អចលនទ្រព្យនៅកំពតមានសន្ទុះខ្លាំង ស្របនឹងវត្តមានគម្រោងអភិវឌ្ឍន៍តាមឆ្នេរកើនឡើង
ខេត្តកំពតមានទីតាំងភាគខាងត្បូងនៃប្រទេសកម្ពុជា បានទាក់ទាញចំណាប់អារម្មណ៍អ្នកវិនិយោគយ៉ាងខ្លាំងក្នុងពេលបច្ចុប្បន្ន ដោយសារតែគម្រោងអភិវឌ្ឍន៍ធំៗ មានវត្តមានកាន់តែច្រើននៅក្នុងខេត្តនេះ។
គម្រោងអន្ដរជាតិខ្នាតធំលើកដំបូង បានចូលមកក្នុងតំបន់នេះ ត្រូវបានស្គាល់ថាជាគម្រោង French Riviera Marina ដែលមានតម្លៃសរុប ២៣,២ ពាន់លានដុល្លារ ត្រូវសាងសង់តាមបណ្តោយឆ្នេរសមុទ្រខេត្តកំពត និងកែប។
ក្រុមហ៊ុនអភិវឌ្ឍន៍ក្រុមហ៊ុន Pallas Group ធ្លាប់លើកឡើងថា គម្រោងFrench Riviera Marina នៅកំពត នឹងផ្តល់នូវសហគមន៍ទេសចរណ៍មាត់សមុទ្រមួយ ប្រកបដោយសុវត្ថិភាព ដោយមានសណ្ឋាគារ វីឡា អាផាតមេន ឆ្នេរសិប្បនិម្មិតឯកជន ទីលានវាយកូនហ្គោល ឧទ្យានកម្សាន្ត និងផ្សារទំនើប រួមជាមួយសេវាកម្មផ្សេងៗជាច្រើនទៀត។ គម្រោងនេះ ក៏នឹងមានសាលារៀន មណ្ឌលសុខភាព និងផ្នែកខ្លះរបស់គម្រោង ត្រូវបានតភ្ជាប់គ្នា ដោយព្រែកជីក និងកន្ត្រកខ្សែកាបសម្រាប់ធ្វើដំណើរ។
ក្រុមហ៊ុន Pallas Group មានបំណងឲ្យខេត្តកំពត ក្លាយជាតំបន់ទេសចរណ៍លំដាប់ពិភពលោក។ យោងតាមគេហទំព័ររបស់ក្រុមហ៊ុននេះ តំបន់នេះ កាន់កាប់ដីទំហំ ៦,០៥៦ ហិកតា តាមបណ្តោយឈូងសមុទ្រថៃ ខណៈឯកសាររបស់ក្រុមហ៊ុន បង្ហាញដោយសារព័ត៌មាន Kyodo បានឲ្យដឹងថា មានគម្រោងអភិវឌ្ឍន៍តូចមួយទៀត នៅខេត្តកែប គ្របដណ្តប់លើផ្ទៃដី ១៤៤ហិកតា។
អនុប្រធានក្រុមហ៊ុន លោកស្រី Siriluck Choochart មានប្រសាសន៍ថា គម្រោង Riviera Marina និង Kep Marina នឹងក្លាយជាគោលដៅលំដាប់ថ្នាក់ពិភពលោក សម្រាប់ការរស់នៅ អាជីវកម្ម ទេសចរណ៍ និងផលិតភាពយន្ត។ ក្រុមហ៊ុន Pallas នឹងបង្កើតការងាររាប់ពាន់កន្លែងក្នុងពេលសាងសង់ មានមនុស្សជាង ៥០.០០០នាក់ធ្វើការនៅកន្លែងផ្ទាល់ និងមនុស្សរាប់ពាន់នាក់ទៀត ទទួលបានឱកាសការងារដោយប្រយោល សម្រាប់សេវាកម្មអភិវឌ្ឍន៍នេះ។
លោកស្រី Choochart បានបន្ថែមថា៖ «គម្រោងនីមួយៗរបស់យើង ត្រូវបានរចនាឡើងស្របគ្នា ជាមួយលក្ខណៈធម្មជាតិ ដោយប្រើប្រាស់វិធីសាស្ត្រសាងសង់ស្តង់ដារទំនើប និងសម្ភារដែលមានគុណភាពខ្ពស់បំផុត នឹងផ្តល់ជូននៅភាពឯកជន និងប្រណីតភាព»។
បន្ថែមលើគម្រោងនេះ លោក សុខ គែន ស្ថាបនិកនៃក្រុមហ៊ុន Kampot Property បានមានប្រសាសន៍ថា កំពតនឹងក្លាយជាគោលដៅទេសចរណ៍ទាក់ទាញបំផុតមួយ នៅកម្ពុជានាពេល ឆាប់ៗខាងមុខ ដោយមានភ្ញៀវទេសចរជាតិ និងអន្តរជាតិជាច្រើននាក់ មកកម្សាន្តជារៀងរាល់ឆ្នាំ។
គម្រោងធំបំផុតរបស់បារាំង Riviera Marina បានជំរុញយ៉ាងខ្លាំង ដល់ប្រតិបត្តិការអចលនទ្រព្យនៅក្នុងខេត្ត ជាមួយនឹងតម្លៃដីកើនឡើងគួរឲ្យកត់សម្គាល់ ពីមួយខែ ទៅមួយខែ។ គម្រោងនេះ នឹងបង្វែរខេត្តនេះ ទៅជាទីក្រុងដ៏ទាក់ទាញ និងមានភាពទាន់សម័យ ដោយមានគម្រោងលំនៅដ្ឋាន ពាណិជ្ជកម្ម និងទេសចរណ៍ ដែលដើរតួយ៉ាងសំខាន់ ក្នុងការនាំនូវគម្រោងអភិវឌ្ឍផ្សេងទៀត មកកាន់ខេត្តនេះ។
