ក្រចេះ៖ មកដល់ពេលនេះ ពលរដ្ឋដែលរងគ្រោះដោយសារពុលទឹក និងពុលស្រា មានចំនួនជាង១៤០នាក់ហើយ ។ ក្រសួងសុខាភិបាល កំពុងតាមដានបញ្ហានេះ។
ករណីសង្ស័យពុលទឹក និងស្រានៅខេត្តក្រចេះរយៈពេលប៉ុន្មានថ្ងៃនេះ បានបណ្ដាលឲ្យពលរដ្ឋ១១នាក់ស្លាប់ និង១៣៤នាក់ កំពុងសម្រាកព្យាបាលនៅមន្ទីពេទ្យ។ នេះបើតាមក្រសួងសុភិបាល ដែលបានបន្ថែមថា ពលរដ្ឋរងគ្រោះទាំងនោះ ភាគច្រើនបានធូរស្រាលជាបណ្ដើរៗហើយ បន្ទាប់ពីទទួលបានការព្យាបាលទាន់ពេលវេលា ខណៈអ្នកពុលស្រា១២នាក់ទៀត ដែលត្រូវបានបញ្ជូនមកទទួលការសង្គ្រោះនៅមន្ទីពេទ្យកាល់ម៉ែត ដោយសារស្ថិតនៅក្នុងស្ថានភាពធ្ងន់ធ្ងរខ្លាំង។
បើតាមក្រសួងសុខាភិបាល ករណីដែលនាំឲ្យពលរដ្ឋពុលស្រានេះ ដោយសារតែស្រាមានផ្ទុកជាតិមេតាណុលខ្ពស់ ដែលអាចធ្វើឲ្យគ្រោះថ្នាក់ដល់ជីវិត។ ដោយឡែកករណីសង្ស័យពុលទឹក វិញ ក្រសួងសុខាភិបាល កំពុងធ្វើការតាមដាន និងស្រាវជ្រាវបន្ត ដើម្បីរកមូលហេតុច្បាស់លាស់។
សេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី៧ ឧសភា បានបញ្ជាក់ដូច្នេះថា៖«ការវិភាគសំណាកទឹក ដែលផ្ញើមកពីភូមិពាក់ព័ន្ធ ពុំទាន់ទទួលបានលទ្ធផលឡើយ»។
គួរបញ្ជាក់ថា ករណីពុលស្រា និងសង្ស័យពុលទឹក ដែលមានអ្នកស្លាប់ជាង១០នាក់ បានកើតឡើងនៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ ។ ដើម្បីដោះស្រាយបញ្ហានេះ ក្រសួងសុខាភិបាល បានប្រាប់ឲ្យពលរដ្ឋផ្អាកការប្រើប្រាស់ទឺកព្រែកទេរ ដែលស្ថិតនៅក្នុងតំបន់សង្ស័យនេះ មួយរយៈពេលសិន ដោយទទួលការផ្គត់ផ្គង់ទឹកស្អាតជំនួសវិញ។ ជាមួយគ្នានេះ ត្រូវបញ្ឈប់ការបិតស្រា និងការលក់ស្រាសនៅក្នុងមូលដ្ឋាន និងបង្កើនការអប់រំអនាម័យរស់នៅ និងការហូបស្អាតរបស់ប្រជាជន៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com