ក្រចេះ៖ ក្រសួងចំនួន៤ បានលើកហេតុផលផ្សេងៗគ្នា ចំពោះករណីប្រជាពលរដ្ឋពុលទឹកព្រែកទេរ នៅខេត្តក្រចេះ ដែលបណ្ដាលឲ្យស្លាប់១៣នាក់ និងសង្គ្រោះបន្ទាន់ជិត ២០០នាក់។ ហេតុផលរបស់ក្រសួងទាំង៤នេះ គ្មានចំណុចរួមឡើយ។
ការទាញហេតុផលនៃក្រសួងទាំង ៤នេះ នៅតែមានមន្ទិលសង្ស័យពីសាធារណៈជននៅឡើយថា តើនៅក្នុងទឹកព្រែកទេរខេត្តក្រចេះ បណ្ដាលមកពីសារធាតុអ្វីឲ្យពិតប្រាកដ ដែលជាហេតុធ្វើឲ្យប្រជាពលរដ្ឋពុល ក្រៅពីស្រាសមានសារជាតិមេតាណុលកម្រិតខ្ពស់? មកដល់ពេលនេះ មិនទាន់មានហេតុផលពិតប្រាកដអំពីសារធាតុពុលក្នុងទឹក ដែលអាចឲ្យពលរដ្ឋជឿជាក់ឡើយ។
រដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ ធ្លាប់បានលើកឡើងថា អ្នកជំនាញរបស់លោក បានស្រាវជ្រាវរកឃើញសារធាតុពុលក្នុងទឹកមានជាតិ «ហ្សានីត» ដែលក្រុមអ្នករករ៉ែមាសយកមកប្រើ ដើម្បីសម្អាតមាសនៅខេត្តមណ្ឌលគិរី ដោយពួកគេប្រើប្រាស់ទាំងគ្មានប្រព័ន្ធការពារ ទើបនៅពេលមានភ្លៀង សារធាតុហ្សានីតនេះ វាហូរចូលទៅក្នុងព្រែកទេរ។ បើតាមលោក ចម ប្រសិទ្ធ ដោយសារសារធាតុហ្សានីតនៅក្នុងទឹកនេះ ទើបធ្វើឲ្យពលរដ្ឋមានអាការពុលកន្លងមក។
ផ្ទុយពីការលើកឡើងរបស់លោក ចម ប្រសិទ្ធ ខាងលើងនេះ រដ្ឋមន្ត្រីក្រសួងរ៉ែនិងថាមពល លោក ស៊ុយ សែម បាននិយាយថា គ្មានសារធាតុគីមី ស្យានីត នៅក្នុងទឹកព្រែកទេរឡើយ ដោយសារតែក្រុមហ៊ុនរុករករ៉ែ ដែលមានអាជ្ញាបណ្ណធ្វើអាជីវកម្មរ៉ែមាសនៅក្នុងខេត្តមណ្ឌលគីរី និងខេត្តក្រចេះ មិនទាន់បានធ្វើអាជីវកម្មនៅឡើយ។ លោក ស៊ុយ សែម បានលើកហេតុផលថា ករណីនេះបណ្តាលមកពីថ្នាំពុលសម្លាប់សត្វល្អិត ថ្នាំសម្លាប់ស្មៅ និងករណីមួយចំនួនទៀត គឺបណ្តាលមកពីពុលស្រា ។ ចំណែកក្រសួងបរិស្ថាន មិនទាន់ហ៊ានវាយតម្លៃលើករណីខាងលើនេះ ដោយកំពុងវិភាគលើបញ្ហាទឹក និងតាមដានលើទឡ្ហីករណ៍របស់ក្រសួងឧស្សាហកម្ម និងសិប្បកម្ម រួមជាមួយក្រសួងរ៉ែ និងថាមពល។
អ្នកនាំពាក្យក្រសួងសុខាភិបាល លោក លី សុវណ្ណ នៅតែអះអាងដដែលថា ប្រជាពលរដ្ឋនៅខេត្តក្រចេះ ពុលទឹក និងស្រាស ដែលមានសារធាតុមេតាណុលកម្រិតខ្ពស់។ តាមការផ្ដល់បទសម្ភាសដល់សារព័ត៌មានថ្មីៗ លោក លី សុវណ្ណ មិនអាចវាយតម្លៃ ចំពោះការស្រាវជ្រាវរបស់ក្រសួងខាងលើទេ។ លោក គ្រាន់តែលើកឡើងថា ក្រសួងរ៉ែនិងថាម និងក្រសួងបរិស្ថាន មានជំនាញជាងក្នុងកិច្ចការស្រាវជ្រាវរកសារធាតុពុលក្នុងទឹក។
ក្រសួងសុខាភិបាល ជាស្ថាប័នព្យាបាលអ្នកជំងឺ ដែលពុលទឹក និងស្រាសមានកម្រិតមេតាណុលកម្រិតខ្ពស់ ហើយមិនមានអ្នកជំនាញស្រាវជ្រាវរកសារធាតុពុលក្នុងទឹកទេ ។ សម្រាប់ជំនាញការស្រាវជ្រាវរកសារធាតុពុលក្នុងទឹក ឲ្យបានជាក់លាក់នោះ គឺមានក្រសួងដទៃប៉ុណ្ណោះ។ នេះបើតាម លោក លី សុវណ្ណ ដែលអំពាវនាវឲ្យប្រជាពលរដ្ឋផ្អាកប្រើប្រាស់ទឹក និងផឹកស្រាសបន្តទៀត ដោយរង់ចាំការស្រាវជ្រាវពិស្ដារ និងការវិភាគរកសារធាតុពុលក្នុងទឹកពីក្រសួងពាក់ព័ន្ធសិន៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com