គម្រោងអភិវឌ្ឍដទៃទៀត ដូចជា បុរី រមណីយដ្ឋាន សណ្ឋាគារ និងកន្លែងកម្សាន្ត នឹងបន្តជំរុញ កំណើនអចលនទ្រព្យនៅកំពត។ មានគម្រោងអភិវឌ្ឍជាច្រើន កំពុងដំណើរនៅក្នុងខេត្តកំពតដោយអ្នកវិនិយោគសំខាន់ៗ មកពីតំបន់អឺរ៉ុប និងចិន។ ក្រៅពីវិនិយោគិនអឺរ៉ុប និងចិន ក៏មានប្រជាជនក្នុងស្រុកជាច្រើន ចាប់អារម្មណ៍ទិញដីនៅក្នុងខេត្ដនេះផងដែរ។
លោក គែន បានលើកឡើងថា ដីមានសក្តានុពលមាន៣ ប្រភេទគឺ ដីឆ្នេរ ដីតាមមាត់ព្រែក និងដីជើងភ្នំ។ ដីនៅតាមមាត់ព្រែក កំពុងមានកំណើនឡើងគួរឲ្យកត់សម្គាល់ ដែលមានតម្លៃចាប់ពី ៦០ ដុល្លារ ទៅ២៥០ ដុល្លារក្នុងមួយម៉ែត្រការ៉េ។
ក្នុងឆ្នាំ២០១៦ ខេត្តកំពតមានទេសចរបរទេស ប្រហែល៩០ម៉ឺននាក់។ តាមរបាយការណ៍របស់ធនាគារអភិវឌ្ឍន៍អាស៊ីថ្មីៗនេះ កំពង់ផែទេសចរណ៍តម្លៃ១៨លានដុល្លា នឹងដាក់ឲ្យប្រើប្រាស់ នៅឆ្នាំ២០១៩ ។ តាមរយៈកំពង់ផែទេសចរណ៍នេះ គេរំពឹងថា នឹងផ្តល់សេវាកម្មដល់ភ្ញៀវទេសចរជាតិ-អន្តរជាតិ ៣,៦ម៉ឺននាក់ ក្នុងមួយឆ្នាំៗ។
លោក ម៉ម សិរីបញ្ញា អគ្គនាយករបស់ក្រុមហ៊ុន Easy Property Investment បាននិយាយថា«៖អចលនទ្រព្យនៅខេត្តកំពត មានការកើនឡើងយ៉ាងឆាប់រហ័ស ដោយសារតែមានអ្នកវិនិយោគជាតិ-អន្តរជាតិជាច្រើន នាំគ្នាទិញអចលនទ្រព្យ នៅក្នុងខេត្តកំពត ជាមួយតម្លៃសមរម្យ។ ភាគច្រើនអ្នកវិនិយោគជាតិ ចូលចិត្តទិញដី និងផ្ទះ នៅតាមមាត់ព្រែកកំពត។
ខេត្តកំពត បានទទួលការចាប់អារម្មណ៍ខ្លាំងពីវិនិយោគិន ខណៈពេលដែលតម្លៃដី នៅក្រុងព្រះសីហនុ ក្បែរឆ្នេរសមុទ្រកើនឡើងយ៉ាងខ្លាំង ដោយសារមានលំហូរវិនិយោគិនចិន ដែលកំពុងទិញដី ក្នុងតម្លៃខ្ពស់ជាងវិនិយោគិនក្នុងស្រុក និងវិនិយោគិនផ្សេងៗ។
លោក Brad King ជាផ្នែកមួយនៃ Kohrong Property.com និយាយថា ការរំពឹងទុកពីវិនិយោគិនជាពិសេសចិន កំពុងជំរុញឲ្យតម្លៃដីនៅខេត្តព្រះសីហនុកើនឡើងខ្ពស់ ជាងដីឡូតិ៍ ដែលស្រដៀងគ្នា នៅប្រទេសថៃ និងហ្វីលីពីន។ តម្លៃដីនៅតាមបណ្តោយឆ្នេរខេត្តព្រះសីហនុជាមធ្យម ជាង ១.០០០ ដុល្លារ ក្នុងមួយម៉ែត្រការ៉េ។
លោក សិរីបញ្ញា បានបន្ថែមថា ការប្រតិបត្តិការអចលនទ្រព្យនៅខេត្តកំពត បានកើនឡើងគួរឲ្យកត់សម្គាល់ បើប្រៀបធៀបទៅនឹងឆ្នាំកន្លងទៅ ជាមួយការកើនឡើងនៃទីផ្សារលក់ និងទិញខ្ពស់ជាងទីផ្សារជួល។ ការវិនិយោគ បានចូលមកខេត្តកំពតគួរឲ្យកត់សម្គាល់ ដោយសារមានគម្រោងធំៗមួយចំនួន ដូចជាគម្រោងអភិវឌ្ឍម៍កំពង់ផែសមុទ្រ។ ដើម្បីទាក់ទាញវិនិយោគិនបន្ថែមទៀត ចូលទៅក្នុងតំបន់នេះ ចាំបាច់ត្រូវបង្កើតរោងចក្រ និងពង្រីកកន្លែងទេសចរណ៍ ឲ្យបានច្រើនកន្លែងបន្ថែមទៀត៕
ដកស្រង់ពី (https://www.realestate.com.kh/km/news/Kampot-Real-Estate-transactions-rise-alongside-coastal-development-prospects/)
