សៀមរាប៖ ដូចរាល់ឆ្នាំ ភ្ញៀវទេសចរជាតិ និងអន្តរជាតិ តែងធ្វើដំណើរមកកម្សាន្តខេត្ត សៀមរាប ក្នុងឱកាសបុណ្យទានសំខាន់ៗ តួយ៉ាងបុណ្យចូលឆ្នាំសកលជាដើម។ របាយការណ៍របស់អាជ្ញាធរ ក្នុងឱកាសបុណ្យឆ្លងឆ្នាំសកលនេះ ខេត្តសៀមរាបទទួលបានទេសចរជាតិ និងអន្តរជាតិជាង ៣៣ម៉ឺននាក់។
ក្នុងរបាយការណ៍របស់រដ្ឋបាលខេត្តសៀមរាប ដែលចេញផ្សាយនៅយប់ថ្ងៃទី១ ខែមករា ឆ្នាំ២០១៨ និងដែលសារព័ត៌មានថ្មីៗទទួលបាន ភ្ញៀវទេសចរដែលចូលរួមអបអរក្នុងពិធីបុណ្យឆ្លងឆ្នាំ និងចូលឆ្នាំសកលនៅឆ្នាំនេះ មានចំនួនសរុប ៣៣៣,០៨៥នាក់ កើនឡើង ជាង៧០%។ ក្នុងនោះដែរ ទេសចរអន្តរជាតិមានចំនួន ៣៣,០៨៥នាក់ កើនឡើងជាង ៩% ចំណែកទេសចរជាតិ មានចំនួន ៣០ម៉ឺននាក់ តួលេខកើនឡើងជាង ៦% បើធៀបនឹងឆ្នាំចាស់។
គួរឱ្យដឹងផងដែរថា នៅយប់ឆ្លងឆ្នាំ ចូលឆ្នាំសកល២០១៨ នៅតំបន់ផាប់ស្ទ្រីត ផ្សារចាស់ ដែលជាតំបន់សំខាន់នៅក្នុងសៀមរាប មានមនុស្សកកកុញ ចំណែកអាហារដ្ឋាន និងភោជនីយដ្ឋាននានា សឹងគ្មានកន្លែងអង្គុយ។ តាមអាជ្ញាធរបានឱ្យដឹងដែរថា កាំជ្រួញប្រមាណ ១ពាន់គ្រាប់ ត្រូវបានបាញ់នៅតាមបណ្តាសណ្ឋាគារ និងតំបន់កម្សាន្តមួយចំនួន ដើម្បីអបអរសាទរ ការមកដល់ឆ្នាំថ្មី ឆ្នាំ២០១៨៕
-
ដោយ៖ Thmey Thmey 25
-
© រក្សាសិទ្ធិដោយ thmeythmey25.com