ខេត្តព្រះវិហារ៖ សត្វស្លាបព្រៃ៦ក្បាលងាប់ ដោយសារការដាក់បំពុលថ្នាំសម្លាប់សត្វល្អិតនៅតាមត្រពាំងនានា នៅក្នុងតំបន់ខ្ពង់រាប ខេត្តព្រះវិហារ ។
លោក ម៉ៅ ឃៀន អ្នកសម្របសម្រួលគម្រោងស្រាវជ្រាវនៃអង្គការអភិរក្សសត្វព្រៃ (WCS) ប្រចាំតំបន់ខ្ពង់រាបភាគខាងជើង បាននិយាយថា មូលហេតុដែលបណ្ដាឲ្យសត្វស្លាបព្រៃងាប់នេះ ដោយសារប្រជាជននៅតំបន់នោះ ភាគច្រើនប្រើប្រាស់ថ្នាំសម្លាប់សត្វល្អិត ដើម្បីបំពុលសត្វព្រៃធ្វើជាម្ហូបអាហារ និងការពារដំណាំស្រូវផងដែរ។ លោក ម៉ៅ ឃៀន បន្ថែមថា៖«ទង្វើបែបនេះ ហើយដែលជាហេតុនាំឲ្យប៉ះពាល់ដល់សត្វស្លាបព្រៃទាំងនោះស្លាប់»។
លោក កែន សេរីរដ្ឋា ប្រធានអង្គការ(WCS) បាននិយាយថា ថ្នាំសម្លាប់សត្វល្អិត បានគំរាមកំហែងយ៉ាងធ្ងន់ធ្ងរដល់សត្វស្លាប និងពពួកថនិកសត្វ ដែលធ្វើឲ្យសត្វប្រភេទទាំងនេះ ងាយនឹងផុតពូជជាសាកល។ ប្រធានអង្គការ(WCS)រូបនេះ អំពាវនាវដល់សាធារណៈជន បញ្ឈប់ការបរិភាគសាច់សត្វព្រៃដោយការបំពុលនេះ ព្រោះវាមានផ្ទុកសារធាតុពុល ដែលនាំឲ្យប៉ះពាល់ដល់សុខភាព។
ប្រភេទសត្វស្លាបព្រៃចំនួន៦ក្បាលងាប់ ហើយត្រូវបានខាងក្រុមអភិរក្សសត្វព្រៃប្រទះឃើញ មានសត្វសំពោធធំ សត្វកក់ពាក់អំបោះ និងសត្វត្មាតត្នោត ដែលសុទ្ធតែជាសត្វជិតផុតពូជ។ កន្លងមក សត្វស្រុក ឆ្កែ គោ ក្របី មាន់ និងទាជាដើម ក៏រងគ្រោះដោយសារថ្នាំសម្លាប់សត្វល្អិតផងដែរ។ នេះបើតាមអង្គការអភិរក្សសត្វព្រៃ WCS៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com