រតនៈគិរី៖ សម្ដេចនាយករដ្ឋមន្ត្រី ហ៊ុន សែន បានច្រានចោលព័ត៌មានដែលចុះផ្សាយថា រដ្ឋាភិបាលប្រគល់បឹងយក្សឡោម ឲ្យក្រុមហ៊ុនចិនវិនិយោគ។
សម្ដេច ហ៊ុន សែន បានសរសេរនៅលើទំព័រហ្វេសប៊ុករបស់សម្ដេច នៅថ្ងៃទី៣ខែកក្កដានេះថា៖«ខ្ញុំបានមើលសារព័ត៌មានរស្មីកម្ពុជាដែលបានសរសេរថា {រដ្ឋាភិបាលនឹងដាក់បឹងយក្សឡោមទៅឲ្យក្រុមហ៊ុនចិនវិនិយោគរយៈពេល ៧៥ឆ្នាំ}។ តើអ្នកណាបង្កើតរឿងបែបនេះឡើងដើម្បីអ្វី?»។
មិនថាតែក្រុមហ៊ុនចិននោះទេ ទោះក្រុមហ៊ុនឯកជនណាក៏ដោយ មិនត្រូវបានអនុញ្ញាតឲ្យវិនិយោគរមណីយដ្ឋានបឹងយក្សឡោមនេះដែរ។ សម្ដេច ហ៊ុន សែន បានអះអាងដូច្នេះថា៖«ក្នុងឋានៈជាប្រមុខរដ្ឋាភិបាល ខ្ញុំសុំទាត់ចោលទាំងស្រុងនូវការវិនិយោគឯកជនណាមួយមកលើបឹងធម្មជាតិដ៏សំខាន់នេះ ទោះក្រុមហ៊ុននោះមកពីប្រទេសណាក៏ដោយ»។
ជុំវិញបញ្ហានេះ មន្ត្រីរបស់មន្ទីរទេសចរណ៍ខេត្តរតនគិរី អះអាងថា ពិតជាមានក្រុមហ៊ុនចិនស្នើគម្រោងនៅបឹងយក្សឡោមនេះប្រាកដមែន និងត្រូវបានគណៈអភិបាលខេត្តពិនិត្យសំណើរ តែមិនទាន់មានការអនុម័តយល់ព្រមណាមួយឡើយ។ មន្ត្រីរូបនោះបានប្រាប់ដូចនេះ ក្នុងកិច្ចប្រជុំមួយរបស់ក្រសួងទេសចរណ៍ នៅថ្ងៃនេះ។
គួរបញ្ជាក់ថា នៅខែមិថុនាឆ្នាំ២០១៨នេះ រដ្ឋាភិបាលបានចេញអនុក្រឹត្យដាក់រមណីយដ្ឋានបឹងយក្សឡោម ជាតំបន់ប្រើប្រាស់ច្រើនយ៉ាង លើផ្ទៃដី ២២៥ហិកតា ក្នុងក្រុងបានលុង ខេត្តរតនគិរី។ អនុក្រឹត្យនេះមានគោលបំណងធានាការថែទាំទីជម្រកសត្វព្រៃ និងប្រព័ន្ធអេកូឡូស៊ី ការពារ និងអភិរក្សធម្មជាតិ ព្រមទាំងសម្រាប់ផ្ដល់ផលិតផល និងសេវាកម្មធម្មជាតិសម្រាប់ការប្រើប្រាស់ដោយនិរន្តរភាព ជាដើម៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com