ក្រុម​អ្នក​អភិរក្ស​ស្រោចស្រង់​ជីវិត​ទាព្រៃ​ស្លាប​ស​ដ៏​កម្រ​ពីរ​ក្បាល​នៅ​ព្រះវិហារ​

30/11/-0001 12:00 am ព្រះវិហារ

​សត្វ​ទាព្រៃ​ស្លាប​ស​ចំនួន​២​ក្បាល ត្រូវបាន​ជួយសង្គ្រោះ​នៅក្នុង​ដែនជម្រកសត្វព្រៃ​គូលែន ព្រហ្ម​ទេព ខេត្តព្រះវិហារ​។ នេះ​បើ​យោងតាម​សេចក្តីប្រកាស​ព័ត៌មាន​របស់​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS) នា​ថ្ងៃទី​៥ ខែធ្នូ​។​



​អ្នកភូមិ​ឈូក​នៅ​តំបន់​ដែនជម្រកសត្វព្រៃ​គូលែន ព្រហ្ម​ទេព ខេត្តព្រះវិហារ បាន​ប្រទះឃើញ សត្វ​ទាព្រៃ​ស្លាប​សទាំង​ពីរ​ដែល​ស្ថិតក្នុង​សភាព​ទន់ខ្សោយ និង​មិនអាច​ហោះហើរ​បាន​។ បន្ទាប់ពី​ទទួលបាន​ការរាយការណ៍ ក្រុម​អ្នក​អភិរក្ស​នៃ​ក្រសួងបរិស្ថាន និង​អង្គការ WCS ប្រគល់​ទាព្រៃ​ដ៏​កម្រ​ទាំងពីរ​ក្បាល ទៅ​ក្រុមការងារ​របស់​មជ្ឈមណ្ឌល​អង្គរ​សម្រាប់​ការអភិរក្ស​ជីវចម្រុះ​ខេត្តសៀមរាប​ដើម្បី​ពិនិត្យ និង​មើលថែរក្សា រហូត​ដល់ពេល​ពួកវា​ជាសះស្បើយ និង​អាច​រស់នៅក្នុង​ធម្មជាតិ​វិញ​បាន ទើប​លែង​ទៅក្នុង​ព្រៃ​វិញ​។​



WCS បានបញ្ជាក់​ឲ្យ​ដឹងថា ទាព្រៃ​ស្លា​បស ស្ថិតក្នុង​បញ្ជី​ក្រហម​របស់​អង្គការ IUCN ជា​ប្រភេទ​រងគ្រោះ​ជិត​ផុត​ពូជ​នៅលើ​សាកលលោក ដែល​បច្ចុប្បន្ន មាន​ចន្លោះ​តែ​២៥០ ទៅ​១០០០​ក្បាល​ប៉ុណ្ណោះ ហើយ​ចំនួន​តិចតួច​រស់នៅ​កម្ពុជា​។​

​លោក រស់ វ៉ាន់ ប្រធាន​ក្រុម​ស្រាវជ្រាវ​ប្រចាំ​ដែនជម្រកសត្វព្រៃ​គូលែន ព្រហ្ម​ទេព​នៃ​ក្រសួងបរិស្ថាន និង​អង្គការ WCS  បាន​បញ្ជាក់ថា សត្វ​ទា​ស្លាប​ស​ទាំងពីរ​ក្បាល​នោះ នឹងត្រូវ​លែង​វិញ នៅពេលដែល​ពួកវា​មាន​កម្លាំង​ដូចដើម​។​



​អ្នក​អភិរក្ស​រូបនេះ បាន​សម្តែង​ការសប្បាយ​ចិត្ត​ចំពោះ​កម្រិតយល់ដឹង​របស់​ព​ល​រដ្ឋ​មូលដ្ឋាន​លើ​សារសំខាន់​នៃ​ការងារ​អភិរក្ស​សត្វព្រៃ​។ លោក​បាន​និយាយ​យ៉ាង​ដូច្នេះ​ថា​៖«​បើ​ពួកគេ​មិនបាន​យល់ដឹង​ទេនោះ ពួកគាត់​ប្រហែលជា​យក​ទាព្រៃ​ស្លាប​សទាំង​នោះ​ទៅ​បរិភោគ ឬ​លក់​បាត់ទៅហើយ​»​។​

​តំបន់​ខ្ពង់រាប​ភាគ​ខាងជើង​កម្ពុជា ដែល​រួមបញ្ចូល​ទាំង​ដែនជម្រកសត្វព្រៃ​គូលែន ព្រហ្ម​ទេព ព្រះ​រកា និង​ឆែប ផងដែរ​នោះ គាំទ្រ​ដល់​ការរស់នៅ​របស់​សត្វ​ស្លាប​ប្រភេទ​រងគ្រោះ​ជា​សាកល​ជាច្រើន​ប្រភេទ រួមមាន​ត្រ​យ៉ង​យក្ស ត្រ​យ៉ង​ចង្កំ​កស ត្មាត​៣​ប្រភេទ ទាព្រៃ​ស្លា​បស និង​សត្វព្រៃ​ជាច្រើន​ទៀត​៕

ព័ត៌មានទាក់ទង