ម៉ាត់ ណី ៖ ការលក់​-​ដូរ​ត្រី​រាជ ដែលជា​ស្តេច​ត្រី នឹង​នាំ​ឲ្យ​រាសី​ដាក់ ធ្លាក់ខ្លួន និង​ជួប​គ្រោះ​ចង្រៃ​ផ្សេងៗ​

30/11/-0001 12:00 am ត្បូងឃ្មុំ

​ត្បូងឃ្មុំៈ អ្នកនេសាទ​ខ្មែរ​មូស្លីម ម៉ាត់ ណី អាយុ ៥៨​ឆ្នាំ រស់នៅក្នុង​ភូមិ​ព្រែក​តួច ឃុំ​ជី​រោ​ទី​១ ស្រុក​ត្បូងឃ្មុំ ខេត្ត​ត្បូងឃ្មុំ​។ ម៉ាត់ ណី មាន​ជំនឿ​យ៉ាង​មុតមាំ​ទៅលើ​ត្រី​រាជ តាំងពី​ដូនតា​របស់គាត់​មកម្ល៉េះ​។ ក្នុងអំឡុង​រដូវ​នេសាទ នា​ខែធ្នូ ឆ្នាំ ២០១៧ លោក ណី ធ្លាប់​ចាប់បាន​ត្រី​រាជ​មួយ​ក្បាល ទម្ងន់​ប្រហែល ១៣០​គីឡូក្រាម​។
 
 ម៉ាត់ ណី បាន​ឲ្យ​ដឹងថា​៖ «​ខ្ញុំ​ធ្លាប់​ចាប់​វា​នៅ​ម៉ោង ១២ អា​ធ្រា​ត ក្នុង​ទន្លេមេគង្គ ដោយ​អួន​ព្រយុង​។ មុនដំបូង ពេលដែល​ខ្ញុំ​ទាញ​អួន​ឡើង ក៏​ឃើញ​មាន​អ្វី​ចម្លែក​ខុស​សព្វមួយដង វា​វាយ​ទឹក​បែកខ្ចាយ​។ ភ្លាមៗ​នោះ ខ្ញុំ​មានការ​ភិតភ័យ​រន្ធត់​ញ៉ាប់​ញ័រ​យ៉ាងខ្លាំង និយាយ​គ្នា​ញ័រ​មាត់​ត​តា​ត់ ព្រោះ​មិនដឹង​ច្បាស់​ថា​ជា​អ្វី​។ គ្រប់ៗ​គ្នា មិនបាន​គិតថា វា​ត្រី​រាជ​ទេ ដោយ​នឹកស្មានថា ជា​សត្វ​ក្រពើ​ទៅវិញ​»​។ 
 
​ម៉ាត់ ណី បន្តទៀតថា​៖ «​ខ្ញុំ​គ្មាន​បំណង​លក់​-​ដូរ​វា​ទេ ព្រោះ​វា​ជា​ស្តេច​ត្រី នេះ​បើ​យោងតាម​ជំនឿ និង​ទំនៀមទម្លាប់​តាំងពី​ដូន​-​តា​មក​។ បើតាម​ជំនឿ​ជនជាតិ​ចាម​យើង ការលក់​-​ដូរ​ស្តេច​ត្រី​ប្រភេទ​នេះ នឹង​នាំ​ឲ្យ​រាសី​ដាក់ ធ្លាក់ខ្លួន និង​ជួប​គ្រោះ​ចង្រៃ​ផ្សេងៗ​ជាមិនខាន​»​។ ម៉ាត់ ណី បន្តទៀតថា​៖ «​និយាយ​តាម​ត្រង់​ទៅ​ចុះ ក្មេងៗ​អាយុ​ត្រឹម​២០​ឆ្នាំ មិន​ស្គាល់​ត្រី​រាជ​ផង តែ​ខ្ញុំ​ធ្លាប់​បានឃើញ​គេ​ចាប់បាន​កាលពី​ខ្ញុំ​នៅ​ក្មេង ទើប​ស្គា​ល់វា​ថា​ជា​ត្រី​រាជ​»​។  
 
