ព្រៃវែង៖ សម្ដេច នាយករដ្ឋមន្ត្រី ហ៊ុន សែន បានបើកការដ្ឋានសាងសង់ឡើងវិញផ្លូវជាតិលេខ ១១ ដែលមានប្រវែង ៩៦.៤៨គីឡូម៉ែត្រ ពីអ្នកលឿង ទៅដល់ខេត្តត្បូងឃ្មុំ ដោយត្រូវចំណាយទឹកប្រាក់ជាង ៩៤លានដុល្លារ។
ព័ត៌មានដែលបង្ហោះលើទំព័រហ្វេសប៊ុករបស់សម្ដេច ហ៊ុន សែន បានឲ្យដឹងថា ផ្លូវជាតិលេខ១១នេះ នឹងរួមចំណែកយ៉ាងសំខាន់ ក្នុងការជួយដល់ប្រជាពលរដ្ឋ ខេត្តព្រៃវែង និងត្បូងឃ្មុំ ហើយនិងបណ្តាខេត្តផ្សេងៗទៀត ដែលត្រូវធ្វើដំណើរឆ្លងកាត់។ ប្រភពខាងលើ បន្តថា មុននឹងមានការសាងសង ផ្លូវនេះ ត្រូវបានជួសជុលជាបន្តបន្ទាប់ ដើម្បីបង្ករលក្ខណៈ ភាពងាយស្រួលដល់ការធ្វើដំណើររបស់ប្រជាពលរដ្ឋទូទៅ។
ប្រមុខរាជរដ្ឋាភិបាលកម្ពុជា អរគុណរដ្ឋាភិបាលចិន ដែលតែងតែជួយដល់ការអភិវឌ្ឍហេដ្ឋារចនាសម្ព័ន្ធក្នុងប្រទេសកម្ពុជា។ ទំព័រហ្វេសប៊ុករបស់សម្ដេច ហ៊ុន សែន បានសរសេរបែបនេះថា៖«មិនត្រឹមតែអភិវឌ្ឍខ្លួនឯងឲ្យបានរីកចម្រើនប៉ុណ្ណោះទេ មិត្តចិនបាន ចូលរួមចំណែកជួយអភិវឌ្ឍប្រទេសជិតខាងមួយចំនួនទៀតផងដែរ ជាក់ស្តែង ប្រទេសកម្ពុជា ជាដើម»។
បើតាមទំព័រហ្វេសប៊ុករបស់សម្ដេចនាយរដ្ឋមន្ត្រី រដ្ឋាភិបាលចិនបានផ្តល់ជំនួយក្នុងការសាងសងស្ពានចំនួន៧ ដល់កម្ពុជា ដោយចំណាយថវិកាប្រមាណ ២១៦លានដុល្លារ៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com