៉ៅ
ភ្នំពេញ៖ កូនសត្វខ្ទីងឈ្មោលមួយក្បាលដែលទើបកើត ត្រូវបានក្រុមអ្នកសង្គ្រោះសត្វព្រៃប្រទះឃើញ នៅរមណីយដ្ឋានភ្នំតាម៉ៅ ខេត្តតាកែវ។ កូនសត្វខ្ទីងមួយក្បាលដែលបានកើតនោះ មានការថែទាំយ៉ាងយកចិត្តទុកដាក់ ពីអ្នកថែរក្សាសត្វព្រៃ។ នេះបើតាមទីភ្នាក់ងារសារព័ត៌មានកម្ពុជា(AKP)។
អ្នកអភិរក្សសត្វព្រៃ បានយកមេសត្វខ្ទីងមួយក្បាល ទៅបង្កាត់អស់រយៈពេលជាយូរហើយ ទើបបានបង្កើតកូនខ្ទីងឈ្មោលមួយក្បាល ដែលវាជាសញ្ញាជោគជ័យនៃការអភិរក្សសត្វមួយប្រភេទនេះ។
សត្វខ្ទីង ងាយទទួលនូវការគំរាមកំហែងយ៉ាងខ្លាំង ពីអ្នកប្រមាញ់សត្វព្រៃ ដើម្បីយកសាច់ ស្នែង ឆ្អឹង និងការជួញដូរ ដែលជាហេតុធ្វើឲ្យមានការវិនាសផុតពូជជាសកល។ សត្វខ្ទីង ភាគច្រើនរស់នៅក្នុងខេត្តកោះកុង ខេត្តពោធិ៍សាត់ (ជួរភ្នំក្រវាញ) និង ខេត្តកំពង់ស្ពឺ ។ សត្វប្រភេទនេះ ស្ថិតនៅក្នុងបញ្ជីក្រហម IUCN (VU) ជាប្រភេទងាយរងគ្រោះជាសកល នៅក្នុងឧបសម្ព័ន្ធទី១ នៃអនុសញ្ញាសាយតេស៕