​ក្រោយពី​ចាប់បាន​ភ្លាម មិនបាន​ប៉ុន្មាន​នាទី​ផង ម៉ាត់ ណី ក៏បាន​មូលមតិ​គ្នា​ជាមួយ​ប្រពន្ធ​-​កូន ដោះ​ត្រី​រាជ​ចេញពី​អួន​ព្រយុង រួច​លែង​វា​ចូលទៅក្នុង​ទន្លេ​វិញ​។ ម៉ាត់ ណី បាន​ឲ្យ​ដឹង​ទៀតថា​៖ «​ខ្ញុំ​បាន​លើក​ក្បាល​វា​កល់​លើដី​ខ្សាច់​ក្នុង​ទន្លេ រួច​បន់ស្រន់​សុំ​សេចក្តីសុខ​សប្បាយ តាម​ជំនឿ និង​ទំនៀមទម្លាប់​ប្រពៃណី​សាសនា ហើយក៏​មិន​ភ្លេច​សុំ​ពី​ត្រី​រាជ​វិញ ដែលជា​សេ្ត​ច​ត្រី នូវ​កូនចៅ (​ត្រី​តូចៗ​) មក​ជំនួស​»​។​
 

 
​រូប​ខាងឆ្វេង អ្នកស្រី ម៉ាត់ សូ ប្រពន្ធ​របស់លោក ម៉ាត់ ណី និង អ្នកស្រី ណី រី​ណា ត្រូវជា​កូន ព្រមទាំង​ចៅស្រី​នៅ​កណ្តាល រូប​កុមារី​កាន់​សៀវភៅ​
 
 
​ប្រពន្ធ​របស់​ម៉ាត់ ណី អ្នកស្រី​ម៉ាត់ សូ មាន​អាយុ ៦៣​ឆ្នាំ បាន​និ​យា​យា​ថា​៖ «​កូន​របស់ខ្ញុំ បាន​ទូរ​សព្ទ​មក​ប្រាប់​ខ្ញុំ​ថា ចាប់បាន​ត្រី​ធំ​ណាស់​។ ភ្លាមៗ ខ្ញុំ​បានដឹង​យ៉ាងច្បាស់​ថា នោះ​ពិតជា​ត្រី​រាជ​។ ខ្ញុំ​ក៏បាន​ប្រាប់​ទៅ​ប្តី និង​កូនប្រសារ​របស់ខ្ញុំ​តាម​ទូរ​សព្ទ​វិញ​ថា ឲ្យ​លែង​វា​វិញ​ទៅ​។ តែ​អ្នកនេសាទ​ជាមួយគ្នា​ចង់​ឲ្យ​ទុក​វា​សិន ដើម្បី​ឲ្យ​អ្នកភូមិ​បានឃើញ​ផង តែ​ខ្ញុំ​ខ្លាច​វា​ងាប់ ក៏​បង្ខំចិត្ត​ឲ្យ​លែង​វា​ទៅ​»​។​
 
