អាជ្ញាធរខេត្តក្រចេះ ហាមពលរដ្ឋប្រើប្រាស់ទឹកព្រែកទេរ ក្រោយពីមានអ្នកពុលទឹកស្លាប់១០នាក់
ក្រចេះ៖ អាជ្ញាធរខេត្តក្រចេះ បានប្រកាសហាមពលរដ្ឋប្រើប្រាស់ទឹកព្រែកទេរមួយរយៈពេលសិន ក្រោយពីមានករណីពលរដ្ឋពុលទឹកជាង១០០នាក់។ ករណីពុលទឹកនេះ បានបណ្ដាឲ្យពលរដ្ឋ១០នាក់ស្លាប់ផងដែរ។
មូលហេតុដែលអាជ្ញាធរ មិនឲ្យពលរដ្ឋប្រើប្រាស់ទឹកព្រែកទេរនេះ ព្រោះសង្ស័យថា ករណីពលរដ្ឋនាំគ្នាពុល រយៈពេលប៉ុន្មានថ្ងៃនេះ អាចបណ្ដាលមកពីសារធាតុគីមីនៅក្នុងទឹក ដែលពួកគាត់បានយកទៅបរិភោគ និងប្រើប្រាស់។
សេចក្តីប្រកាសព័ត៌មានរបស់រដ្ឋបាលខេត្តក្រចេះ បានបញ្ជាក់ដូច្នេះថា៖«ដូចនេះដើម្បីធានាសុវត្ថិភាព និងបង្ការគ្រោះថ្នាក់បន្ថែមទៀត សូមប្រជាពលរដ្ឋដែលរស់នៅដងព្រែកទេរ និងដៃព្រែកទេរ បញ្ឈប់សកម្មភាពបរិភោគ និងប្រើប្រាស់ទឹកព្រែកទេរ ទឹកតាមដៃព្រែកទេរ និងប្រភពទឹកផ្សេងៗដែលមិនមានអនាម័យនៅក្នុងតំបន់នោះ។ ក្នុងករណីប្រជាពលរដ្ឋ បន្តជួបគ្រោះអាសន្ន ឬបានទទួលដំណឹងអំពីករណីទាំងនេះ សូមមេត្តាផ្ដល់ព័ត៌មានជាបន្ទាន់ដល់ភ្នាក់ងារមានសមត្ថកិច្ច កម្លាំងប្រដាប់អាវុធ និងអាជ្ញាធរ ដែលកំពុងឈរជើងនៅក្នុងភូមិសាស្ត្រនោះ»។
ដើម្បីដោះស្រាយបញ្ហានេះ អភិបាលខេត្តក្រចេះ លោក វ៉ា ថន ក៏បាននាំយកនូវទឹកស្អាត រួមទាំងថវិការ និងសម្ភារៈប្រើប្រាស់មួយចំនួនទៀត ទៅចែកពលរដ្ឋនៅក្នុងភូមិនោះ សម្រាប់ប្រើប្រាស់បណ្តោះអាសន្ន។
ជាមួយគ្នានេះរដ្ឋបាលខេត្ត អំពាវនាវឲ្យប្រជាពលរដ្ឋ បង្កើនការប្រុងប្រយ័ត្ន ហើយសហការជាមួយអាជ្ញាធរមូលដ្ឋាន និងសមត្ថកិច្ចជំនាញ ក្នុងការបង្ការ និងទប់ស្កាត់គ្រោះអាសន្ននេះឲ្យមានប្រសិទ្ធភាព។
រយៈពេលប៉ុន្មានថ្ងៃនេះ ប្រជាពលរដ្ឋ រស់នៅភូមិស្រែនន និងភូមិអាលច ឃុំកន្ទួត ស្រុកចិត្ត្របុរី ខេត្តក្រចេះ កើតមានករណីផ្ទុះជំងឺ ដែលមានអាការក្អួតចង្អោរ ឈឺពោះ ឈឺក អស់កម្លាំង ទន់ដៃជើង វិលមុខ ថប់ដង្ហើម សន្លប់ រួចបណ្ដាលឲ្យស្លាប់មួយចំនួន ទន្ទឹមនឹងការជួយអន្តរាគមន៍សង្គ្រោះបន្ទាន់ ដោយបញ្ជូនទៅកាន់មន្ទីពេទ្យបង្អែកខេត្ត និងមន្ទីរាជធានីភ្នំពេញ។
គិតមកត្រឹមថ្ងៃទី៦ ឧសភា នេះ ពលរដ្ឋរងគ្រោះស្លាប់ ដោយសារពុលទឹក មានចំនួន១០នាក់ (ស្រី៧នាក់) ខណៈពលរដ្ឋរងគ្រោះជាង១០០នាក់ទៀត កំពុងសម្រាកនិងទទួលការជួយសង្គ្រោះបន្ទាន់ ពីសំណាក់ក្រុមគ្រូពេទ្យ។ នេះបើតាមហ្វេសប៊ុកស្នងការដ្ឋាននគរបាលខេត្តក្រចេះ៕
