ភ្នំពេញ៖ នៅថ្ងៃទី ២៩-៣០ ឧសភាខាងមុខនេះ អង្គការសេដាក នឹងនាំអ្នកសារព័ត៌មានទស្សនកិច្ចក្នុងខេត្តកោះកុង ផ្ដោតទៅលើដំណាំទុរេនសរីរាង្គ ទៀបបារាំង និងបន្លែសរីរាង្គផ្សេងៗ។ ក្នុងដំណើរទស្សនកិច្ច អង្គការសេដាក នឹងជំរុញផ្លែទុរេន ទៀបបារាំងសរីរាង្គដែលដាំដុះដោយធម្មជាតិ មកលើទីផ្សារកម្ពុជា។
ក្នុងដំណើរទស្សនកិច្ចនេះ អង្គការសេដាក ចង់បង្កើនការយល់ដឹងពីកសិកម្មសរីរាង្គ ដែលកសិករកំពុងអនុវត្តនៅមូលដ្ឋាន និងបញ្ហាប្រឈមនានាក្នុងវិស័យកសិកម្មសរីរាង្គ។ ក្រៅពីនេះ សេដាក ចង់បង្កើនកសាងទំនុកចិត្តកសិករលើការអនុវត្តកសិកម្មសរីរាង្គ និងផ្សព្វផ្សាយពីកសិផលសរីរាង្គ។
លោក លីន គីមឆែ អ្នកសម្របសម្រួលផ្សារមូលដ្ឋានសេដាក បានលើកឡើងថា ក្នុងតំបន់ថ្មបាំង ស្ថានភាពដី និងអាកាសធាតុមានលក្ខណៈល្អ ដែលប្រជាពលរដ្ឋនៅទីនោះ ដាំដុះតាមបែបធម្មជាតិ ដោយគ្មានសារធាតុគីមី។ អ្នកសម្របសម្រួលរូបនេះ បន្ថែមទៀតថា រសជាតិដំណាំសរីរាង្គក្នុងតំបន់នេះ មានរសជាតិឆ្ងាញ់ និងខុសប្លែកពីតំបន់នានានៅកម្ពុជា។
បើតាមលោក លីន គីមឆែ អង្គការ សេដាក មានគម្រោងជំរុញអត្តសញ្ញាណផលិតផលសរីរាង្គ (Brand) ក្នុងតំបន់ថ្មបាំង ខេត្តកោះកុង ដើម្បីឲ្យប្រជាពលរដ្ឋខ្មែរ រួមទាំងភ្ញៀវទេសចរអន្តរជាតិ ស្គាល់ផលិតផលក្នុងតំបន់ថ្មបាំង។ តំបន់ថ្មបាំង នៃខេត្តកោះកុង ជាតំបន់ដែលមានសក្ដានុពលកសិកម្ម និងសក្ដានុពលទេសចរណ៍ថ្មី នៅកម្ពុជា៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com