ជំនន់ទឹកភ្លៀង បណ្ដាលឱ្យ ខេត្ត៥ និងប្រជាជនជាង ៣ពាន់គ្រួសារ រងការប៉ះពាល់ខ្លាំង
ភ្នំពេញ៖ ជំនន់ទឹកភ្លៀងនៅដើមខែកក្កដា ទូទាំងប្រទេសបានបណ្ដាលឱ្យ ខេត្តកោះកុង ព្រះសីហនុ កំពត កំពង់ស្ពឺ និងបាត់ដំបង សរុបមាន១២ស្រុក ដែលមានប្រជាជនសរុប ៣៨២៦គ្រួសារ បានរងការប៉ះពាល់ពាល់យ៉ាងខ្លាំង។ នេះបើតាមការឱ្យដឹងពីលោក កែវ វី អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយ។ លោក បន្តថា ប្រជាជនចំនួន ១០៧៩គ្រួសារត្រូវបានជម្លៀសទៅទីមានវត្ថិភាព ដោយខូចខាតផ្ទះ ៦ខ្នង សាលារៀន ៨កន្លែង វត្ត២ និងវិហារចាម២ ហើយក្រៅនេះ បាត់គោ១៤ក្បាល ទឹកជន់លិចដីស្រែចម្ការសរុប ៣៩២៥ហិកតា ក្នុងចំនួននេះខូចខាត ៤៣ហិកតា។
ជំនន់ទឹកភ្លៀងនេះដែរ ក៏មានការខូចខាត ស្ពាន១ ក្នុងចំនួន៥ និងស្រះចិញ្ចឹមត្រី៧ ខូចខាត២ បាត់ទូក២គ្រឿង។ នេះជាការបន្ថែមរបស់លោក កែវ វី។ លោក បានបញ្ជាក់ថា៖«ក្នុងចំណោមខេត្តទាំង៥ មានខេត្តកំពត កោះកុង កំពង់ស្ពឺ រងប៉ះពាល់ខ្លាំងជាងគេ ពីព្រោះទឹកទើបតែជន់លិច ខណៈដែលខេត្តដទៃទៀត ទឹកបានស្រក។ ចំពោះទឹកហូរជន់លិចផ្លូវនេះដែរ ផ្លូវលំមួយចំនួន ដែលមានប្រហែលពី៧០ ទៅ៨០ខ្សែ ក៏រងផលប៉ះពាល់ផងដែរ។ បញ្ហានេះក្រសួងជំនាញបានចុះពិនិត្យហើយ តែការវាយតម្លៃទំហំនៃការខូចខាត គឺនៅពេលដែលទឹកស្រកអស់»។
អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយ បានលើកឡើងថា ក្រៅពីខេត្តទាំង៥ខាងលើ ក៏មានខេត្តមួយចំនួនទៀតរងការប៉ះពាល់ដោយសារជំនន់ទឹកភ្លៀងបន្តិបន្តួចផងដែរ ដូចជា ប៉ៃលិន កែប និងរតនគិរី។ ជាមួយគ្នានេះខេត្តដែលស្ថិតនៅជាប់ទន្លេមេគង្គ ក៏ត្រូវមានការប្រុងប្រយ័ត្នផងដែរ។ លោក បញ្ជាក់យ៉ាងដូច្នេះថា៖«ទឹកទន្លេមេគង្គមានការ កើនឡើងច្រើនបណ្ដាលមកពី ប្រព័ន្ធរងសម្ពាធទាបធ្វើឱ្យមានភ្លៀងធ្លាក់ច្រើននៅអាងទន្លេមេគង្គលើ។ ដើម្បីចៀសវាងជាយថាហេតុណាមួយ ក្រសួងពាក់ព័ន្ធ ក៏ដូចជា អាជ្ញាធរមូលដ្ឋានបានចេញសេចក្ដីប្រកាស ឬជូនជាព័ត៌មានទៅប្រជាពរដ្ឋឱ្យមានការប្រុងប្រយ័ត្នជាមុន»។
លោក កែវ វី បន្ថែមទៀតថា បច្ចុប្បន្ន មិនទាន់មានបញ្ហាអ្វីគួរឱ្យកត់សម្គាល់នៅឡើយទេ ដោយសារកម្ពស់ទឹកនៅមិនទាន់ឡើងដល់ចំណុចត្រូវប្រកាសអាសន្នទេ ហើយកម្ពស់ទឹកអាចឡើងពី ២ ទៅ៣ ម៉ែត្រទៀត អាចដល់ចំណុចត្រូវប្រុងប្រយ័ត្ន។ ហើយក្រសួងធនធានទឹក ក៏ធ្លាប់ចេញសេចក្ដីប្រកាសរួចមកហើយ ចំពោះប្រជាពរដ្ឋដែលនៅតាមទីទំនាប តាមទន្លេមេគង្គលើ ត្រូវរួសរាន់ប្រញាប់ប្រមូលផល កុំឱ្យមានការខូខាតច្រើនពេលទឹកជន់ឡើងធំ។ ទឹកជន់ឡើងតាមដងព្រែក អូរ តាមបណ្ដាខេត្តមួយចំនួនភាគច្រើនមកពីទឹកភ្លៀង ហើយទន្លេមេគង្គលើដែលនៅកម្ពុជាឡើង ជាទឹកភ្លៀងដែលធ្លាក់មកពីអាងទន្លេមេគង្គលើប្រទេសថៃ និងឡាវ ដោយក្នុងមួយថ្ងៃអាចឡើងពី១០សង់ទីម៉ែត្រទៅ ៥០សង់ទីម៉ែត្រ ជារៀងរាល់ថ្ងៃ។ នេះជាការលើកឡើងបន្ថែមរបស់ លោក កែវ វី ដោយបានបញ្ជាក់ថា៖«ទឹកទន្លេមេគង្គនឹងចាប់ផ្ដើមស្រកទៅវិញនៅដើមខែតុលា»។
លោក បន្ថែមចុងក្រោយថា ចំពោះវិធានការទប់ស្កាត់គ្រោះមហន្តរាយដោយសារជំនន់ទឹកភ្លៀងនេះ អាជ្ញាធរមូលដ្ឋានក៏ដូចជារដ្ឋាភិបាល បានត្រៀមកម្លាំងបម្រុងក្នុងការជួយសង្គ្រោះជាមុន គ្រប់មធ្យោបាយនៅពេលមានហេតុការណ៍កើតឡើង មានស្បៀង និងសម្ភារផ្សេងៗមួយចំនួន៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com