អ្នកស្រី វានី រកចំណូលបានជាង ១ពាន់ដុល្លារក្នុងមួយខែ ពីការបណ្តុះផ្សិតអំបោះលក់
បាត់ដំបង៖ រយៈពេលជាង ២ឆ្នាំហើយដែលអ្នកស្រី ហម វានី និងស្វាមី ប្រកបមុខរបរបណ្តុះផ្សិតអំបោះលក់។ ផ្សិតអំបោះដែលស្ត្រីវ័យ៤៦ឆ្នាំរូបនេះ បណ្តុះបាន ភាគច្រើនលក់ឱ្យម៉ូយរបស់អ្នកស្រី ដែលពួកគេយកទៅធ្វើជាផ្សិតបំពងសម្រាប់លក់ និងខ្លះទៀតយកទៅលក់នៅផ្សារបាណន់ និងផ្សារនៅឯក្រុងបាត់ដំបង។ ក្នុងមួយខែអ្នកស្រីអាចរកចំណូលបានពីអាជីវកម្មមួយនេះជាង ១ពាន់ដុល្លារ។
នៅក្នុងភូមិបាណន់ មានតែគ្រួសារអ្នកស្រី វានី ប៉ុណ្ណោះដែលបណ្តុះផ្សិតអំបោះលក់។ អ្នកស្រី ហម វានី និងលោក យឿន ចាន់ថៃ ដែលជាប្តីប្រពន្ធរស់នៅឃុំកន្ទឺ២ ស្រុកបាណន់ ខេត្តបាត់ដំបង បណ្តុះផ្សិតអំបោះម្តងចំនួន ១ម៉ឺនថង់សម្រាប់លក់ឱ្យម៉ូយរបស់ខ្លួន។
ដំណាក់កាលនៃការច្រកមេផ្សិតដែលបានលាយរួច អ្នកស្រី វានី ប្រាប់ ThmeyThmey 25 ថា ត្រូវចំណាយប្រាក់ជួលគេច្រកអស់ជាង ១លានរៀល និងជាង ៤០ម៉ឺនរៀលទៀត ចំណាយទៅលើជួលអ្នកជញ្ជូនមេផ្សិតដែលបានច្រករួចនោះ ទៅតម្រៀបជាជួរនៅក្នុងរោងបណ្តុះផ្សិតរបស់អ្នកស្រីដែលនៅខាងក្រោយផ្ទះ។
«ក្នុងមួយថ្ងៃខ្ញុំលក់ផ្សិតអំបោះនេះបានចន្លោះពី ១០ ទៅ ២០ម៉ឺនរៀល អាស្រ័យទៅលើផ្សិតដុះបានច្រើន ឬតិច» នេះជាការបញ្ជាក់របស់ស្ត្រីវ័យ៤៦ឆ្នាំរូបនេះ មុននឹងអ្នកស្រីបន្តទៀតថា បើលក់ទូទៅផ្សិត ១គីឡូក្រាមតម្លៃ ៤ពាន់រៀល ប៉ុន្តែ បើលក់ឱ្យម៉ូយ ១គីឡូក្រាមក្នុងតម្លៃត្រឹមតែ ៣ពាន់រៀលប៉ុណ្ណោះ។ ក្រៅពីបណ្តុះផ្សិតលក់ នៅផ្ទះរបស់អ្នកស្រី ហម វានី ក៏មានលក់មេផ្សិតផងដែរ ដោយមួយកញ្ចប់តម្លៃ ១ម៉ឺនរៀល។ ជាមធ្យមគ្រួសារដែលមានកូនប្រុស ២នាក់រូបនេះអាចរកចំណូលពីអាជីវកម្មបណ្តុះផ្សិតអំបោះលក់បានប្រមាណ ១ពាន់ដុល្លាក្នុងមួយខែ។
ស្ត្រីដែលបានរៀនរបៀបបណ្តុះផ្សិតអំបោះពីបងប្អូនរបស់ខ្លួនកាលពីជាង២ឆ្នាំមុនរូបនេះ បានពន្យល់ពីបច្ចេកទេសបណ្តុះផ្សិតនេះយ៉ាងដូច្នេះថា ធាតុផ្សំរបស់វាមានដូចជា ស្នូលពោត, កំបោរ, ម្សៅដំណើប, អង្ករដំណើប និងកន្ទក់លាយបញ្ចូល ទើបគ្នាបង្កើតបានជាមេផ្សិត។ គ្រឿងផ្សំទាំងនេះអ្នកស្រីត្រូវចំណាយប្រាក់ទិញម្តងអស់ប្រមាណ១ពាន់ដុល្លារ។ បន្ទាប់មកត្រូវយកមេផ្សិតដែលបានលាយរួចនោះ ច្រកដាក់ក្នុងថង់ផ្លាស្ទិក ហើយយកវាទៅតម្រៀបតម្រួតគ្នាជាជួរនៅក្នុងរោង ដោយត្រូវថែទាំយ៉ាងយកចិត្តទុកដាក់ ទាំងការឱ្យទឹក និងការគ្រប់គ្រងសីតុណ្ហភាពជាដើម។
អ្នកស្រី ហម វានី បានបញ្ជាក់ពីរយៈពេលនៃការទទួលផលផ្សិតអំបោះនេះថា ក្រោយពីច្រក, តម្រៀបដាក់ក្នុងរោង និងមើលថែវាក្នុងរយៈពេលមួយសប្តាហ៍ គឺប្រមូលផលបានហើយ។ ហើយក្នុងមួយសប្តាហ៍អាចកាត់លក់បានម្តងរហូតដល់រយៈពេល ៦ខែ ទើបវាឈប់ចេញ។ ៦ខែបន្ទាប់អាជីវករូបនេះត្រៀមផ្សំមេផ្សិតសម្រាប់បណ្តុះវាម្តងទៀត។
ដើម្បីទទួលបាន ព័ត៌មានទាក់ទងនឹងវិស័យកសិកម្ម, ផលិតផលអត្តសញ្ញាណ, ជំនួញខ្នាតតូច និងមធ្យម, បរិស្ថាន និងទេសចរណ៍ សូមចុច Download App «ថ្មីៗ២៥ រាជធានី-ខេត្ត» សម្រាប់ប្រព័ន្ធ IOS: https://apple.co/2ub9pdj និង Android: http://bit.ly/2KSe1MB ។ ការផ្សព្វផ្សាយព័ត៌មានទាំងនេះ ក៏មាននៅលើទំព័រហ្វេសប៊ុក Thmey Thmey 25 និង YouTube Channel: https://goo.gl/D6xQBv ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com