​អ្នកស្រី ណី រី​ណា អាយុ ២៤​ឆ្នាំ ត្រូវជា​កូនបង្កើត​របស់ ម៉ាត់ ណី និយាយថា​៖« ខ្ញុំ​កំពុងតែ​លង់លក់​ក្នុង​ដំណេក​នៅលើផ្ទះ​បណ្តែត​ទឹក ស្រាប់តែ​ឮ​សម្លេង ពុក និង​ប្តី​របស់ខ្ញុំ ស្រែកថា ត្រី​ធំ​ណាស់ៗ ខ្ញុំ​ក៏​ភ្ញាក់ឡើង​ទាំង​មមីមមើ ទាញ​ទូរ​សព្ទ​ទៅ​ថត តែ​អកុសល ទូរ​សព្ទ​របស់ខ្ញុំ មិនអាច​ថតរូប​នាពេល​យប់​បាន​។​» រី​ណា បាន​បន្តទៀតថា​៖ «​ពួកយើង​មាន​អារម្មណ៍​ភ័យ​អរ ព្រោះ​មិន​ធ្លាប់​បានឃើញ​ត្រី​រាជ​។ បន្ទាប់ពី​លែង​វា​ហើយ ពួកយើង​ក៏​នាំគ្នា​ជជែក​លេង​រហូតដល់​ភ្លឺ មិន​ចូល​គេង​វិញ​ទេ ព្រោះ​ហាក់​មិន​អស់ចិត្ត​។ ខ្ញុំ​ក៏បាន​បន់ស្រន់​សុំ​សេចក្តីសុខ​ដែរ ដោយ​អង្អែល​ក្បាល​វា​មុននឹង​លែង​»​។​
 
​ប៉ា ស៊ី អាយុ ២៥​ឆ្នាំ ត្រូវជា​ប្តី​របស់ ណី រី​ណា និង​ត្រូវជា​កូនប្រសារ​របស់ ម៉ាត់ ណី និង ម៉ាត់ សូ ដែលជា​អ្នក​ចាប់​ត្រី​រាជ​ផ្ទាល់ដៃ​ជាមួយ​ឪពុកក្មេក​បាន​ឲ្យ​ដឹងថា​៖ «​ខ្ញុំ​មិន​ធ្លាប់​បានឃើញ​ត្រី​រាជទេពី​មុន​មក​។ ពេល​ចាប់​វា​បាន ខ្ញុំ​មាន​អារម្មណ៍​ភ័យ​អរៗ គិតថា​នឹង​ចង​សណ្តោង​វា​មក​អែប​ច្រាំង ដើម្បី​ឲ្យ​អ្នកស្រុក​បានឃើញ​ផងដែរ តែ​ឪពុកក្មេក​ខ្ញុំ​ប្រាប់ថា លែង​វា​ទៅ​ព្រោះ​ខ្លាច​វា​ងាប់​»​។​
 

 
​ត្រី​រាជ ។ រូបភាព​៖ ហ្សេ​ប ហូ​ហ្គេ​ន​
 
 
​ត្រី​រាជ Mekong giant catfish (Pangasianodon gigas) គឺជា​ប្រភេទ​ត្រី​ដែល​ត្រូវបាន​ចាត់ទុកថា រងគ្រោះ​ជិត​ផុត​ពូជ​។ ការនេសាទ​ត្រី​ប្រភេទ​នេះ ត្រូវបាន​ហាមឃាត់​ដោយ​ច្បាប់​ជលផល​របស់​ប្រទេស​កម្ពុជា​។ ទោះជា​យ៉ាងណា ជា​រៀងរាល់ឆ្នាំ​អំឡុង​ចុងខែ​តុលា និង​ដើមខែ​ធ្នូ ត្រី​ប្រភេទ​នេះ មួយចំនួន តែង​ត្រូវបាន​ចាប់​ដោយ​ឧបករណ៍​នេសាទ «​ដាយ​ត្រី​» និង​លួច​លក់​ចេញ​យ៉ាង​ឆាប់រហ័ស ទៅ​ឲ្យ​ឈ្មួញកណ្តាល​ដែល​នឹងធ្វើ​ការនាំ​ចេញទៅ​ប្រទេស​ថៃ និង​វៀតណាម​។ 
​ប៉ុន្តែ ក៏មាន​អ្នកនេសាទ​មួយចំនួន​ផងដែរ ដែលមាន​ជំនឿ​លើ​ត្រី​រាជ ហើយក៏​ធ្លាប់​លែង​វា​វិញ បន្ទាប់ពី​ពួកគេ​ចាប់បាន ករណី​ដូច​គ្រួសារ​អ្នកនេសាទ ម៉ាត់ ណី ជាដើម​។ 
 
 

ព័ត៌មានទាក់ទង